អតីតនាយករដ្ឋមន្ត្រីអ៊ីតាលីអនុវត្តទោសនៅមជ្ឈមណ្ឌលថែទាំមនុស្សចាស់ជរា
នៅទីបំផុត តុលាការអ៊ីតាលីបានសម្រេចឱ្យលោក ប៊ែរលូស្កូនី អតីតនាយករដ្ឋមន្ត្រីអ៊ីតាលី អនុវត្តទោស ទៅបំរើការងារជាប្រយោជន៍សង្គមនៅក្នុងមជ្ឈមណ្ឌលថែទាំមនុស្សចាស់ រយៈពេលមួយឆ្នាំ ជំនួសទោសជាប់ពន្ធនាគារ។ លោក ប៊ែរលូស្កូនី ដែលត្រូវបានតុលាការកាត់ទោស កាលពីខែសីហា២០១៣ ឱ្យជាប់ពន្ធនាគារបួនឆ្នាំពីបទគេចពន្ធ។
ចុះផ្សាយនៅថ្ងៃ៖
ស្តាប់ - ០១:២៤
អតីតនាយករដ្ឋមន្ត្រី អ៊ីតាលី បានជាប់ក្តីក្តាំក្នុងសំណុំរឿងជាច្រើន (រឿងអាស្រូវស្រីញី ពុករលួយ និងគេចពន្ធ) អស់ជាច្រើនខែឆ្នាំ តែនៅពេលនេះដោយសារវ័យចំណាស់ជ្រុល (៧៧ឆ្នាំ) សាលក្រមចុងក្រោយបានសម្រេចមិនបញ្ជូនអ្នកទោសជាអតីតនាយករដ្ឋមន្ត្រីអ៊ីតាលីទៅកាន់ពន្ធនាគារទេ។
មេធាវីរបស់កូនក្តីរូបនេះ បានស្នើសុំសម្រាលទោសត្រឹមធ្វើការជាប្រយោជន៍សាធារណៈ ជាជាងការជាប់ឃុំឃាំងនៅក្នុងគេហដ្ឋាន ដែលអាចបិទខ្ទប់សេរីភាពក្នុងការដើរហើរឬចូលរួមប្រជុំនយោបាយផ្សេងទេ។
ទីបំផុតតុលាការបានអារកាត់សេចក្តីបញ្ជូនលោក ប៊ែរលូស្កូនី ទៅធ្វើការនៅមជ្ឈមណ្ឌលជនពិការនិងមនុស្សចាស់ជរា មួយសប្តាហ៍ម្តង រយៈពេលបួនម៉ោងជាប់គ្នាដើម្បីថៃមនុស្សដែលមិនអាចធ្វើការដោយខ្លួនឯងបាន។ ប៉ុន្តែអតីតប្រមុខរដ្ឋាភិបាលអ៊ីតាលី និងជាមនុស្សដ៏មានឥទ្ធិពលម្នាក់នេះ មិនអាចចាកចេញពីក្រុងមីឡង់ ដែលលោកស្នាក់នៅបានឡើយ ហើយក៏គ្មាននសិទ្ធិឈរឈ្មោះឱ្យគេបោះឆ្នោត ឬធ្វើកិច្ចការសាធារណៈណាមួយបានទេ។
មេធាវីរបស់លោកបានសម្តែងការពេញចិត្តយ៉ាងខ្លាំងចំពោះសាកក្រមនេះ ព្រោះកូនក្តីនៅអាចបំពេញសកម្មភាពឃោសនានយោបាយបាន។ សម្រាប់បណ្តាជនអ៊ីតាលីទូទៅភាគច្រើនវិញ នេះគឺជាទោសដ៏ស្រាល មិនសក្តិសមនឹងទោសពៃរ៍ដែលលោក ប៊ែរលូស្កូនីបានប្រព្រឹត្តសោះ ព្រោះប្រសិនបើជាពលរដ្ឋសាមញ្ញធម្មតា កំហុសស្រាលជាលួចពន្ធដាររដ្ឋផង ក៏នឹងត្រូវបញ្ជូនចូលគុកបាត់ទៅហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ