ជីហាតអ៊ីរ៉ាក់“រដ្ឋអ៊ីស្លាម” ពិតជាគ្រោះថ្នាក់ ប៉ុន្តែ មិនមែនជាបញ្ហាចោទចំបងនោះទេ
ចុះផ្សាយនៅថ្ងៃ៖
ស្តាប់ - ០៥:២៦
ប្រទេសលោកខាងលិចកំពុងសស្រាក់សសម្រាំ ចាត់វិធានការទប់ទល់នឹងក្រុមជីហាតដែលនៅតែប៉ុន្មានខែសោះបានបង្កើនឥទ្ធិពលអំណាច នៅអ៊ីរ៉ាក់ និងនៅស៊ីរី។ តាមរយៈរូបភាពបាញ់សម្លាប់មនុស្ស ក្រុមនេះបានបង្ហាញពីចរិតហិង្សា ឃោឃៅ វ៉ាដាច់ក្រុមអាល់កៃដា ដែលជាភេរវជនអន្តរជាតិ។ ការដែលអាមេរិក និងប្រទេសនៅអឺរ៉ុបជាច្រើនបានខ្នះខ្នែងផ្តល់អាវុធដល់អាជ្ញាធរគៀរឌីស្តង់ដើម្បីទប់ទល់ជាមួយក្រុមជីហាតនៅអ៊ីរ៉ាក់ ដោយមកពីគេមើលឃើញប្រយោជន៍វែងឆ្ងាយ។ គេមើលឃើញថា ក្រុមជីហាតមិនត្រឹមប្រព្រឹត្តអំពើហិង្សាសម្លាប់មនុស្សនៅដើមបូព៌ាតែប៉ុណ្ណោះទេ ប៉ុន្តែ ក្រុមនេះអាចជាគ្រោះថ្នាក់គំរាមកំហែងដល់សន្តិសុខរបស់ប្រទេសលោកខាងលិច។ ជនបរទេសដូចជាអាមេរិក អង់គ្លេស បារាំង ដែលបានចូលទៅរួមប្រយុទ្ធជាមួយក្រុមជីហាត ហើយគេបារម្ភថា ក្រុមនេះនឹងអាចនាំយកផែនការមកបង្កភេរវកម្មនៅពេលពួកគេត្រលប់ចូលទៅប្រទេសកំណើតរបស់ពួកគេវិញ។
តាមរយៈសំឡេងដែលស្រង់បានពីខ្សែវីដេអូផ្សាយដោយក្រុមជីហាត ទីភ្នាក់ងារស៊ើបការណ៍សម្ងាត់របស់អង់គ្លេសបានកំណត់ឃើញថា ឃាតករដែលបានកាត់ករអ្នកកាសែតអាមេរិក លោក James Foley គឺជាជនជាតិអង់គ្លេស ដែលធ្លាប់មានរបរជាអ្នកចម្រៀងHip Hop ក្នុងទីក្រុងឡុងដ៍។ តាមអាមេរិក មានយុវជនបរទេសមកពី ៥០ប្រទេស ដែលនៅក្នុងនោះគេប៉ាន់ប្រមាណថា មានជនជាតិអង់គ្លេសជាងមួយពាន់នាក់ ជនជាតិអាមេរិកាំងមួយរយនាក់ និងយុវជនជាតិសាសន៍ដទៃទៀត ដែលបានធ្វើដំណើរទៅប្រទេសស៊ីរីដើម្បីចូលរួមប្រយុទ្ធជាមួយក្រុមជីហាត។
សម្រាប់ក្រុមទីភ្នាក់ងារស៊ើបការណ៍សម្ងាត់របស់ប្រទេសលោកខាងលិច វាមិនមែនជារឿងថ្មីទេ ដែលគេដឹងថា មានជនបរទេសជាច្រើនពាន់នាក់បានចូលទៅរួមប្រយុទ្ធសម្រាប់ក្រុមជីហាតនៅអ៊ីរ៉ាក់ និងនៅស៊ីរី។ ប៉ុន្តែ អ្វីដែលថ្មី គួរឲ្យភ្ញាក់ផ្អើលគឺយុទ្ធសាស្រ្តផ្សព្វផ្សាយរបស់ក្រុមជីហាតអ៊ីរ៉ាក់ ដែលចង់បង្ហាញថា មានមនុស្សមកពីប្រទេសលោកខាងលិច ជាពិសេស គឺអង់គ្លេស និងអាមេរិក បានចូលរួមនៅក្នុងសកម្មភាពប្រយុទ្ធរបស់ខ្លួន។ ក្រុមជីហាតសំដៅប្រទេសទាំងពីរ មកពីអាមេរិក និងអង់គ្លេសតែងសហការគ្នាជាដរាបនៅក្នុងសង្រ្គាមនៅដើមបូព៌ា ដោយរាប់តាំងពីសង្រ្គាមនៅ អ៊ីរ៉ាក់។
អ្វីដែលគេបារម្ភខ្លាំង គឺក្រុមយុវជនបរទេសទាំងនោះ ដែលកំពុងជឿស៊ុបក្នុងមនោគមវិជ្ជារបស់ក្រុមជីហាត និងអាចនាំយកអំពើហិង្សា ផែនការធ្វើភេរវកម្មពីប្រទេសស៊ីរី ឬអ៊ីរ៉ាក់ យកទៅបង្កនៅក្នុងទឹកដីកំណើតរបស់ខ្លួនវិញ។ អាមេរិក និងអង់គ្លេសជាអ្នកទាញសញ្ញាអាសន្នមុនគេពីរឿងនេះ។
បើសិនក្រុមជីហាតនៅតែបន្តអូសទាញក្រុមយុវជនបរទេសឲ្យទៅចូលរួមនៅក្នុងអំពើហិង្សាសម្លាប់មនុស្ស ហើយយុវជនបរទេសទាំងនោះអាចក្លាយជាគ្រោះថ្នាក់គំរាមកំហែងដល់សន្តិសុខជាតិ ហេតុអ្វីបានជាអាមេរិក ដែលជាមហាអំណាចពិភពលោកផ្នែកយោធា មិនព្រមវាយប្រហារទៅលើក្រុមជីហាត ដែលមានទាហានមិនដល់ពីរម៉ឺននាក់ផងនោះ?
ដោយសារតែនយោបាយរារែក រដ្ឋាភិបាលលោកអូបាម៉ារងការរិះគន់ទាំងពីគណបក្សប្រឆាំង និងពីមនុស្សរបស់គណបក្សលោកផ្ទាល់។ ថ្មីៗនេះ លោកស្រីហែលឡារី គ្លីនតុន អតីតរដ្ឋមន្រ្តីការបរទេសអាមេរិក ដែលនឹងអាចឈរឈ្មោះជាបេក្ខជនប្រធានាធិបតី បន្តពីលោកអូបាម៉ា ហាក់និយាយទម្លាក់កំហុសទៅលើលោកអូបាម៉ា។ តាមលោកស្រី ដោយសារតែលោកអូបាម៉ា មិនព្រមធ្វើអន្តរាគមន៍យោធានៅស៊ីរី ទើបក្រុមជីហាតឡើងដៃខ្លាំងនៅពេលនេះ។
លោកអូបាម៉ា ដែលបានសម្រេចដកទ័ពអាមេរិកពីសង្រ្គាមនៅអ៊ីរ៉ាក់ បានបង្ហាញជំហរយ៉ាងច្បាស់ថា លោកលែងចង់បញ្ជូនទ័ពទៅធ្វើសង្រ្គាមនៅបរទេស ជាពិសេសនៅស៊ីរី។ ជាជាងធ្វើអន្តរាគមន៍យោធានៅស៊ីរី រដ្ឋបាលលោកអូបាម៉ាបានសម្រេច គាំទ្រ ផ្តល់ថវិកាដល់ក្រុមប្រឆាំង ស៊ីរី ឬប្រទេសជិតខាងស៊ីរី និងអ៊ីរ៉ាក់ ដើម្បីចូលរួមប្រយុទ្ធតទល់នឹងទាហានរដ្ឋាភិបាលស៊ីរីផង និងដើម្បីប្រយុទ្ធទប់ទល់នឹងក្រុមជីហាតអ៊ីរ៉ាក់រដ្ឋអ៊ីស្លាមផង។
កាលពីថ្ងៃព្រហស្បតិ៍ លោកអូបាម៉ាបានបញ្ជាក់ជំហរជាថ្មី ថា អាមេរិកនឹងមិនបញ្ជូនទ័ពអាកាសទៅវាយប្រហារក្រុមជីហាតនៅស៊ីរី នោះបើទោះជាក្រុមជីហាតអ៊ីរ៉ាក់រដ្ឋអ៊ីស្លាម សាហាវ និងកំពុងបង្កើនឥទ្ធិពលគ្រប់គ្រងទឹកដីមួយភាគរបស់ស៊ីរី និងអ៊ីរ៉ាក់ យ៉ាងណាក៏ដោយ។ ការឈ្លានពាន ប្រើអំពើហិង្សារបស់ក្រុមជីហាតអ៊ីរ៉ាក់ រដ្ឋអ៊ីស្លាមស្មុគស្មាញជាងអ្វីដែលគេគិតទៅទៀត។
ក្រុមជីហាតមិនមែនជាបញ្ហាស្នូលដែលគេត្រូវដោះស្រាយទេ។ បើមើលទៅលើដើមចមនៃបញ្ហា ក្រុមជីហាតអ៊ីរ៉ាក់ រដ្ឋអ៊ីស្លាមដែលឡើងដៃខ្លាំង សំបូរទាំងអ្នកគាំទ្រ និងសំបូរទាំងលុយ ដោយសារមកពីកត្តាពីរយ៉ាង។ ទីមួយគឺសង្រ្គាមស៊ីវិលនៅស៊ីរីដែលបានសម្លាប់មនុស្សជាង១សែននាក់ បានទាក់ទាញយុវជនច្រើនមិនថា នៅប្រទេសលោកខាងលិច ឬនៅក្នុងតំបន់ឲ្យចូលរួមប្រយុទ្ធក្នុងចលនាជីហាត ដើម្បីប្រឆាំងនឹងរដ្ឋាភិបាលលោកបាស្ហា អាល់អាសាដ។ ដោយលឺការឃោសនាទាក់ទាញ របស់ក្រុមជីហាតដែលថា ស្លាប់ក្នុងនាមជាវីរបុរស យុវជនបរទេសជាច្រើន ដែលមួយចំនួនធ្លាប់ជាប់គុក ឬរស់នៅក្នុងគ្រួសារក្រីក្រ ចាប់ផ្តើមលង់ជឿតាមក្រុមអ៊ីស្លាមជ្រុលនិយម ដែលជាបណ្តាញរើសបញ្ចូលមនុស្សរបស់ក្រុមជីហាត។ ត្រង់ចំណុចនេះ គេអាចនិយាយបានថា គេអាចបន្ថយឥទ្ធិពលរបស់ក្រុមជីហាត បើសិនគេអាចបញ្ចប់សង្រ្គាមស៊ីវិលនៅស៊ីរី។ ដូច្នេះ សម្រាប់លោកអូបាម៉ា ការលុបបំបាត់ក្រុមជីហាត ឬធ្វើឲ្យក្រុមជីហាតចុះខ្សោយបាន បើសិនរបបលោកបាស្ហា អាល់អាសាដដួលរលំ។
មួយវិញទៀត ក្រុមជីហាតអ៊ីរ៉ាក់រដ្ឋអ៊ីស្លាមអាចលេចរូបរាងឡើង និងប្រមូលបានអ្នកគាំទ្រច្រើន ដោយសារតែប្រទេសធំៗ និងប្រទេសអ្នកមានមួយចំនួនដែលកំពុងឈ្លោះដណ្តើម ប្រជែងអំណាច ឥទ្ធិពលគ្នានៅក្នុងតំបន់ ដូចជាអ៊ីរ៉ង់ អារ៉ាប៊ី សាអូឌីតជាដើម។ ប្រទេសកាតាដែលប្រទេសតូចមួយ ប៉ុន្តែ សំបូរលុយដោយសារប្រេង ធ្លាប់ផ្គត់ផ្គង់លុយដល់ក្រុមជីហាតអ៊ីរ៉ាក់ ដើម្បីធ្វើសង្រ្គាមនៅស៊ីរី។ អាចនិយាយក្នុងន័យម្យ៉ាង គឺក្រុមប្រទេសដែលសំបូរដោយនិកាយស៊ុននីត កំពុងប្រឈមតទល់នឹងក្រុមប្រទេសដែលកាន់និកាយស្ហីអ៊ីត។ ដូច្នេះ បើសិនអ៊ីរ៉ង់កាត់បន្ថយការគាំទ្រចលនាស្ហីអ៊ីតក្នុងប្រទេសអ៊ីរ៉ាក់ ឬកាតារឈប់គាំទ្រក្រុមនិកាយស៊ុននីតដែលបច្ចុប្បន្នកំពុងចូលរួមជាមួយក្រុមជីហាត នោះចលនាជីហាតអ៊ីរ៉ាក់ រដ្ឋអ៊ីស្លាមនឹងថយចុះឥទ្ធិពលដោយឯកឯង ដោយមិនចាំបាច់អាមេរិកត្រូវប្រើកម្លាំងយោធាវាយប្រហារទៅលើក្រុមនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ