នយោបាយសេដ្ឋកិច្ចជប៉ុនបង្កឲ្យមានការបារម្ភខ្លាចផ្ទុះ “សង្រ្គាមរូបិយវត្ថុ”
នយោបាយសេដ្ឋកិច្ចនៃរដ្ឋាភិបាលរបស់លោកស្ហ៊ីនហ្សូ អាបេ បានក្លាយជាប្រធានបទដ៏ក្តៅមួយ នៅក្នុងវេទិកាសេដ្ឋកិច្ចពិភពលោក នៅដាវ៉ូស (Davos World Economic Forum) ប្រទេសស្វ៊ីស ប៉ុន្មានថ្ងៃចុងក្រោយនេះ។ ប្រទេសមហាអំណាចសេដ្ឋកិច្ចមួយចំនួន បានរិះគន់នយោបាយសេដ្ឋកិច្ចជប៉ុន ដែលកំពុងតែធ្វើឲ្យតម្លៃលុយយេនធ្លាក់ថ្លៃ ដើម្បីជំរុញការនាំចេញ ក៏ប៉ុន្តែ អាចធ្វើឲ្យប៉ះពាល់ដល់វិស័យនាំចេញរបស់ប្រទេសផ្សេង។
ចុះផ្សាយនៅថ្ងៃ៖
ស្តាប់ - ០២:២៧
ចាប់តាំងពីជាប់ឆ្នោត ឡើងកាន់អំណាចមក រដ្ឋាភិបាលរបស់លោកស្ហ៊ីនហ្សូ អាបេ បានព្យាយាមជំរុញ និងដាក់សម្ពាធ លើធនាគារកណ្តាលជប៉ុន ឲ្យចាត់វិធានការ ដើម្បីបង្កើនអត្រាអតិផរណា និងជំរុញកំណើនសេដ្ឋកិច្ចជប៉ុន ដែលកំពុងធ្លាក់ដុនដាបក្នុងវិបត្តិ។
កាលពីថ្ងៃអង្គារ ធនាគារកណ្តាលជប៉ុនក៏បានប្រកាស កំណត់គោលដៅអត្រាអតិផរណាប្រចាំឆ្នាំ ២% ទៅតាមការចង់បានរបស់រដ្ឋាភិបាល ព្រមទាំងដាក់ចេញនូវកម្មវិធីទិញមូលបត្រពីស្ថាប័នហិរញ្ញវត្ថុឯកជន (ឬនិយាយដោយសង្ខេប គឺបោះពុម្ពលុយ) ហើយធ្វើក្នុងទ្រង់ទ្រាយធំ។
ទាំងនេះបានបង្កឲ្យមានការរិះគន់យ៉ាងច្រើនថា ធនាគារកណ្តាលជប៉ុនដាក់ចេញនយោបាយរូបិយវត្ថុ ទៅតាមការទាមទារចង់បានរបស់រដ្ឋាភិបាល ដែលធ្វើឲ្យធនាគារកណ្តាលបាត់បង់នូវឯករាជ្យ។ ម្យ៉ាងវិញទៀត នយោបាយសេដ្ឋកិច្ចថ្មីរបស់ជប៉ុននេះ កំពុងតែធ្វើឲ្យលុយយេនចេះតែធ្លាក់ថ្លៃឥតឈប់ឈរ ធៀបនឹងលុយបរទេសផ្សេងទៀត ដែលជាហេតុបណ្តាលឲ្យមានការព្រួយបារម្ភ ពីប្រទេសមួយចំនួនថា ជប៉ុនកំពុងតែអនុវត្តនយោបាយសេដ្ឋកិច្ច “ជាន់ពន្លិចគេ ដើម្បីឲ្យខ្លួនឯងរស់”។
ការរិះគន់ខ្លាំងៗជាងគេ គឺចេញពីលោកស្រីអង់ហ្កេឡា មែរកិល ប្រមុខរដ្ឋាភិបាលអាល្លឺម៉ង់ ដែលបានថ្លែងនៅក្នុងវេទិកាសេដ្ឋកិច្ចពិភពលោកដាវ៉ូសថា វិធានការរបស់ជប៉ុននៅពេលនេះ គឺអាចរាប់ថាជាការលូកដៃរបស់រដ្ឋាភិបាល ចូលធ្វើអន្តរាគមន៍ទៅលើអត្រាប្តូរប្រាក់ ហើយថា ការដាក់ចេញនូវនយោបាយបែបនេះមិនអាចលាក់បាំងពីភ្នែកអ្នកដទៃបានទេ។
លោកតារ៉ូ អាសូ (Taro Aso) រដ្ឋមន្រ្តីក្រសួងសេដ្ឋកិច្ចជប៉ុន ដែលមានវត្តមាននៅដាវ៉ូសដែរនោះ បានបញ្ចេញប្រតិកម្មតបមកវិញទាំងកំហឹង ដោយថ្លែងប្រាប់អ្នកសារព័ត៌មានថា ការរិះគន់មកលើនយោបាយសេដ្ឋកិច្ចជប៉ុននេះ បានធ្វើឡើងដោយគ្មានហេតុផល។
រដ្ឋាភិបាលជប៉ុនក៏បានអះអាងផងដែរថា គោលដៅអតិផរណា ដែលធនាគារកណ្តាលជប៉ុនកំណត់ កាលពីថ្ងៃអង្គារកន្លងទៅនេះ ថ្វីដ្បិតតែមើលទៅ គឺដូចនឹងអ្វី ដែលរដ្ឋាភិបាលជប៉ុនចង់បាន ក៏ប៉ុន្តែ ធនាគារកណ្តាលជប៉ុនជាអ្នកស្ម័គ្រចិត្តសម្រេចដោយខ្លួនឯង មិនមែនធ្វើទៅតាមការបញ្ជាពីរដ្ឋាភិបាលនោះទេ។ ចំណែកទាក់ទងនឹងរឿងលុយយេនដែលធ្លាក់ថ្លៃឥតឈប់ឈរនោះ មន្រ្តីរដ្ឋាភិបាលជប៉ុនបានបដិសេធមិនធ្វើអត្ថាធិប្បាយអ្វីទាំងអស់។
ការធ្វើអត្ថាធិប្បាយ ការរិះគន់ ទិតៀនគ្នា ជុំវិញនយោបាយរូបិយវត្ថុជប៉ុន នៅក្នុងវេទិកាសេដ្ឋកិច្ចដាវ៉ូស នៅពេលនេះ បានធ្វើឲ្យអ្នកសង្កេតការណ៍មួយចំនួន មានការបារម្ភខ្លាចផ្ទុះទៅជា “សង្រ្គាមរូបិយវត្ថុ” មានន័យថា ប្រទេសមួយធ្វើអន្តរាគមន៍បញ្ចុះលុយជាតិរបស់ខ្លួន ដើម្បីជំរុញការនាំចេញ ក៏ប៉ុន្តែ វាធ្វើឲ្យប៉ះពាល់ទៅដល់វិស័យនាំចេញរបស់ប្រទេសផ្សេងៗទៀត ដែលជាគូប្រជែង ហើយប្រទេសទាំងនោះក៏នាំគ្នាធ្វើអន្តរាគមន៍បញ្ចុះលុយជាតិរបស់គេរៀងៗខ្លួនដែរ។
ការយកអត្រាប្តូប្រាក់ធ្វើជាអាវុធ ក្នុងការប្រកួតប្រជែងពាណិជ្ជកម្មអន្តរជាតិបែបនេះ គឺជាសេណារីយ៉ូដ៏គ្រោះថ្នាក់មួយ ដែលគេធ្លាប់ជួបប្រទះរួចហើយ ជាពិសេស កាលពីទសវត្សរ៍ឆ្នាំ ១៩៣០ ដែលបណ្តាលឲ្យមានការខូចខាតយ៉ាងធ្ងន់ធ្ងរដល់សេដ្ឋកិច្ចពិភពលោក ហើយដែលគេមិនចង់ឲ្យកើតមានសាជាថ្មីទៀត នៅពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ