ជប៉ុនព្រមានចិនដែលរឹបអូសកប៉ាល់ជប៉ុនដើម្បីទារបំណុលតាំងពីសម័យសង្រ្គាមលោក
វិបត្តិការទូតថ្មីមួយទៀតបានផ្ទុះឡើង រវាងចិន និងជប៉ុន ក្រោយពីចិនបានរឹបអូសកប៉ាល់មួយគ្រឿងរបស់ក្រុមហ៊ុនជប៉ុន ដើម្បីទារបំណុលដែលជំពាក់តាំងពីសម័យសង្រ្គាមលោក។ រដ្ឋាភិបាលជប៉ុនបានព្រមាននៅថ្ងៃចន្ទនេះថា ការរឹបអូសកប៉ាល់នេះកំពុងតែធ្វើឲ្យប៉ះពាល់ទៅដល់គោលការណ៍នៃទំនាក់ទំនងចិន-ជប៉ុនក្រោយសម័យសង្រ្គាម។ គោលការណ៍ដែលបានព្រមព្រៀងគ្នា កាលពីឆ្នាំ១៩៧២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
កាលពីថ្ងៃសៅរ៍ តុលាការក្រុងសៀងហៃបានប្រកាសរឹបអូសកប៉ាល់ដឹកទំនិញមួយគ្រឿងរបស់ក្រុមហ៊ុនឯកជនជប៉ុន នៅក្នុងក្តីក្តាំពាក់ព័ន្ធនឹងបំណុល ដែលជំពាក់តាំងពីក្នុងអំឡុង ទសវត្សរ៍ឆ្នាំ១៩៣០ នៅពេលដែលចិនស្ថិតក្រោមការត្រួតត្រារបស់ជប៉ុន។
យោងតាមបណ្តាញផ្សព្វផ្សាយព័ត៌មានចិន ក្តីក្តាំនេះកើតឡើងពីកិច្ចសន្យាចុះតាំងពី៨០ឆ្នាំមុន ដែលពេលនោះក្រុមហ៊ុនជប៉ុនបានជួលកប៉ាល់ចំនួន២គ្រឿងរបស់ក្រុមហ៊ុនចិន ក៏ប៉ុន្តែ កប៉ាល់នេះត្រូវបានទាហានជប៉ុនរឹបអូសយកទៅប្រើ ហើយក្រោយមកត្រូវលិច នៅក្នុងអំឡុងសង្រ្គាមលោកលើកទី២។
កាលពីឆ្នាំ២០០៧ តុលាការក្រុងសៀងហៃបានចេញសេចក្តីសម្រេចមួយ បញ្ជាឲ្យក្រុមហ៊ុនជប៉ុនសងការខូចខាតចំនួន ២៨លានដុល្លារ ទៅតាមការទាមទាររបស់ក្រុមហ៊ុនចិន។ ក៏ប៉ុន្តែ ក្រុមហ៊ុនជប៉ុនបដិសេធមិនព្រមសង ដោយលើកហេតុផលថា កប៉ាល់ដែលជួលនេះត្រូវបានកងទ័ពជប៉ុនរឹបអូសយកទៅប្រើ។
នៅថ្ងៃចន្ទនេះ អ្នកនាំពាក្យរដ្ឋាភិបាលជប៉ុនបានព្រមានថា ការរឹបអូសកប៉ាល់របស់ក្រុមហ៊ុនឯកជន ដោយតុលាការចិននេះ កំពុងតែធ្វើឲ្យរង្គោះរង្គើទៅដល់មូលដ្ឋានគ្រឹះនៃទំនាក់ទំនងចិន-ជប៉ុន ក្រោយសម័យសង្រ្គាម។ គោលការណ៍ ដែលប្រទេសទាំងពីរបានព្រមព្រៀងគ្នា កាលពីឆ្នាំ១៩៧២ ថាចិននឹងមិនធ្វើការទាមទារសំណងណាមួយពីជប៉ុន ទាក់ទងនឹងការខូចខាតក្នុងសម័យសង្រ្គាម។
រដ្ឋាភិបាលជប៉ុនក៏បានព្រមានផងដែរថា ការរឹបអូសទ្រព្យសម្បត្តិរបស់ក្រុមហ៊ុនឯកជនជប៉ុន ដោយតុលាការចិនបែបនេះ អាចនឹងធ្វើឲ្យក្រុមហ៊ុនជប៉ុនមានការខ្លាចរអារក្នុងការធ្វើការរកស៊ី នៅក្នុងប្រទេសចិន។
តួលេខរបស់រដ្ឋាភិបាលចិនបង្ហាញថា វិនិយោគរបស់ក្រុមហ៊ុនជប៉ុន នៅក្នុងប្រទេសចិន នៅក្នុងត្រីមាសទីមួយ ឆ្នាំ២០១៤នេះ បានថយចុះរហូតដល់ទៅ ៥០% បើធៀបទៅនឹងឆ្នាំទៅមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ