កម្ពុជា -

អត្ថបទចុះផ្សាយនៅថ្ងៃ ព្រហស្បតិ៍ 13 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 13 កញ្ញា 2012

តុលាការបន្តកាត់ទោសលោកម៉មសូណង់ដូ ចូលដល់ថ្ងៃទី៣

លោក ម៉ម សូណង់ដូ នាយកវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ

ដោយ លី ម៉េងហួរ

នៅថ្ងៃព្រហស្បតិ៍ ទី១៣ កញ្ញានេះ ជាថ្ងៃទី៣ហើយ ដែលតុលាការក្រុងភ្នំពេញបន្តសវនាការកាត់ទោស លោក ម៉ម សូណង់ដូ នាយកវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ។ លោក ម៉ម សូណង់ដូ ជាប់ចោទក្នុងរឿងបង្កើតតំបន់អបគមន៍ តាមរយៈជម្លោះដីធ្លី នៅខេត្តក្រចេះ។ រីឯក្រុមអ្នកតវ៉ាប្រមាណ ៤០ នាក់ ដែលមានទាំងកុមារផង បានបន្តលើកបដា ស្រែកទាមទារឲ្យតុលាការដោះលែងលោក ម៉ម សូណង់ដូ ខណៈដែលប៉ូលិសបន្តដាក់របាំងបិទផ្លូវមុខតុលាការ។

សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ

ស្តាប់ (01:55)

13/09/2012 by លី ម៉េងហួរ

នៅថ្ងៃព្រហស្បតិ៍នេះ ជាថ្ងៃទី៣ហើយ ដែលតុលាការក្រុងភ្នំពេញបានដំណើរការកាត់ទោសលោក ម៉ម សូណង់ដូ។ សំណុំរឿងក្តីជម្លោះដីធ្លីបង្កើតតំបន់អបគមន៍ ប្រឆាំងរដ្ឋាភិបាល នៅខេត្តក្រចេះ ត្រូវបានបើកសវនាការ ចាប់តាំងពីថ្ងៃចន្ទ ដោយមានជនជាប់ចោទសរុបចំនួន ១៤ នាក់។ រហូតដល់ម៉ោង ៦ ល្ងាចនេះ សវនាការបានផ្អាក។ នៅពេញមួយថ្ងៃនេះ សាក្សីសរុបចំនួន ២៣ នាក់ត្រូវបានសួរនាំចប់អស់ហើយ។ នៅថ្ងៃសុក្រស្អែក តុលាការនឹងបន្តសវនាការ ដោយចូលដល់ការធ្វើសេចក្តីសន្និដ្ឋានរបស់ភាគីមេធាវី និងព្រះរាជអាជ្ញា។

ក្នុងសវនាការនៅថ្ងៃព្រហស្បតិ៍នេះ សាក្សីដែលជាប៉ូលិសក្រសួងមហាផ្ទៃបានបង្ហាញឯកសារភស្តុតាងនៃទំនាក់ទំនងរបស់លោកម៉មសូណង់ដូ និងលោកសួន សេរីរដ្ឋា ប្រធានចលនាអំណាចប្រជាពលរដ្ឋ។ កាលពីដើមឆ្នាំ២០១១ លោកសួន សេរីរដ្ឋាដែលរស់នៅអាមេរិកបានអំពាវនាវឲ្យប្រជាពលរដ្ឋកម្ពុជាធ្វើការតវ៉ាប្រឆាំងរដ្ឋាភិបាលកម្ពុជា ដោយយកគំរូតាមបដិវត្តផ្កាម្លិះក្នុងប្រទេសអារ៉ាប់មួយចំនួន។ ក៏ប៉ុន្តែ លោកម៉មសូណង់ដូបានបដិសេធចំពោះមុខតុលាការថា លោកជួបលោកសួន សេរីរដ្ឋានៅប្រទេសថៃ ក្នុងនាមលោកជាអ្នកកាសែតដែលបានសម្ភាសន៍ប្រធានចលនាអំណាចប្រជាពលរដ្ឋ ដើម្បីចាក់ផ្សាយតាមវិទ្យុសំបុកឃ្មុំរបស់លោកប៉ុណ្ណោះ។

នៅក្រៅរបងតុលាការ នៅថ្ងៃព្រហស្បតិ៍នេះ អ្នកគាំទ្រលោកម៉ម សូណង់ដូ បន្តប្រមូលផ្តុំលើកបដា និងស្រែកមេក្រូ ទាមទារឲ្យតុលាការដោះលែងលោកម៉មសូណង់ដូ។ ប៉ូលិសបានក៏បន្តបិទផ្លូវមុខតុលាការក្រុងភ្នំពេញ។
លោក ម៉ម សូណង់ដូត្រូវបានចោទប្រកាន់ថា ជាមេខ្លោងបង្កើតតំបន់អបគមន៍ ពាក់ព័ន្ធនឹងជម្លោះដីនៅក្នុងស្រុកឆ្លូង ខេត្តក្រចេះ។ ប៉ុន្តែក្នុងសវនាការ លោកម៉ម សូណង់ដូ បានបដិសេធ៕