របបសឹកថៃបានអនុញ្ញាតឲ្យលោកស្រីអតីតនាយករដ្ឋមន្រ្តីយីងឡាក់ចាកចេញពីប្រទេស
នៅថ្ងៃព្រហស្បតិ៍ ទី១៧ កក្កដានេះ របបសឹកក្នុងប្រទេសថៃបានប្រាប់ឲ្យដឹងពីការអនុញ្ញាតឲ្យលោកស្រីអតីតនាយករដ្ឋមន្រ្តីយីងឡាក់ធ្វើដំណើរចេញទៅបរទេស។ តំាងពីក្រោយការធ្វើរដ្ឋប្រហារទម្លាក់រដ្ឋាភិបាលដឹកនំាដោយគណបក្សភឿថៃកាលពីថ្ងៃទី២២ ឧសភាមក នេះជាលើកទី១ បង្អស់ដែលលោកស្រីយីងឡាក់ត្រូវបានគេអនុញ្ញាតឲ្យចាកចេញពីប្រទេស។ តែនៅពេលដល់ប្រទេសក្រៅហើយ លោកស្រីយីងឡាក់ចំាបាច់ត្រូវតែជូនព័ត៌មានប្រាប់រដ្ឋអំណាចក្រុងបាងកកពីទីកន្លែង និងប្រទេសដែលលោកស្រីទៅលេង។
ចុះផ្សាយនៅថ្ងៃ៖
ស្តាប់ - ០២:១១
គេនៅមិនទាន់ដឹងច្បាស់នៅឡើយទេថា តើការសម្រេចចិត្តរបស់របបសឹកឲ្យលោកស្រីអតីតនាយករដ្ឋមន្រ្តីយីងឡាក់អាចចាកចេញពីប្រទេសនោះមានបង្កប់ដោយមូលហេតុអ្វីទេ។ តែបើយោងតាមអ្នកនំាពាក្យរបស់ក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ដែលជាឈ្មោះផ្លូវការហៅដោយរបបសឹកឲ្យដឹងថា តំាងពីលោកស្រីយីងឡាក់ត្រូវបានធ្លាក់ពីអំណាច និងតំាងពីក្រោយរដ្ឋប្រហារយោធាក្នុងថ្ងៃទី២២ ឧសភាមក រូបលោកស្រីយីងឡាក់មិនដែលបានបញ្ចេញប្រតិកម្ម ឬមួយក៏អាកប្បកិរិយាណាមួយប្រឆំាងនឹងការងាររបស់ក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ទេ។
បើយោងតាមសំណើផ្ញើទៅកាន់ក្រុមប្រឹក្សាជាតិដើម្បីសន្តិភាព និងសណ្តាប់ធ្នាប់ លោកស្រីយីងឡាក់បានសុំធ្វើដំណើរទៅប្រទេសបារំាងនៅសប្តាហ៍ក្រោយដើម្បីចូលរួមប្រារព្ធខួបកំណើតគម្រប់ ៦៥ឆ្នំារបស់លោកថាក់ស៊ីនដែលត្រូវជាបងប្រុសបង្កើតរបស់លោកស្រី។ លោកថាក់ស៊ីនដែលជាអតីតនាយករដ្ឋមន្រ្តីថៃធ្លាក់ពីដំណែងដោយរដ្ឋប្រហារយោធាក្នុងឆ្នំា ២០០៦ និងដែលបច្ចុប្បន្នកំពុងភៀសខ្លួនរស់នៅឯបរទេស។ ប្រភពយោធាថៃឲ្យដឹងថា លោកស្រីយីងឡាក់ត្រូវតែជូនដំណឹងដល់រដ្ឋអំណាចក្រុងបាងកកពីប្រទេសដែលលោកស្រីទៅដើរលេង តាមរយៈស្ថានទូតថៃប្រចំាប្រទេសនោះ។ តែគេនៅមិនទាន់ដឹងថា នៅពេលដាក់ជើងជាន់ប្រទេសក្រៅហើយ តើលោកស្រីយីងឡាក់នឹងត្រឡប់ចូលស្រុកវិញ ឬមួយក៏សម្រេចភៀសខ្លួនរស់នៅបរទេសដូចបងប្រុសនោះ។
គួររម្លឹកជូនថា លោកស្រីយីងឡាក់បានឡើងកាន់តំណែងនាយករដ្ឋមន្រ្តី បន្ទាប់ពីការជាប់ឆ្នោតរបស់គណបក្សភឿថៃក្នុងឆ្នំា ២០១១។ តែត្រូវបានតុលាការធម្មនុញ្ញសម្រេចដកចេញពីតំណែងដោយសាររឿងអាស្រូវពុករលួយមួយចំនួននៅដើមឆ្នំា ២០១៤ ពោលប៉ុន្មានសប្តាហ៍មុននឹងមានរដ្ឋប្រហារយោធាក្នុងថ្ងៃទី២២ ឧសភាទម្លាក់អ្នកដែលឡើងបន្តតំណែងពីលោកស្រី។ រដ្ឋប្រហារយោធាដែលបានបិទបញ្ចប់ក្បួនបាតុកម្មអូសបន្លាយរបស់ពួកអាវលឿងប្រឆំាងរដ្ឋាភិបាលក្នុងរយៈពេល ៧ខែ។ ក៏ដូចជាឥស្សរជននយោបាយមួយចំនួនដែរ លោកស្រីយីងឡាក់ក៏ត្រូវបានរបបសឹកហៅសួរចម្លើយ និងឃុំទុកអស់ជាច្រើនសប្តាហ៍ មុននឹងដោះលែងឲ្យមានសេរីភាពវិញ បន្ទាប់ពីបានចុះកិច្ចសន្យាឈប់ធ្វើនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ