រដ្ឋាភិបាលជប៉ុនប្រកាសត្រៀមខ្លួនផ្តល់ថ្នំាសាកល្បងសម្រាប់ព្យាបាលជំងឺអេបូឡា
នៅថ្ងៃចន្ទ ទី២៥ សីហានេះ រដ្ឋាភិបាលនៃប្រទេសជប៉ុនបានប្រកាសពីការត្រៀមខ្លួនក្នុងការផ្តល់ថ្នំាសម្រាប់ព្យាបាលជំងឺអេបូឡា តែជាថ្នំាដែលកំពុងស្ថិតក្នុងដំណាក់កាលសាកល្បង។ ការប្រកាសរបស់រដ្ឋាភិបាលទីក្រុងតូក្យូពេលនេះអាចជាក្តីសង្ឃឹមថ្មីចំពោះអ្នកជំងឺ ពិសេសប្រទេសអាហ្រ្វិកចំនួន៤ ដែលកំពុងទទួលរងការឆ្លងរាតត្បាតដោយជំងឺអេបូឡាយ៉ាងខ្លំាងក្លា។ មកទល់ពេលនេះ ជំងឺអេបូឡាបានផ្តាច់ជីវិតមនុស្សយ៉ាងតិច ១ ៤២៧នាក់។
ចុះផ្សាយនៅថ្ងៃ៖
ស្តាប់ - ០២:១៤
អាចថា ជាក្តីសង្ឃឹមថ្មីសម្រាប់អ្នកកើតជំងឺអេបូឡា ក៏ដូចជាការបង្ការទប់ស្កាត់ការឆ្លងរាតត្បាតរបស់មេរោគដ៏កាចសាហាវមួយនេះនៅក្នុងទ្វីបអាហ្រ្វិក ក៏ថាបាន។ បន្ទាប់ពីថ្នំាសាកល្បងរបស់អាមេរិកំាងឈ្មោះ ZMapp មក ឥឡូវនេះដល់វេនប្រទេសជប៉ុនម្តងដែលទើបប្រកាសឲ្យដឹងថា ខ្លួនក៏បានរកឃើញថ្នំាវ៉ាក់សំាងសម្រាប់ប្រឆំាងជំងឺអេបូឡាដែរ និងត្រៀមខ្លួនរួចជាស្រេចដើម្បីផ្តល់ថ្នំាសាកល្បងនេះទៅកាន់ប្រទេសដែលកំពុងឆ្លងរាតត្បាតដោយជំងឺអេបូឡា។ ថ្នំារបស់ជប៉ុនត្រូវបានគេឲ្យឈ្មោះថា favipiravir ឬ T-៧០៥។ តែលោកអគ្គលេខាធិការរដ្ឋាភិបាលជប៉ុនយ៉ូស៊ីហ៊ីដេ ស៊ូហ្កាបានថ្លែងថា ដើម្បីអាចឲ្យជប៉ុនបញ្ជូនថ្នំារបស់ខ្លួនបាន លុះត្រាណាតែមានការយល់ព្រមពីអង្គការសុខភាពពិភពលោកជាមុនសិន។
គួររម្លឹកជូនថា មកទល់ពេលនេះ ថ្នំាអាមេរិកំាងឈ្មោះ ZMapp ដែលមានទ្រង់ទ្រាយជាសេរ៉ូមត្រូវបានគេធ្វើការសាកល្បងលើអ្នកផ្ទុកជំងឺអេបូឡាពីរនាក់កាលពីសប្តាហ៍កន្លងទៅ។ អ្នកជំងឺទំាងពីរនាក់នោះបានជាសះស្បើយ តែទន្ទឹមគ្នានេះ មានសង្ឃកាតូលិកជនជាតិអេស្បាញម្នាក់ដែលបានទទួលព្យាបាលដោយសេរ៉ូម ZMapp នោះដែរ បែរជាបានស្លាប់ទៅវិញ។ ដូច្នេះឃើញថា ប្រសិទ្ធិភាពរបស់ថ្នំា ZMapp នៅមិនទាន់ច្បាស់លាស់ និងកំពុងបន្តស្ថិតក្នុងដំណាក់កាលសាកល្បងជាបន្តទៀត។ ដោយឡែក ថ្នំារបស់ជប៉ុន T-៧០៥ ដែលប្រភពដើមរបស់វា គឺសម្រាប់ព្យាបាលជំងឺគ្រុនផ្តាស់សាយត្រូវបានគេធ្វើឡើងជាថ្នំាគ្រាប់ និងដែលកំពុងស្ថិតក្នុងដំណាក់កាលតេសត្តគ្លីលិកនៅសហរដ្ឋអាមេរិក។
ខុសពីថ្នំាអាមេរិកំាង ZMapp ដែលនៅមានបរិមាណតិចតួច ជប៉ុនបានប្រាប់ឲ្យដឹងថា ថ្នំា T-៧០៥ ដែលខ្លួនមានសព្វថ្ងៃអាចព្យាបាលអ្នកជំងឺបានជាង ២០ ០០០នាក់ និងថា ក្រុមហ៊ុនអាចនឹងផលិតបានបន្ថែមទៀតដើម្បីឆ្លើយតបនឹងតម្រូវការ។ តែគេនៅមិនទាន់ដឹងថា តើថ្នំាជប៉ុននោះនឹងមានប្រសិទ្ធិភាពកម្រិតណាសម្រាប់ព្យាបាលជំងឺអេបូឡានោះទេ។ គួររម្លឹកជូនថា ជំងឺឆ្លងរាតត្បាតអេបូឡាត្រូវបានគេរកឃើញដំបូងក្នុងឆ្នំា ១៩៧៦ និងដែលបានសម្លាប់មនុស្សយ៉ាងតិច ១ ៤២៧នាក់តែក្នុងរយៈពេលប៉ុន្មានសប្តាហ៍ប៉ុណ្ណោះនៅក្នុងប្រទេសអាហ្រ្វិកចំនួន៤ លីបេរីយ៉ាសៀរ៉ាឡេអូន ហ្គីណេ និងប្រទេសនីហ្សេរីយ៉ា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ