យុវជនភូមាដែលគាំទ្រលោកស្រីអង់សាន ស៊ូជីចង់ចូលរួមក្នុងការដឹកនាំប្រទេស
មានការជួបជុំមួយបានធ្វើឡើងក្រោមអធិបតីភាពរបស់លោកស្រី អ៊ុងសាន ស៊ូជី ប្រមុខដឹកនាំសម្ព័ន្ធជាតិប្រជាធិបតេយ្យនៅភូមាកាលពីថ្ងៃសៅរ៍ទី៥កក្កដា។ ការជួបជុំនេះគឺធ្វើឡើងដើម្បីពិភាក្សាស្តីអំពីការបញ្ចូលយុវជនជំនាន់ថ្មីទៅក្នុងថ្នាក់ដឹកនាំរបស់បក្សនយោបាយរបស់លោកស្រី។ លោកស្រីបានថ្លែងថា ជាការពិតណាស់ ដែលសម្ព័ន្ធជាតិប្រជាធិបតេយ្យត្រូវបានកសាងដោយមនុស្សចាស់ៗដែលគាត់បានតស៊ូជាយូរឆ្នាំ ប៉ុន្តែចូរកុំភ្លេចថាអនាគតរបស់លទ្ធិប្រជាធិបតេយ្យគឺរំពឹងទៅលើយុវជន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
ថ្លែងក្នុងពិធីជួបជុំជាមួយក្រុមយុវជនប្រជាធិបតេយ្យភូមា លោកស្រី អ៊ុងសាន ស៊ូជី ដែលមានវ័យ៦៩ឆ្នាំ បានរំលឹកអំពីការតស៊ូរបស់អ្នកប្រជាធិបតេយ្យវ័យចាស់ៗចាប់តាំងពីការករកើតក្រុមសម្ព័ន្ធជាតិប្រជាធិបតេយ្យនៅឆ្នាំ១៩៨៨។ ប៉ុន្តែលោកស្រីបន្តថា ពេលនេះអ្នកប្រជាធិបតេយ្យត្រូវតែយល់ឲ្យច្បាស់ថា មនុស្សចាស់មិនមែនមានជីវិតអមតៈរស់នៅជាមួយយើងរហូតទេ។ ដូច្នេះគេត្រួវចាប់ផ្តើមបណ្តុះបណ្តាលយុវជនជំនាន់ក្រោយឲ្យចូលរួមធ្វើការជាមួយមនុស្សចាស់ដើម្បីកសាងលទ្ធិប្រជាធិបតេយ្យនៅភូមា។
លោក ម៉ូង ម៉ូងអ៊ូ ដែលជាអ្នករៀបចំកម្មវិធីជួបជុំនេះ បាននិយាយឲ្យដឹងថា មានយុវជនអាយុចន្លោះពី១៦ ទៅ៣៥ឆ្នាំ ប្រមាណជា១៥០នាក់បានមកចូលរួម។ ការជួបជុំនេះ គឺធ្វើឡើងក្នុងគោលបំណងលើកកំពស់ការបញ្ចូលកំលាំងយុវជនទៅក្នុងថ្នាក់ដឹកនាំ។ លោកថា មិនមែនតែសម្ព័ន្ធជាតិប្រជាធិបតេយ្យទេដែលត្រូវការកំលាំងយុវជន ពោលគឺភូមាទាំងមូលដែលត្រូវការការផ្លាស់ប្តូរមួយដោយប្រគល់ជោគវាសនារបស់ប្រទេសទៅឲ្យយុវជន។ កន្លងមកយុវជនតែងតែនៅជួរមុខជានិច្ច ក្នុងការតស៊ូមតិ និងការពារលទ្ធិប្រជាធិបតេយ្យ។ ប៉ុន្តែយុវជននៅពុំទាន់ទទួលបាននូវមុខងារទទួលខុសត្រូវនយោបាយក្នុងជួរគណបក្ស បានទូលំទូលាយទេ ព្រោះថាភូមាជាប្រទេសដែលមានទំនៀមទំលាប់គោរពមនុស្សចាស់ជ្រុលពេក ក្មេងៗមិនងាយទទួលបានមុខដំណែងធំដុំទេ។ គួររំលឹកផងដែរថា ថ្នាក់ដឹកនាំនៅក្នុង សម្ព័ន្ធជាតិប្រជាធិបតេយ្យភាគច្រើនមានវ័យជាង៦០ឆ្នាំ ដែលសុទ្ធសឹងតែជាអ្នកតស៊ូប្រឆាំងនឹងរបបផ្តាច់ការយោធាពីជំនាន់មុន។
យុវជនអាយុ២៩ឆ្នាំម្នាក់ បាននិយាយថា អនាគតលទ្ធិប្រជាធិបតេយ្យនៅភូមា មិនមែនស្ថិតនៅលើតែមនុស្សចាស់ម្នាក់ពីរនាក់ ជាអ្នកសម្រេចនោះទេ។ គេត្រូវតែផ្តល់លទ្ធភាពឲ្យយុវជនដែលជាកម្លាំងនៅខាងក្រោម បានមានឱកាសសម្តែងមតិ និងការយល់ឃើញរបស់ពួកគេ តាមរយៈការផ្តល់មុខងារដែលមានការទទួលខុសត្រូវនយោបាយក្នុងជួរបក្ស ក៏ដូចជាការបញ្ចូលបេក្ខភាពតំណាងរាស្រ្តជាយុវជនជំនាន់ក្រោយ។ យុវជនរូបនេះ ក៏បានទទួលស្គាល់ដែរថា ក្មេងៗត្រួវការការរៀនសូត្រច្រើនពីមនុស្សចាស់ ហើយទន្ទឹមនឹងនោះ មនុស្សចាស់ត្រូវតែព្រមចែករំលែកបទពិសោធន៍ការងារមកឲ្យយុវជន។
ក្រុមសម្ព័ន្ធ ជាតិប្រជាធិបតេយ្យរបស់លោកស្រី អ៊ុងសាន ស៊ូជី ត្រូវបានគេរំពឹងថានឹងអាច ទទួលបានជោគជ័យនាពេលបោះឆ្នោតជ្រើសរើសតំណាងរាស្ត្រអាណត្តិក្រោយឆ្នាំ២០១៥ បើសិនជាការបោះឆ្នោតនឹងប្រព្រឹត្តទៅដោយសេរីនិងយុត្តិធម៌។ ទោះបីជាយ៉ាងណា អ្នកវិភាគមួយចំនួនយល់ថា ក្រុមសម្ព័ន្ធជាតិប្រជាធិបតេយ្យ អាចនឹងមានការលំបាក ក្នុងការរៀបចំប្រទេសដោយសាតែកង្វះធនធានមនុស្សដែលមានសមត្ថភាព ព្រោះថាប្រទេសនេះ ត្រូវការការកសាងស្ទើរតែគ្រប់វិស័យ ទាំងហេដ្ឋារចនាសម្ព័ន្ធ វិស័យរដ្ឋបាលសាធារណៈ វិស័យអប់រំ និងសុខាភិបាលជាដើម។
យ៉ាងណាមិញ លោកស្រី អ៊ុងសាន ស៊ូជី បានថ្លែងដោយផ្តល់អាទិភាពដល់ការចូលរូមរបស់យុវជនក្នុងការកសាងអនាគតរបស់ភូមា។ លោកស្រីថា វាជារឿងធម្មជាតិ មនុស្សកើតមកត្រូវតែចាស់ ហើយចាស់ត្រូវតែស្លាប់។ ក្មេងៗត្រូវមកបន្តវេន ហើយពេលក្មេងៗនោះក្លាយជាមនុស្សចាស់ គេត្រូវប្រគល់ទៅឲ្យក្មេងជំនាន់ក្រោយមួយទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ