ចិនចេញផ្សាយសៀវភៅសារភាពរបស់ទាហានជប៉ុនដើម្បីរំលឹកនយោបាយកងទ័ពជប៉ុននៅក្នុងអតីតកាល
ក្រសួងការពារជាតិជប៉ុន នៅថ្ងៃសុក្រទី ២៩ សីហា បានស្នើសុំកញ្ចប់ថវិកាបន្ថែមសម្រាប់ជំរុញវិស័យការពារជាតិ នៅចំពោះមុខការបង្កើនសកម្មភាពយោធាឥតឈប់ឈររបស់ចិន នៅសមុទ្រចិនខាងកើត ជាទី ដែលជប៉ុន និងចិនឈ្លោះគ្នា ដណ្តើមគ្រប់គ្រងប្រជុំកោះសេនកាគូរ ដែលចិនហៅថា ទៀវយូ។ ទីក្រុងប៉េកាំងវិញបានរំលឹកជប៉ុនឲ្យនឹកទៅដល់អតីតកាលដ៏សោកនាដកម្មដែលបង្កឡើងដោយកងទ័ពជប៉ុន នៅក្នុងប្រទេសចិន និងនៅតំបន់អាស៊ី នៅសម័យសង្រ្គាមលោកលើកទីពីរ។
ចុះផ្សាយនៅថ្ងៃ៖
ស្តាប់ - ០២:០៧
កាលពីថ្ងៃព្រហស្បតិ៍ទី ២៨សីហា ក្រសួងគមនាគមន៍ជប៉ុនទើបបានស្នើសុំដំឡើងថវិកាទ្វេដងទៅរដ្ឋាភិបាល ដើម្បីអាចបំពាក់សម្ភារៈ និងពង្រឹងសមត្ថភាពឆ្មាំសមុទ្រដែលមានតួនាទីយាមការពារប្រជុំកោះសេនកាគូ ដែលជប៉ុនបានទិញចូលជាសម្បត្តិជាតិ កាលពីឆ្នាំ ២០១២ ប៉ុន្តែ ដែលចិនទាមទារគ្រប់គ្រងជាម្ចាស់ នៅក្រោមឈ្មោះប្រជុំកោះទៀវយូ។
នៅថ្ងៃសុក្រនេះវិញ ក្រសួងការពារជាតិជប៉ុនក៏បានដាក់ពាក្យស្នើសុំបន្ថែមថវិកា ប្រមាណ៤៨ពាន់លានដុល្លារ សម្រាប់ឆ្នាំក្រោយ ដើម្បីធ្វើទំនើបកម្មវិស័យការពារ ដោយផ្តោតសំខាន់ទៅលើយុទ្ធសាស្រ្តការពារបណ្តាកោះដែលស្ថិតនៅភាគខាងត្បូងជប៉ុន (លាតសន្ធឹងពីកោះគ្យូស៊ូ ទៅជិតកោះតៃវ៉ាន់)។ ក្រសួងការពារជប៉ុនចង់បានយន្តហោះ Ospreay យន្តហោះកូនកាត់ ដែលហោះលឿនដូចយន្តហោះ ប៉ុន្តែ អាចចុះចតលឿនដូចឧទ្ធម្ភាគចក្រ យន្តហោះដ្រូន និងយន្តហោះចម្បាំង៦គ្រឿងដើម្បីយាមការពារដែនសមុទ្រជប៉ុន។
ប្រសិនបើរដ្ឋាភិបាលយល់ព្រមតាមការស្នើសុំរបស់ក្រសួងការពារជាតិ នោះជាលើកទីបីដែលក្រសួងមួយនេះនឹងបានទទួលការដំឡើងថវិកាជាបន្តបន្ទាប់ នៅក្នុងក្របខ័ណ្ឌនយោបាយពង្រឹងវិស័យការពារជាតិរបស់លោកស្ហីនហ្សូ អាបេ (២៣១ពាន់លានដុល្លារពីឆ្នាំ ២០១៤ ដល់ឆ្នាំ ២០១៩)។ តាមរដ្ឋាភិបាលលោកអាបេ ជប៉ុនត្រូវពង្រឹងវិស័យកងទ័ពដើម្បីទប់ទល់នឹងការគំរាមកំហែងរបស់ចិន ដែលបានបង្កើនថវិកាកងទ័ពមិនឈប់ឈរ។
ចិន និងជប៉ុនបានប្រឈមមុខដាក់គ្នាកាន់តែខ្លាំង ដោយសារជម្លោះប្រជុំកោះសេនកាគូ និងដោយសារស្លាកស្នាមប្រវត្តិសាស្រ្ត ដែលប្រទេសទាំងពីរមានជាមួយគ្នា។ កាលពីថ្ងៃព្រហស្បតិ៍ ទីក្រុងប៉េកាំងទើបបានចេញផ្សាយកម្រងឯកសារសារភាពរបស់ទាហានជប៉ុន៤៥នាក់ដែលតុលាការចិនបានចាប់ និងកាត់ទោសជាឧក្រិដ្ឋជនសង្រ្គាម នៅក្រោយជប៉ុនចាញ់សង្រ្គាមលោកលើកទីពីរ។ ចាប់តំាងពីដើមខែកក្កដា រដ្ឋបាលបណ្ណសារជាតិចិនបានចេញផ្សាយឯកសារសារភាពរបស់ទាហានជប៉ុនជារៀងរាល់ថ្ងៃ នៅលើទំព័រអ៊ិនធ័រណេត។ តាមទីភ្នាក់ងារចិនថ្មី សេចក្តីសារភាពរបស់ឧក្រិដ្ឋជនសង្រ្គាមជប៉ុនដែលមានប្រមាណ៦ពាន់ទំព័រ និងដែលនិយាយពីសកម្មភាពសម្លាប់ និងដុតផ្ទះប្រជាជនចិន ត្រូវបានចងក្រងជាសៀវភៅ ដើម្បីរំលឹកឲ្យគេចងចាំពីនយោបាយកងទ័ពរបស់ទីក្រុងតូក្យូ នៅក្នុងអតីតកាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ