ប្រមុខដឹកនាំសាសនាអ៊ីរ៉ង់សំដែងការគាំទ្រចំពោះកិច្ចពិភាក្សានុយក្លេអ៊ែរអ៊ីរ៉ង់ជាមួយប្រទេសមហាអំណាច
នៅថ្ងៃពុធនេះ ប្រមុខដឹកនាំសាសនាអ៊ីរ៉ង់ អាយ៉ាតូឡា អាលី ខាមេណី បានបង្ហាញការគាំទ្រជាថ្មីម្តងទៀត ចំពោះកិច្ចពិភាក្សាសំណុំរឿងនុយក្លេអ៊ែរ រវាងអ៊ីរ៉ង់ និងប្រទេសមហាអំណាច៥+១ មានអាមេរិក បារាំង អង់គ្លេស រុស្ស៊ី ចិន និងអាល្លឺម៉ង់។ តំណាងអ៊ីរ៉ង់និងប្រទេសមហាអំណាច៥+១ បានបើកសម័យប្រជុំខ្លួន ជាលើកទី៣ នៅថ្ងៃពុធនេះ នៅទីក្រុងវីយេន ប្រទេសអូទ្រីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៦
នៅថ្ងៃពុធនេះ ប្រមុខដឹកនាំសាសនាអ៊ីរ៉ង់ អាយ៉ាតូឡា អាលី ខាមេណី បានបង្ហាញការគាំទ្រជាថ្មីម្តងទៀត ចំពោះការពិភាក្សានុយក្លេអ៊ែរអ៊ីរ៉ង់ រវាងអ៊ីរ៉ង់និងប្រទេសមហាអំណាច៥+១។ លោកខាមេណីបានគាំទ្រអោយការពិភាក្សាបន្តធ្វើ។ ប្រមុខដឹកនាំសាសនារូបនេះបានលើកឡើងថា ប្រទេសលោកខាងលិចនិងអ៊ីស្រាអែលបានសង្ស័យថាកម្មវិធីនុយក្លេអ៊ែរអ៊ីរ៉ង់ មានបិទបាំងនូវសកម្មភាពយោធាដូច្នេះ អ៊ីរ៉ង់យល់ព្រមចរចាពីកម្មវិធីនុយក្លេអ៊ែរ ដើម្បីកំចាត់ចោលនូវស្ថានភាពទាស់ទែងទាំងនេះ។
គួររំលឹកថា ប្រទេសលោកខាងលិចនិងអ៊ីស្រាអែលតែងសង្ស័យថា អ៊ីរ៉ង់ចង់ផលិតគ្រាប់បែកបរមាណូតាមរយៈកម្មវិធីនុយក្លេអ៊ែរស៊ីវិល។ នៅថ្ងៃពុធនេះ តំណាងអ៊ីរ៉ង់និងប្រទេសមហាអំណាច៥+១ មានអាមេរិក បារាំង អង់គ្លេស រុស្ស៊ី ចិន និងអាល្លឺម៉ង់ បានជួបចរចាគ្នាក្នុងសម័យប្រជុំលើកទី៣ នៅទីក្រុងវីយេន ប្រទេសអូទ្រីស ជាកិច្ចប្រជុំស្តីពីគម្រោងកិច្ចព្រមព្រៀងចុងក្រោយ ដើម្បីបិទបញ្ចប់វិបត្តិនុយក្លេអ៊ែរអ៊ីរ៉ង់។ អ៊ីរ៉ង់និងប្រទេសមហាអំណាចបានលើកឡើងថា កិច្ចប្រជុំថ្ងៃពុធនេះ បានប្រព្រឹត្តតាមទិសដៅល្អ។
កាលពីខែវិច្ឆិកា ឆ្នាំ២០១៣ អ៊ីរ៉ង់និងប្រទេសមហាអំណាចបានសម្រេចចេញកិច្ចព្រមព្រៀងបណ្តោះអាសន្នមួយ ចូលជាធរមានកាលពីខែមករា តម្រូវអោយអ៊ីរ៉ង់ព្យួរចោលនូវសកម្មភាពនុយក្លេអ៊ែរមួយចំនួន ជាការផ្តោះប្តូរនឹងការបន្ធូរបន្ថយទណ្ឌកម្មពីសំណាក់សហគមន៍អន្តរជាតិ។ នៅថ្ងៃពុធនេះ ទីភ្នាក់ងារថាមពលបរមាណូអន្តរជាតិ បានលើកឡើងថា អ៊ីរ៉ង់បានសហការជាមួយអ្នកជំនាញរបស់ទីភ្នាក់ងារ និងបានធ្វើសកម្មភាពសមស្របតាមកិច្ចព្រមព្រៀងបណ្តោះអាសន្ននេះ។
ដោយឡែក ទោះជាអ៊ីរ៉ង់បន្តកិច្ចចរចាជាមួយប្រទេសមហាអំណាចក្តី ប្រមុខដឹកនាំសាសនាអ៊ីរ៉ង់ អាយ៉ាតូឡា អាលី ខាមេណី បានអះអាងប្រាប់អ្នកវិទ្យាសាស្ត្រនានាថា អ៊ីរ៉ង់មិនបញ្ឈប់សកម្មភាពផ្នែកស្រាវជ្រាវ និងការអភិវឌ្ឍន៍នុយក្លេអ៊ែររបស់ខ្លួននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ