ជប៉ុន-កូរ៉េខាងត្បូង -

អត្ថបទចុះផ្សាយនៅថ្ងៃ សៅរ៍ 11 សីហា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 11 សីហា 2012

ជប៉ុនចង់ប្តឹងទៅតុលាការក្រុងឡាអេរឿងជម្លោះដណ្តើមកោះជាមួយកូរ៉េខាងត្បូង

ទីប្រជុំកោះ Dokdo (Takeshima) ដែលកំពុងបង្កជាជម្លោះការទូត រវាងប្រទេសជប៉ុននិងកូរ៉េខាងត្បូង

REUTERS/Korea Pool

ដោយ សេង ឌីណា

រដ្ឋមន្រ្តីក្រសួងការបរទេសជប៉ុនបានថ្លែងនៅថ្ងៃសៅរ៍នេះថា ជប៉ុនអាចនឹងដាក់ពាក្យបណ្តឹងទៅតុលាការយុត្តិធម៌អន្តរជាតិក្រុងឡាអេ ដើម្បីឲ្យដោះស្រាយជម្លោះដណ្តើមប្រជុំកោះជាមួយកូរ៉េខាងត្បូង។ ការប្រកាសនេះត្រូវបានធ្វើឡើង មួយថ្ងៃក្រោយពីលោកលី ម្យ៉ុងបាក់ ប្រធានាធិបតីកូរ៉េខាងត្បូង បានទៅបំពេញទស្សនកិច្ច នៅលើប្រជុំកោះ ដែលជាប់ជម្លោះ។

សេចក្តីរាយការណ៍របស់ សេង ឌីណា

ស្តាប់ (02:04)

11/08/2012

ដំណើរទស្សនកិច្ចរបស់លោកលី ម្យ៉ុងបាក់ ទៅកាន់ប្រជុំកោះដែលជាប់ជម្លោះជាមួយជប៉ុន កាលពីម្សិលមិញ កំពុងតែបង្កជាជម្លោះការទូតរវាងប្រទេសទាំងពីរ។

នាយករដ្ឋមន្រ្តីជប៉ុនបានថ្លែងថា សម្រាប់ជប៉ុន ដំណើរទស្សនកិច្ចរបស់លោកលី ម្យ៉ុងបាក់នេះ គឺជារឿងដែលមិនអាចទទួលយកបាន។ យោងតាមទីភ្នាក់ងារសារព័ត៌មានជប៉ុនក្យូដូ ជប៉ុនបានកោះហៅឯកអគ្គរាជទូតរបស់ខ្លួនពីកូរ៉េខាងត្បូងឲ្យត្រឡប់មកជប៉ុនវិញ ដោយគ្មានពេលកំណត់។ ចំណែកឯកអគ្គរដ្ឋទូតកូរ៉េខាងត្បូងប្រចាំក្រុងតូក្យូ ត្រូវបានរដ្ឋាភិបាលជប៉ុនកោះហៅ ដើម្បីធ្វើការតវ៉ាចំពោះដំណើរទស្សនកិច្ចរបស់លោកលី ម្យ៉ុងបាក់នេះ ហើយកិច្ចប្រជុំប្រចាំឆ្នាំរវាងរដ្ឋមន្រ្តីក្រសួងហិរញ្ញវត្ថុរបស់ប្រទេសទាំងពីរក៏ត្រូវបានលើកពេលដែរ។

នៅថ្ងៃសៅរ៍នេះ រដ្ឋមន្រ្តីក្រសួងការបរទេសជប៉ុនបានថ្លែងថា ជប៉ុនចាំបាច់ត្រូវតែពិចារណាចាត់វិធានការ ដើម្បីដោះស្រាយជម្លោះជាមួយកូរ៉េខាងត្បូងនេះ ដោយសន្តិវិធី ផ្អែកលើច្បាប់អន្តរជាតិ។ វិធានការដែលជប៉ុនកំពុងពិចារណានេះ ក៏រួមមាន ការដាក់ពាក្យបណ្តឹងទៅតុលាការយុត្តិធម៌អន្តរជាតិក្រុងឡាអេផងដែរ។

ក៏ប៉ុន្តែ ជប៉ុនទំនងជាពិបាកនឹងនាំយកជម្លោះនេះទៅតុលាការក្រុងឡាអេ ដោយសារថា បណ្តឹងទៅតុលាការនេះចាំបាច់ត្រូវតែមានការព្រមព្រៀងពីសំណាក់កូរ៉េខាងត្បូង ទើបតុលាការអាចលើកយកជម្លោះនេះទៅជំនុំជម្រះបាន។ កន្លងមក កាលពីក្នុងអំឡុងទសវត្សរ៍ទី៥០ និង៦០ ជប៉ុនក៏ធ្លាប់បានស្នើជាច្រើនលើកដែរមកហើយដែរ ឲ្យយកជម្លោះដណ្តើមកោះគ្នានេះទៅឲ្យតុលាការក្រុងឡាអេជាអ្នកកាត់ក្តី ក៏ប៉ុន្តែ កូរ៉េខាងត្បូងតែងតែបដិសេធសំណើនេះជានិច្ច។

គួរបញ្ជាក់ថា ប្រជុំកោះដុកដូ (ហៅតាមកូរ៉េ) ឬ តាកេស្ហ៊ីម៉ា (ហៅតាមជប៉ុន) មានទីតាំងស្ថិតនៅក្នុងសមុទ្រខាងកើត (ឬសមុទ្រជប៉ុន) មានចម្ងាយប្រហាក់ប្រហែលគ្នាពីឆ្នេរសមុទ្រកូរ៉េខាងត្បូង និងពីឆ្នេរសមុទ្ររបស់ជប៉ុន។ ចាប់តាំងពីឆ្នាំ១៩៥៤ រហូតមកទល់ពេលបច្ចុប្បន្ននេះ ប្រជុំកោះនេះស្ថិតក្រោមការកាន់កាប់របស់កូរ៉េខាងត្បូង។

ជប៉ុន និងកូរ៉េខាងត្បូង ដែលទាមទារដណ្តើមកម្មសិទ្ធិលើប្រជុំកោះដុកដូ ឬតាកេស្ហ៊ីម៉ានេះ គឺដោយសំអាងទៅលើកំណត់ត្រាប្រវត្តិសាស្រ្តតាំងពីសម័យនគរចិនទាំងបី (ឬសម័យសាមកុក)មកផង និងដោយមានការបកស្រាយខុសៗគ្នា ទៅលើសន្ធិសញ្ញាសន្តិភាពក្រោយសង្រ្គាមលោកលើកទី២ផង៕