កម្ពុជា -

អត្ថបទចុះផ្សាយនៅថ្ងៃ ពុធ 27 កុម្ភៈ 2013 - ព័ត៌មានទើបកែប្រើលើកចុងក្រោយ ថ្ងៃ ពុធ 27 កុម្ភៈ 2013

តុលាការសាលាឧទ្ធរណ៍ចាប់ផ្តើមសើរើរឿងលើកលែងការចោទប្រកាន់លោកឈូក បណ្ឌិត

លោក ឈូក បណ្ឌិត អតីតអភិបាលក្រុងបាវិត

ដោយ លី ម៉េងហួរ

នៅព្រឹកថ្ងៃពុធនេះ តុលាការសាលាឧទ្ធរណ៍បានលើកយកករណីលោក ឈូក បណ្ឌិត អតីតអភិបាលក្រុងបាវិត បាញ់ស្ត្រីកម្មករ ៣ នាក់ ឲ្យរបួសធ្ងន់ មកជំនុំជម្រះឡើងវិញ។ សំណុំរឿងក្តីនោះត្រូវបានតុលាការខេត្តស្វាយរៀងបានសម្រេចលើកលែងការចោទប្រកាន់លើលោក ឈូក បណ្ឌិត កាលពីខែធ្នូ។ ក្នុងពេលតុលាការបើកសវនាការកាលពីព្រឹកមិញ ក្រុមកម្មករ និងក្រុមសកម្មជនសិទ្ធិមនុស្សប្រមាណ ១០០ នាក់ ក៏បានធ្វើបាតុកម្ម លើកបដា និងស្រែកមេក្រូ ទាមទារឲ្យតុលាការផ្តន្ទាទោសលោក ឈូក បណ្ឌិត។

សេចក្តីរាយការណ៍របស់ លី ម៉េងហួរ ពីទីក្រុងភ្នំពេញ

ស្តាប់ (03:03)

27/02/2013 by លី ម៉េងហួរ

នៅក្រៅរបងតុលាការសាលាឧទ្ធរណ៍នៅមុខវាំងនាព្រឹកមិញ ក្រុមកម្មករ និងក្រុមសកម្មជន សិទ្ធិមនុស្ស បានធ្វើបាតុកម្ម ទាមទារឲ្យតុលាការ កាត់ទោសលោក ឈូក បណ្ឌិត ដាក់ពន្ធនាគារ។ អតីតអភិបាលក្រុងបាវិត លោក ឈូក បណ្ឌិតត្រូវបានគេអះអាងថា ជាជនជាប់ចោទតែម្នាក់គត់ ដែលបានបាញ់លើស្ត្រីកម្មករ ៣ នាក់ឲ្យរងរបួស ស្ទើរស្លាប់ កាលពីថ្ងៃទី២០ ខែកុម្ភៈ ឆ្នាំ២០១២។ ក៏ប៉ុន្តែ សំណុំរឿងក្តីនោះត្រូវបានព្រះរាជអាជ្ញា តុលាការខេត្តស្វាយរៀងបានសម្រេចលើកលែងការចោទប្រកាន់លើលោក ឈូក បណ្ឌិត ដែលមិនត្រូវបានចាប់ឃុំខ្លួននោះ កាលពីខែធ្នូ ឆ្នាំ២០១២ ចំពោះបទបង្ករបួសស្នាម ដោយអចេតនា។ ព្រះរាជអាជ្ញាសំអាងថា គ្មានភ័ស្តុតាងគ្រប់គ្រាន់ដើម្បីដាក់បន្ទុក។

យ៉ាងណាក៏ដោយ សំណុំរឿងក្តីដ៏រសើបនោះត្រូវបានតុលាការសាលាឧទ្ធរណ៍លើកយកមកជំនុំជម្រះឡើងវិញ នៅព្រឹកថ្ងៃពុធនេះ។ ក្នុងសវនាការព្រឹកមិញ បានធ្វើឡើងជាអសាធារណៈ គឺចៅក្រមទើបតែសាកសួរទៅលើស្ត្រីជនរងគ្រោះបានពីរនាក់ និងលោក ឈូក បណ្ឌិតប៉ុណ្ណោះ។ ចំណែកស្ត្រីរងគ្រោះម្នាក់ទៀត និងសាក្សីសរុប ២៥ នាក់ដែលភាគច្រើនជាប៉ូលិស និងប៉េអឹមនឹងត្រូវសាកសួរក្នុងសវនាការ នៅព្រឹកថ្ងៃព្រហស្បត៍បន្តទៀត។ សវនាការអសាធារណៈនោះត្រូវបានលោក អំ សំអាត ប្រធានក្រុមបច្ចេកទេសស៊ើបអង្កេតរបស់អង្គការសិទ្ធិមនុស្ស លីកាដូ ដែលបានតាមឃ្លាំមើលសវនាការសម្តែងការសោកស្តាយ ហើយថា សវនាការនោះ គួរតែបើកឲ្យអ្នកផ្សេងបានស្តាប់ និងតាមដាន។ លោកក៏បានជំរុញឲ្យតុលាការសាលាឧទ្ធរណ៍ត្រូវតែផ្តល់យុត្តិធម៌ដល់ក្រុមស្ត្រីកម្មកររងគ្រោះ។

ស្ត្រីរងគ្រោះដែលបានចូលឆ្លើយបំភ្លឺនៅព្រឹកមិញ បានស្នើឲ្យចៅក្រមតុលាការសលាឧទ្ធរណ៍ផ្តន្ទាទោសលោក ឈូក បណ្ឌិត ដើម្បីកុំឲ្យអ្នកមានអំណាច ជាអភិបាលក្រុងរូបនេះ កាន់កាំភ្លើងបាញ់គេឯងស្ទើរស្លាប់ទៅថ្ងៃក្រោយទៀត។ យ៉ាងណាក៏ដោយ បន្ទាប់ពីសវនាការនៅព្រឹកមិញ លោក ឈូក បណ្ឌិតបានបដិសេធមិនឆ្លើយនឹងសំណួរអ្នកកាសែតទេ។ ប៉ុន្តែសាក្សីម្នាក់ ជាប៉ូលិស នៅក្រុងបាវិតដែលមានវត្តមាននៅសាលាឧទ្ធរណ៍ កាលពីព្រឹកថ្ងៃទី២៧ ខែកុម្ភៈ ឆ្នាំ២០១៣ បានប្រាប់ក្រុមអ្នកកាសែតថា លោក ឈូក បណ្ឌិត ជាអ្នកកាន់កាំភ្លើងខ្លី បាញ់លើក្រុមស្ត្រីកម្មករកាត់ដេរ ដែលបានធ្វើបាតុកុម្មកាលពីថ្ងៃ២០ កុម្ភៈ៕