ក្រុមហ៊ុនជប៉ុនវិនិយោគសម្រាប់យុវជនជំនាន់ថ្មីរបស់កម្ពុជា
ក្រុមហ៊ុនជប៉ុនឈ្មោះអ៊ីអន AEON បានសម្រេចបើកការដ្ឋានសាងសង់ផ្សារទំនើបអន្តរជាតិ តម្លៃ២០០លានដុល្លារ នៅព្រឹកថ្ងៃចន្ទទី១០ធ្នូនេះ ដោយមានការចូលរួមពីលោកនាយករដ្ឋមន្ត្រីហ៊ុន សែន។ តំណាងក្រុមហ៊ុនអ៊ីអន AEON បានថ្លែង នៅក្នុងសន្និសីទសារព័ត៌មាន នៅរសៀលថ្ងៃនេះថា សន្តិសុខ និងកំណើនសេដ្ឋកិច្ចនៅកម្ពុជា បានទាញចំណាប់អារម្មណ៍របស់ក្រុមហ៊ុនខ្លួនអោយបោះទុននៅកម្ពុជា ហើយថា ក្រុមគោលដៅនៃអតិថិជនរបស់ផ្សារជប៉ុនខ្នាតអន្តរជាតិមួយនេះ គឺក្រុមគ្រួសារយុវជនសម័យថ្មី។
ចុះផ្សាយនៅថ្ងៃ៖
ស្តាប់ - ០១:៥៤
ការដ្ឋានសាងសង់ផ្សារទំនើបអន្តរជាតិរបស់ក្រុមហ៊ុនជប៉ុនអ៊ីអន AEON បានចាប់ផ្តើមហើយ នៅថ្ងៃចន្ទនេះ ជាមួយនឹងវត្តមានរបស់ប្រមុខរដ្ឋាភិបាលកម្ពុជា លោក ហ៊ុន សែន។ ជាក្រុមហ៊ុនផ្សារទំនើបអន្តរជាតិរបស់ជប៉ុនទីមួយ នៅក្នុងប្រទេសកម្ពុជាដែលមានតម្លៃទុនប្រមាណ២០០លានដុល្លារ ហើយដែលនឹងបើកអោយដំណើរការ នៅដើមឆ្នាំ២០១៤។
នៅពេលដែលអគារផ្សារទំនើបមួយចំនួនហាក់មិនបានទទួលជោគជ័យ ក្នុងការទាក់ទាញអតិថិជនកម្ពុជាអោយចូលទៅចាយលុយ និងទិញទំនិញ នៅក្នុងផ្សារទំនើបទាំងនោះ ថ្នាក់ដឹកនាំរបស់ក្រុមហ៊ុនជប៉ុន AEON បានពន្យល់ថា ក្រុមហ៊ុននេះមានគោលដៅអតិថិជនច្បាស់លាស់។ គឺក្រុមមនុស្សដែលមានជីវភាពថ្នាក់កណ្តាលដែលជាមនុស្សសម័យថ្មីអាយុ ពី២០ឆ្នាំឡើងទៅ។
អគ្គនាយកក្រុមហ៊ុន AEON លោក Shinobu Washizawa បានថ្លែងនៅក្នុងសន្និសីតកាសែតដែលមានអ្នកកាសែតខ្មែរនិងជប៉ុន ជាច្រើនចូលរួមផងដែរថា អតិថិជនគោលដៅចំបងរបស់ផ្សារទំនើប AEON គឺក្រុមគ្រួសារវ័យក្មេងដែលតំណាងអោយ៤០ភាគរយនៃប្រជាជនកម្ពុជាសរុប។ ក្រុមមនុស្សនេះហើយដែលនឹងចាប់យករបៀបរស់នៅបែបសម័យថ្មី។
ប្រធានអគ្គនាយកក្រុមហ៊ុន AEON លោក Motoya Okada បានពន្យល់ថា ប្រសិនបើក្រុមហ៊ុនរបស់លោកបានសម្រេចចិត្តដាក់ទុននៅក្នុងប្រទេសកម្ពុជា ក៏ព្រោះតែកម្ពុជាមានស្ថិរភាព សន្តិសុខ និងកំណើនសេដ្ឋកិច្ច។ នៅក្នុងពិធីសម្ពោធការដ្ឋានសាងសង់ផ្សារទំនើប លោកនាយករដ្ឋមន្ត្រីហ៊ុន សែនបានប្រាប់អោយដឹងថា ផ្សារទំនើបជប៉ុនមួយនេះនឹងប្រើបុគ្គលិកជាង២០០០នាក់ ដែលនឹងផ្តល់ឱកាសច្រើនដល់យុវជនខ្មែរ។
ផ្សារទំនើបអន្តរជាតិទីមួយមិនទាន់ប្រាកដទេថា នឹងមានដំណើរយ៉ាងណាផង ប្រធានអគ្គនាយកក្រុមហ៊ុន AEON បានប្រកាសថា ក្រុមហ៊ុនរបស់លោកក៏មានគម្រោងសាងសង់ផ្សារទំនើបទី២ទៀតដែរ ដែលអាចស្ថិតនៅតំបន់ជាយក្រុង។
គួររំលឹកដែរថា ហាងទំនិញដែលមានម៉ាកល្បីៗប្រហែល១៥០ហាង នឹងមានវត្តមាននៅក្នុងផ្សារជប៉ុននេះ។ ហាងទំនិញទាំងនោះនឹងលក់ផលិតផលជប៉ុន ខ្មែរ និងបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ