អ៊ីរ៉ង់សម្ពោធរោងចក្រផលិតគ្រឿងចំហេះនុយក្លេអ៊ែរ
សារព័ត៌មានអ៊ីរ៉ង់ជាច្រើនបានចុះផ្សាយនៅថ្ងៃសៅរ៍នេះ ពីការសម្ពោធរោងចក្រផលិតគ្រឿងចំហេះនុយក្លេអ៊ែរអ៊ីរ៉ង់ មួយកន្លែង នៅខេត្តអ៊ីសស្ប៉ាហាន់ Ispahan ភាគកណ្តាលប្រទេស។ យោងតាមអង្គការថាមពលបរមាណូអ៊ីរ៉ង់ សកម្មភាពរោងចក្រនេះ ដើរស្របតាមកិច្ចព្រមព្រៀងនុយក្លេអ៊ែររវាងអ៊ីរ៉ង់ជាមួយប្រទេសមហាអំណាច៥+១។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
រោងចក្រផលិតគ្រឿងចំហេះនុយក្លេអ៊ែរអ៊ីរ៉ង់ ត្រូវបានបើកសម្ពោធអោយដំណើរការ ក្នុងខេត្តIspahan ភាគកណ្តាលប្រទេស។ រោងចក្រត្រូវផលិតចំហេះនុយក្លេអ៊ែរ សម្រាប់មជ្ឈមណ្ឌលនុយក្លេអ៊ែរស៊ីវិលក្នុងប្រទេស។ យោងតាមលោក អាលី អាក់បា សាឡេហ៊ី ជាប្រធានអង្គការថាមពលបរមាណូអ៊ីរ៉ង់ រោងចក្រនេះផលិតឌីអុកស៊ីតអ៊ុយរ៉ានីញ៉ូម តិចជាង៥ភាគរយ ដូច្នេះ គឺស្របតាមកិច្ចព្រមព្រៀងនុយក្លេអ៊ែររវាងអ៊ីរ៉ង់ ជាមួយប្រទេសមហាអំណាច៥+១។
កិច្ចព្រមព្រៀងនុយក្លេអ៊ែរបឋមក្រុងហ្សឺណែវ រវាងអ៊ីរ៉ង់និងប្រទេសមហាអំណាច៥+១ មានអាមេរិក រុស្ស៊ី ចិន បារាំង អង់គ្លេសនិងអាល្លឺម៉ង់ បានចូលជាធរមានកាលពីខែមករាដើមឆ្នាំ។ ដើម្បីបន្ធូរបន្ថយទណ្ឌកម្មសេដ្ឋកិច្ចលើអ៊ីរ៉ង់ កិច្ចព្រមព្រៀងនេះតំរូវអោយអ៊ីរ៉ង់ចម្រើនធាតុអ៊ុយរ៉ានីញ៉ូម អោយបានតិចជាង៥ភាគរយ។ បើលើសពី៥ភាគរយ មានន័យថា ជាសកម្មភាពនុយក្លេអ៊ែរយោធា មិនមែននុយក្លេអ៊ែរស៊ីវិលទេ។ គួររំលឹកថា ប្រទេសលោកខាងលិចតែងសង្ស័យថា អ៊ីរ៉ង់ចង់ប្រើកម្មវិធីនុយក្លេអ៊ែរស៊ីវិល ដើម្បីផលិតគ្រាប់បែកបរមាណូ។ កាលពីខែកក្កដា ប្រទេសមហាអំណាច៥+១ បានសម្រេចពន្យារកិច្ចព្រមព្រៀងនុយក្លេអ៊ែរបឋមជាមួយអ៊ីរ៉ង់ ៤ខែថែមទៀត។ គ្រប់ភាគីចង់ជជែកសម្រេចអោយបានកិច្ចព្រមព្រៀងធំចុងក្រោយ ដើម្បីបិទបញ្ចប់វិបត្តិនុយក្លេអ៊ែរអ៊ីរ៉ង់។
ដោយឡែក មុនពេលបើកសម្ពោធរោងចក្រផលិតគ្រឿងចំហេះនុយក្លេអ៊ែរនេះ រដ្ឋាភិបាលអ៊ីរ៉ង់ធ្លាប់បានប្រកាសរួចហើយថា ចង់បង្កើនសមត្ថភាពចម្រើនធាតុអ៊ុយរ៉ាញ៉ូម អោយបានកើន១ជា១០ សម្រាប់៨ឆ្នាំទៅមុខ។ ទិសដៅគឺដើម្បីផលិតគ្រឿងចំហេះ ចាំបាច់សម្រាប់មជ្ឈមណ្ឌល Bouchehr។ រុស្ស៊ីជាអ្នកសាងសង់មជ្ឈមណ្ឌលនេះឡើង។ រុស្ស៊ីសន្យា ផ្តល់គ្រឿងចំហេះដល់មជ្ឈមណ្ឌល ក្នុងរយៈពេល៦ឆ្នាំទៀត។ ប៉ុន្តែ អាមេរិកនិងអឺរ៉ុបចង់អោយអ៊ីរ៉ង់បន្ថយកម្មវិធីចម្រើនធាតុអ៊ុយរ៉ាញ៉ូមអោយថយចុះ១ជា៤។ អាមេរិកនិងអឺរ៉ុបប្រាប់អោយអ៊ីរ៉ង់ទៅសុំគ្រឿងចំហេះពីរុស្ស៊ី ដូចដែលរុស្ស៊ីធ្លាប់សន្យាជួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ