អ៊ីស្រាអែល-លីបង់ -

អត្ថបទចុះផ្សាយនៅថ្ងៃ សុក្រ 12 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 12 តុលា 2012

អ៊ីស្រាអែលបាញ់ធ្លាក់យន្តហោះដ្រូនរបស់ចលនាហេបូឡាលីបង់

ប្រមុខដឹកនាំចលនាហេបូឡាលីបង់,លោក Hassan Nasrallah ធ្វើអន្តរាគមន៍ផ្ទាល់នៅតាមបណ្តាញទូរទស្សន៍នៃចលនារបស់ខ្លួន

REUTERS/Manar TV via Reuters Tv

ដោយ នុយ ប៊ែរណាដែត

យន្តហោះដ្រូនគ្មានមនុស្សបើកបរបាញ់ធ្លាក់កាលពីថ្ងៃសៅរ៍មុននៅក្នុងទឹកដីអ៊ីស្រាអែល ពិតជាយន្តហោះរបស់ចលនាអ៊ីស្លាមស៊ីអីតលីបង់ហេបូឡា។ លោក Hassan Nasrallah អគ្គលេខាធិការនៃចលនាលីបង់ បានប្រកាសទទួលស្គាល់ប្រតិបត្តិការយន្តហោះដ្រូនថាជារបស់ខ្លួនមែនដូចតាមការចោទប្រកាន់របស់នាយករដ្ឋមន្ត្រីអ៊ីស្រាអែល លោកBenyamin Netanyahu។ យន្តហោះដ្រូន បានហោះពីលើតំបន់យុទ្ធសាស្រ្ត ជាអាទិ៍នៅមជ្ឈមណ្ឌលនុយក្លេអ៊ែរនៅ Dimouna, ប៉ែកខាងត្បូងប្រទេសអ៊ីស្រាអ៊ែល ។

សេចក្តីរាយការណ៍របស់ នុយ ប៊ែរណាដែត

ស្តាប់ (02:14)

12/10/2012 by នុយ ប៊ែរណាដែត

កាលពីថ្ងៃសៅរ៍មុន យន្តហោះដ្រូនគ្មានមនុស្សបើកបរ របស់ចលនាហេហូឡាលីបង់ បានហោះចេញពីភាគខាងត្បូងប្រទេសលីបង់ និងតម្រង់ឆ្ពោះទៅកាន់អ៊ីស្រាអែល។ យោងតាមការបញ្ជាក់របស់ចលនាលីបង់ហេបូឡា ផ្លូវដែលយន្តហោះដ្រូនបើកបរ មានទិសដៅយ៉ាងច្បាស់លាស់និង ស្ថិតនៅឆ្ងាយពីតំបន់ឆ្នេរសមុទ្រជាច្រើនរយគីឡូម៉ែត្រ ដើម្បីកុំឲ្យអ៊ីស្រាអែលចាប់ដានបាន មុននឹងហោះចូលក្នុងដែនអាកាសអ៊ីស្រាអែល។

លោក Hassan Nasrallah ប្រមុខនៃចលនាតស៊ូលីបង់ បានគូសបញ្ជាក់ទៀតថា “គោលដៅនៃប្រតិបត្តិការយន្តហោះដ្រូន គឺត្រូវធ្វើឡើងនៅលើតំបន់យុទ្ធសាស្ត្រសំខាន់ៗ “និងក៏ជាលើកទីមួយដែរនៅក្នុងប្រវត្តិសាស្រ្តនៃចលនាតស៊ូលីបង់ ក្នុងការប្រើប្រាស់យន្តហោះធុននេះ”។ " យន្តហោះបានបើកចូលយ៉ាងជ្រៅទៅក្នុងដែនដីប៉ាលេស្ទីនដែលកាន់កាប់ដោយអ៊ីស្រាអែល” និងបានហោះពីលើតំបន់នានាដែលស្ថិតនៅជិត មជ្ឍមណ្ឌលនុយក្លែរនៅ Dimouna។

យន្តហោះដ្រូនគ្មានមនុស្សបើកបរនេះ ដែលមានបច្ចេកវិជា្ជអ៊ីរ៉ង់និងតម្លើងនៅប្រទេសលីបង់ ត្រូវ បានកងទ័ពអ៊ីស្រាអែល ស្ទាក់ស្កាត់បានយ៉ាងឆាប់រហ័ស មុននឹងបាញ់ទម្លាក់។ ក៏ប៉ុន្តែ ចំពោះប្រមុខនៃចលនាតស៊ូលីបង់ Hassan Nasrallah ប្រតិបត្តិការនេះ បញ្ជាក់ឲ្យដឹងដែរពីកំរិតសមត្ថភាពនៃកងទ័ពអ៊ីស្រាអែល។ អ៊ីស្រាអែល ដែលបានអួតអាងថា ពួកគេ ចាប់ដានយន្តហោះដ្រូនបាន នៅខណៈដែលយន្តហោះ ស្ថិតនៅចម្ងាយយ៉ាងឆ្ងាយពីតំបន់ឆ្នេរសមុទ្រ តែ បានទុកបណ្តោយឲ្យហោះឆ្លងចូលបានក្នុងដែនដីកាន់កាប់ប៉ាលេស្ទីន-នេះជាការគូសបញ្ជាក់របស់លោក Hassan Nasrallah ដោយបានបន្ថែមទៀតថា "អ៊ីស្រាអែល កំពុងតែនិយាយភូតកុហក់ប្រជាជនខ្លួនហើយនៅពេលនេះ។ ពីអំណេះតទៅ យើង ក៏ប្រហែលជាអាចនឹង ទប់ទល់បាន ជាមួយនឹងប្រព័ន្ធការពារដ៏ទំនើបបំផុតរបស់អ៊ីស្រាអែលដែរ"។

ប្រមុខនៃចលនាហេបូឡា បានសំណូមពរផងដែរដល់សហគមន៍អន្តរជាតិ សុំកុំឲ្យចាត់ទុកទង្វើរបស់ខ្លួននេះ ថាជាការឈ្លានពាន និងបានពន្យល់ដែរថា « ចាប់តាំងពីឆ្នាំ ២០០៦ មក ប្រទេសអ៊ីស្រាអែល ប្រហែលជាបានហោះរំលោភលើដែនអាកាសលីបង់ ប្រមាណជា ២ម៉ឺនលើកដែរ៕