អ៊ីស្រាអែលទទួលយកបទឈប់បាញ់ស្នើដោយអេហ្ស៊ីប តែក្រុមហាម៉ាសទាត់ចោល
នៅព្រឹកថ្ងៃអង្គារនេះ អ៊ីស្រាអែលបានសម្រេចចិត្តទទួលយកបទឈប់បាញ់ ស្នើឡើងដោយអេហ្ស៊ីប។ បទឈប់បាញ់នេះ តំរូវអោយអនុវត្តន៍ចាប់ពីម៉ោង៩ព្រឹកក្នុងស្រុក។ ប៉ុន្តែ ក្រុមហាម៉ាសប៉ាឡេស្ទីនទាត់ចោលបទឈប់បាញ់នេះ ដោយសន្យាថា នឹងពង្រីកការវាយប្រហារប្រឆាំងអ៊ីស្រាអែលបន្ថែមទៀត។ នៅអាធ្រាតថ្ងៃចន្ទម្សិលមិញ កងទ័ពអ៊ីស្រាអែលបានបន្តប្រតិបត្តិការនៅហ្កាហ្សា ធ្វើជនជាតិប៉ាឡេស្ទីន២នាក់ត្រូវស្លាប់។ តួលេខមនុស្សស្លាប់ក្នុងប្រតិបត្តិការយោធាអ៊ីស្រាអែលលើកនេះ ឡើងដល់១៨៩នាក់ ហើយអ្នករបួសមានប្រមាណ១៣០០នាក់ ជាតួលេខធ្ងន់ធ្ងរហួសពីប្រតិបត្តិការយោធាអ៊ីស្រាអែលប្រឆាំងក្រុមហាម៉ាស កាលពីឆ្នាំ២០១២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
ថ្វីបើបទឈប់បាញ់នៅហ្កាហ្សាស្នើឡើងដោយអេហ្ស៊ីប បានបង្កភាពចម្រូងចម្រាសនៅអ៊ីស្រាអែល ព្រឹកថ្ងៃអង្គារនេះ ខទ្ទកាល័យសន្តិសុខអ៊ីស្រាអែលបានសម្រេចអនុម័តទទួលយកបទឈប់បាញ់នេះ។ បទឈប់បាញ់ស្នើដោយអេហ្ស៊ីប ចែងតំរូវអោយបញ្ឈប់ការវាយប្រហារតាមផ្លូវអាកាស ផ្លូវទឹក និងជើងគោក។ អេហ្ស៊ីបក៏ស្នើអោយភាគីប៉ាឡេស្ទីន និងអ៊ីស្រាអែលពិភាក្សាគ្នា ក្នុងទឹកដីអេហ្ស៊ីប ដើម្បីរកដំណោះស្រាយផងដែរ។ បទឈប់បាញ់នេះ ត្រូវអនុវត្តនៅម៉ោង៩ព្រឹកក្នុងស្រុក ត្រូវនឹងម៉ោង២រសៀលនៅ កម្ពុជា ថ្ងៃអង្គារនេះ។
ប៉ុន្តែ ក្រុមហាម៉ាសបានទាត់ចោលបទឈប់បាញ់នេះ ដោយលើកឡើងថា បទឈប់បាញ់នេះ ជាការចុះចាញ់ គ្មានគោលការណ៍គ្រប់គ្រាន់ នឹងអាចអោយបញ្ឈប់ការប្រយុទ្ធគ្នាទេ។ ក្រុមហាម៉ាសទាមទារអោយមានកិច្ចព្រមព្រៀងធំមួយ តំរូវអោយអ៊ីស្រាអែលបញ្ចប់ការទំលាក់គ្រាប់បែក ឈប់បិទចរាចរណ៍រាំងស្ទះតំបន់ហ្កាហ្សាទៀត។ អ៊ីស្រាអែលបានខ្ទប់តំបន់ហ្កាហ្សាតាំងពីឆ្នាំ២០០៦ម្ល៉េះ។ ក្រុមហាម៉ាសក៏ទាមទារអោយបើកទីតាំងព្រំដែននៅរ៉ាហ្វា ជាមួយអេហ្ស៊ីបឡើងវិញ ព្រមទាំងដោះលែងអ្នកទោសប៉ាឡេស្ទីនដែលអ៊ីស្រាអែលទើបចាប់ទៅថ្មីៗនេះផងដែរ។ អ៊ីស្រាអែលធ្លាប់ដោះលែងអ្នកទោសទាំងនេះ រួចមកហើយ ក្រោយមានកិច្ចព្រមព្រៀងដោះដូរអ្នកទោសប៉ាឡេស្ទីន ជាមួយទាហានអ៊ីស្រាអែលមួយរូប នៅឆ្នាំ២០១១។
ក្រុមហាម៉ាសសន្យាថា បើលក្ខខណ្ឌបទឈប់បាញ់មិនបានបំពេញតាមសំណើខ្លួនទេ នោះក្រុមហាម៉ាសនឹងបន្តប្រយុទ្ធប្រឆាំងអ៊ីស្រាអែលអោយខ្លាំងថែមទៀត។ ដោយឡែក អ៊ីស្រាអែលប្រាប់ថា ប្រតិបត្តិការយោធាខ្លួនប្រឆាំងក្រុមហាម៉ាស នៅហ្កាហ្សា បានកាត់បន្ថយសមត្ថភាពបាញ់រ៉ុកកែតរបស់ក្រុមហាម៉ាសច្រើនហើយ។ គ្រាន់តែក្នុងមួយសប្តាហ៍នៃប្រតិបត្តិការយោធាអ៊ីស្រាអែល ជនរងគ្រោះស្លាប់ និងរបួស មានសន្ធឹកសន្ធាប់ហួសពីតួលេខជនរងគ្រោះ ក្នុងប្រតិបត្តិការយោធាអ៊ីស្រាអែលឆ្នាំ២០១២ទៅទៀត។ កាលពីខែវិច្ឆិកា ឆ្នាំ២០១២ ប្រតិបត្តិការយោធាអ៊ីស្រាអែលប្រឆាំងក្រុមហាម៉ាស បានសម្លាប់ជនជាតិប៉ាឡេស្ទីន១៧៧នាក់។
សម្ព័ន្ធអារ៉ាប់បានចោទអ៊ីស្រាអែលថា បង្កបទឧក្រិដ្ឋសង្គ្រាម និងបទឧក្រិដ្ឋប្រឆាំងមនុស្សជាតិ។ សម្ព័ន្ធអារ៉ាប់សោកស្តាយដែលអ៊ីស្រាអែលទទួលបានអភ័យឯកសិទ្ធនយោបាយ ហើយបានសម្លាប់មនុស្សដោយគ្មានការទទួលខុសត្រូវ។ នៅថ្ងៃអង្គារនេះ ប្រមុខការទូតអាមេរិកចន ឃែររី នឹងជជែកពីបញ្ហាអ៊ីស្រាអែលនិងក្រុមហាម៉ាសនេះ នៅ អេហ្ស៊ីប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ