អ៊ីស្រាអែលសម្លាប់មេទាហានហាម៉ាស៣នាក់
ក្នុងប្រតិបត្តិការតាមប្រម៉ាញ់មេក្រុមហាម៉ាសធំៗ អ៊ីស្រាអែលបានទំលាក់គ្រាប់មីស៊ីលជាច្រើនគ្រាប់ នៅតំបន់ហ្គាហ្សា និងដែនដីរ៉ាហ្វាប៉ាឡេស្ទីន កាលពីថ្ងៃព្រហស្បតិ៍។ តាមការរាយការណ៍របស់យោធាអ៊ីស្រាអែល ប្រតិបត្តិការនេះបានសម្លាប់មេទាហានហាម៉ាសបីនាក់។ ទន្ទឹមគ្នានេះដែរ បារាំង អង់គ្លេស និង អាល្លឺម៉ង់ កំពុងរៀបចំរកដំណោះស្រាយរួមមួយ ដើម្បីដាក់ស្នើឲ្យក្រុមប្រឹក្សាសន្តិសុខអង្គការសហប្រជាជាតិសម្រេច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
កាលពីថ្ងៃព្រហ្បតិ៍ទី២១សីហា មានគ្រាប់មីស៊ីលយ៉ាងហោចណាស់៩គ្រាប់ ដែលអ៊ីស្រាអែលបានបាញ់ទំលាក់លើតំបន់ហ្គាហ្សា និងតំបន់រ៉ាហ្វា ភាគខាងត្បូងជាប់ព្រំដែនអេហ្ស៊ីប។ នេះជាប្រតិបត្តិការតាមប្រម៉ាញ់មេក្រុមទាហានហាម៉ាស ដែលអ៊ីស្រាអែលហៅថាជាមេក្រុមភេរវករ។ ក្នុងប្រតិបត្តិការនេះ ទាហានអ៊ីស្រាអែលបានសម្លាប់បានមេភេរវករហាម៉ាសសំខាន់ៗបីនាក់ ដែលក្នុងនោះមានម្នាក់ជាមេគំនិត ក្នុងការកសាងប្រព័ន្ធរូងក្រោមដីនៅតំបន់ហ្គាហ្សា។ ទន្ទឹមគ្នានេះ ក៏មានប្រជាជនស៊ីវីលប៉ាឡេស្ទីនជាង៣០នាក់ បានស្លាប់ផងដែរ។
យោធាអ៊ីស្រាអែលបានអបអរសាទរជំពោះជោគជ័យនេះ ហើយថានឹងបន្តបេសកកម្មប្រម៉ាញ់តទៅទៀង ព្រោះថានៅមានមេធំហាម៉ាសម្នាក់ទៀត ដែលអ៊ីស្រាអែលកំពុងតាមសម្លាប់។ លោកនាយករដ្ឋមន្ត្រីអ៊ីស្រាអែល បាននិយាយថា ការតាមប្រម៉ាញ់ពួកមេក្លោងភេរវករ គឺជាការត្រឹមត្រូវ ហើយថាអ៊ីស្រាអែល នឹងនៅតែបន្តបេសកកម្មនេះ ទោះជាយូរប៉ុណ្ណាក៏ដោយ។ចំណែកប្រជាជនប៉ាឡេស្ទីនវិញ មានការក្រេវក្រោធកាន់តែខ្លាំងឡើង ចំពោះការវាយប្រហាររបស់អ៊ីស្រាអែល។ ពួកហាម៉ាសបានចាប់ខ្លួនមនុស្សជាច្រើននាក់ ដោយសង្ស័យថាជារនុកក្នុង ក្បត់ពួកហាម៉ាស លួចផ្តល់ពត៌មានពីទីតាំងជំរកមេទាហានហាម៉ាស ឲ្យអ៊ីស្រាអែល។ អ្នកនាំពាក្យក្រុមហាម៉ាសថា អ៊ីស្រាអែលត្រូវតែសងវិញនូវអ្វីដែលខ្លួនបានធ្វើ ហើយថាក្រុមហាម៉ាសនឹងមិនបាក់ស្លុតទឹកចិត្តក្នុងការតស៊ូប្រយុទ្ធឡើយ។
ស្របពេលជាមួយគ្នានេះ ប្រទេសបារាំង អង់គ្លេស និងអាល្លឺម៉ង់ កំពុងតែរៀបចំដំណោះស្រាយរួមមួយ ដើម្បីស្វែងរកបទឈប់បាញ់ជាអចិន្ត្រៃយ៍ រវាងអ៊ីស្រាអែល និងក្រុមហាម៉ាសប៉ាឡេស្ទីន។ ដំណោះស្រាយរួមនោះ នឹងត្រូវស្នើទៅក្រុមប្រឹក្សាសន្តិសុខអង្គការសហប្រជាជាតិដោយត្រូវការការយល់ព្រមជាឯកឆន្ទ ពីសំណាក់ប្រទេសជាសមាជិកទាំង១៥។
ការចរចាទ្វេភាគីដែលមានអេហ្ស៊ីបជាអ្នកសម្រុះសម្រូល បានជាប់គាំង ដោយសាភាគីទាំងពីរមិនព្រមវិលមករកតុចរចា ហើយបន្តបាញ់គ្រាប់មីស៊ីលដាក់គ្នា។ ក្នុងពេលនេះដែរ ប្រមុខដឹកនាំប្រទេសកាតា ដែលជាប្រទេសតែងតែទំនុកបម្រុងក្រុមហាម៉ាស បានដឹកនាំការប្រជុំមួយ រវាងមេដឹកនាំហាម៉ាស និងលោក ម៉ាហមូដ អាបាស ប្រមុខដឹកនាំប៉ាឡេស្ទីន ដើម្បីស្វែងរកគោលជំហររួមមួយ ប្រឈមនឹងការវាយប្រហាររបស់អ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ