ជប៉ុន -

អត្ថបទចុះផ្សាយនៅថ្ងៃ ចន្ទ 01 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 01 តុលា 2012

នាយករដ្ឋមន្រ្តីជប៉ុនរុះរើសមាសភាពរដ្ឋាភិបាល បញ្ចូលអ្នកនយោបាយស្និទ្ធិជាមួយចិន

លោកស្រីម៉ាគីកូ តាណាកា រដ្ឋមន្រ្តីក្រសួងអប់រំ ដែលទើបនឹងតែងតាំងថ្មី

REUTERS/Kim Kyung-Hoon

ដោយ សេង ឌីណា

លោកយ៉ូស្ហ៊ីហ៊ីកូ ណូដា (Yoshihiko Noda) នាយករដ្ឋមន្រ្តីជប៉ុន ដែលរដ្ឋាភិបាលរបស់លោកកំពុងតែធ្លាក់ប្រជាប្រិយភាពនោះ នៅថ្ងៃចន្ទនេះ បានសម្រេចរុះរើសមាសភាពគណៈរដ្ឋមន្រ្តីរបស់លោក ដើម្បីព្យាយាមស្តារប្រជាប្រិយភាពឡើងវិញ មុននឹងការបោះឆ្នោតជាតិមកដល់។ នៅក្នុងពេលដែលជម្លោះដែនដីវាងជប៉ុន និងចិន កំពុងតែកើនឡើងខ្លាំងនោះ គេឃើញមានឥស្សរជននយោបាយជប៉ុនម្នាក់ ដែលគេស្គាល់ថាមានទំនាក់ទំនងល្អជាមួយចិន ក៏ត្រូវបានលោកណូដា ដាក់បញ្ចូលក្នុងសមាសភាពរដ្ឋាភិបាលថ្មីនេះដែរ។

សេចក្តីរាយការណ៍របស់ សេង ឌីណា

ស្តាប់ (02:40)

01/10/2012

គឺជាការរុះរើគណៈរដ្ឋមន្រ្តី ដើម្បីផ្លាស់ប្តូរមុខមាត់ថ្មី ក្នុងគោលដៅស្តារប្រជាប្រិយភាព ក៏ប៉ុន្តែ ក្នុងពេលជាមួយគ្នារក្សានិរន្តរភាពរដ្ឋាភិបាល។ នេះគឺជាសេចក្តីសន្និដ្ឋានរួម នៃសមាសភាពរដ្ឋាភិបាលថ្មីរបស់លោកយ៉ូស្ហ៊ីហ៊ីកូ ណូដា។

គេសង្កេតឃើញថា រដ្ឋមន្រ្តីក្រសួងសំខាន់ៗមួយចំនួន ជាពិសេស ក្រសួងការបរទេស និងក្រសួងការពារជាតិ គឺត្រូវរក្សាទុកដដែល ក្នុងពេលដែលជប៉ុនកំពុងតែមានភាពតានតឹងផ្នែកការទូតជាមួយចិន ជុំវិញជម្លោះដណ្តើមកោះ។ ក៏ប៉ុន្តែ ទាក់ទងនឹងជម្លោះជាមួយចិននេះ គេមានការចាប់អារម្មណ៍ជាពិសេស ទៅលើសមាជិកម្នាក់ ក្នុងរដ្ឋាភិបាលថ្មីរបស់លោកណូដា គឺលោកស្រី ម៉ាគីកូ តាណាកា (Makiko Tanaka)។

លោកស្រី ម៉ាគីកូ តាណាកា គឺជាកូនស្រីរបស់លោកតាណាកា អតីតនាយករដ្ឋមន្រ្តីជប៉ុន ដែលបានចងភ្ជាប់ទំនាក់ទំនងការទូតជាមួយចិន កាលពី៤០ឆ្នាំមុន ហើយបច្ចុប្បន្ននេះ ត្រកូលតាណាកាត្រូវបានគេស្គាល់ជាទូទៅថាមានទំនាក់ទំនងល្អជាមួយចិន ហើយខាងភាគីចិន ក៏មានការគោរពចំពោះក្រុមគ្រួសារតាណាកានេះដែរ។ ហេតុដូច្នេះហើយបានជាក្រុមអ្នកវិភាគជាទូទៅយល់ថា ការដែលលោកណូដាតែងតាំងលោកស្រីតាណាកាក្នុងសមាសភាពរដ្ឋាភិបាលថ្មី នៅពេលនេះ គឺក្នុងគោលបំណងបន្ធូរបន្ថយភាពតានតឹងជាមួយចិន។

ជាការពិត គឺដូចជាលោកណូដាខ្លួនលោកផ្ទាល់បានថ្លែងប្រាប់អ្នកសារព័ត៌មានដែរថា លោកស្រីតាណាកា ត្រូវតែងតាំងជារដ្ឋមន្រ្តីក្រសួងអប់រំ មិនមែនជារដ្ឋមន្រ្តីការបរទេសនោះទេ។ ដូច្នេះ ការតែងតាំងលោកស្រីតាណាកា មិនមានអ្វីជាប់ពាក់ព័ន្ធនឹងជម្លោះជាមួយចិននោះទេ។ ក៏ប៉ុន្តែ សាស្រ្តាចារ្យផ្នែកខាងវិទ្យាសាស្រ្តនយោបាយនៅសកលវិទ្យាល័យ ជប៉ុនបានអះអាងថា មិនថាលោកនាយករដ្ឋមន្រ្តីណូដា និយាយដោះសារបែបណានោះទេ ការតែងតាំងលោកស្រីតាណាកា ទៅក្នុងរដ្ឋាភិបាលនៅពេលនេះ គឺប្រាកដធ្វើឡើង ដើម្បីជាសារមួយទៅកាន់ចិនថា ជប៉ុនមានឆន្ទៈសម្របសម្រួល បន្ធូរបន្ថយភាពតានតឹងជាមួយចិន។ ក្នុងឋានៈជារដ្ឋមន្រ្តីក្រសួងអប់រំ ថ្វីដ្បិតតែមិនមានទំនាក់ទំនងដោយផ្ទាល់ជាមួយចិន ដូចជា រដ្ឋមន្រ្តីក្រងការបរទេស ក៏ប៉ុន្តែ លោកស្រីតាណាកា នៅតែអាចជួយដោយប្រយោល ក្នុងស្តារទំនាក់ទំនងជាមួយចិនឡើងវិញ ដូចជា តាមរយៈកម្មវិធីដោះដូរសិស្សនិស្សិត ឬកិច្ចសហប្រតិបត្តិការផ្នែកវប្បធម៌ ជាដើម។

គួររំឭកឡើងវិញផងដែរថា លោកយ៉ាស្ហ៊ីហ៊ីកូ ណូដា ធ្លាប់បានសន្យានាពេលថ្មីៗនេះថា លោកនឹងរៀបចំបោះឆ្នោតជាតិសាជាថ្មី នៅក្នុងពេលឆាប់ៗខាងមុខនេះ។ ក៏ប៉ុន្តែ ការស្ទាបស្ទង់មតិជាច្រើនបង្ហាញថា នៅពេលនេះ គណបក្សរបស់លោកណូដា កំពុងតែបាត់បង់ប្រជាប្រិយភាពខ្លាំង ដែលអាចនឹងត្រូវបាត់បង់អំណាចទៅក្នុងដៃគណបក្សប្រឆាំង គឺគណបក្សអភិរក្សនិយម LDP ដែលធ្លាប់កាន់អំណាចនៅជប៉ុនរាប់ទសវត្សរ៍ នាពេលកន្លងមក។ កាលពីសប្តាហ៍មុននេះ គណបក្ស LDP ទើបនឹងបានជ្រើសរើស លោកស្ហ៊ីនហ្សូ អាបេ (Shinzo Abe) អតីតនាយករដ្ឋមន្រ្តីជប៉ុន ឲ្យមកធ្វើជាប្រធាន ហើយលោកស្ហ៊ីនហ្សូ អាបេ ទំនងជាឈរឈ្មោះជាបេក្ខជននាយករដ្ឋមន្រ្តី ដើម្បីប្រជែងជាមួយគណបក្សរបស់លោកណូដា ក្នុងការបោះឆ្នោតខាងមុខ៕

tags: ជប៉ុន