បារំាង-ស៊ីរី -

អត្ថបទចុះផ្សាយនៅថ្ងៃ សុក្រ 12 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 13 តុលា 2012

លោក François Hollande៖«ប្រធានាធិបតីស៊ីរី Bachar ត្រូវតែចុះចេញពីតំណែង ដោយគ្មានលក្ខខណ្ឌ»

បទសម្ភាសន៍របស់លោកប្រធានាធិបតីបារំាង François Hollande ជាមួយ RFI France24 និង TV5 Monde ថ្ងៃទី១១ តុលា ២០១២

ដោយ គួច គន្ធារ៉ា

មុននឹងចេញដំណើរទៅកាន់ទីក្រុងដាកានៃប្រទេសសេណេហ្គាល់ បន្ទាប់មកបន្តទៅទីក្រុងគីនស្ហាសានៃសាធារណរដ្ឋប្រជាធិបតេយ្យកុងហ្គោដើម្បីចូលរួមជំនួបកំពូលនៃប្រទេសប្រើភាសាបារំាង លោកប្រធានាធិបតីបារំាង François Hollande បានផ្តល់បទសម្ភាសន៍ផ្តាច់មុខឲ្យវិទ្យុបារាំងអន្តរជាតិ ទូរទស្សន៍ France 24 និង TV5 Monde។ លោកប្រមុខរដ្ឋបារំាងបានថ្លែងប្រាប់ពីការសម្រេចចិត្តរបស់បារំាងក្នុងការបើកទំព័រថ្មីនៅក្នុងទំនាក់ទំនងរវាងបារំាង និងទ្វីបអាហ្រ្វិក។ ក្រៅពីនេះ លោក François Hollande ក៏បាននិយាយពីប្រធានរឿងអន្តរជាតិក្តៅគគុកមួយចំនួនរួមមាន ស្ថានការណ៍នៅក្នុងប្រទេសម៉ាលី និងវិបត្តិនៅក្នុងប្រទេសស៊ីរី។ វិបត្តិនៅស៊ីរីដែលលោកប្រមុខរដ្ឋបារំាងបានបញ្ជាក់ថា លោកប្រធានាធិបតីស៊ីរី Bachar ត្រូវតែចុះចេញពីតំណែង ដោយគ្មានលក្ខខណ្ឌ។

ប្រសាសន៍របស់លោកប្រធានាធិបតីបារំាង François Hollande ប្រែសម្រួលដោយ គួច គន្ធារ៉ា

ស្តាប់ (02:21)

12/10/2012 by គួច គន្ធារ៉ា

នៅពេលដែលលោកប្រធានាធីបតីស៊ីរី Bachar el-Assad ចាកចេញពីតំណែងឆាប់កាលណា ដំណើរការអន្តរកាលនៅស៊ីរីអាចនឹងចាប់ផ្តើមភ្លាមៗនៅពេលនោះ។ នៅពេលដែលជម្លោះបន្តអូសបន្លាយកាន់តែយូរ ហានិភ័យក៏កាន់តែរីកធំខ្លំាងដែរ។ ដំបូង គឺការផ្ទុះចេញនូវសង្រ្គាមស៊ីវិល បន្ទាប់មក បង្កចេញនូវភាពអនាធិបតេយ្យនៅទូទំាងប្រទេស រហូតដល់មានការពុះចែកប្រទេសទៅតាមបក្សពួកនីមួយៗ។ ខ្ញុំសូមបដិសេធយ៉ាងដាច់អហង្ការចំពោះស្ថានការណ៍បែបនេះ។

អ៊ីចឹងហើយបានជាប្រទេសបារំាងបានចេញមុខជួយឈឺឆ្អាលមុនគេ។ តំាងពីខ្ញុំបានជាប់ឆ្នោតជាប្រធានាធិបតីមក បារំាងបានធ្វើការងារច្រើនណាស់សម្រាប់ប្រទេសស៊ីរីនារយៈពេលប៉ុន្មានខែចុងក្រោយនេះ។ តើយើងបានធ្វើអ្វីខ្លះ ?

គឺបារំាងនេះឯង ជាអ្នកស្នើឲ្យក្រុមអ្នកប្រឆំាងរដ្ឋាភិបាលស៊ីរីជួបប្រជុំគ្នាក្នុងទីក្រុងប៉ារីសកាលពីខែកក្កដាកន្លងទៅ និងសុំឲ្យពួកគេរៀបចំបង្កើតរដ្ឋាភិបាលបណ្តោះអាសន្នមួយ។

គឺបារំាងនេះឯង ជាអ្នកដែលបាននិយាយមុនគេ ឲ្យមានការជួយការពារតំបន់ដែលក្រុមអ្នកប្រឆំាងរំដោះបាន និងរៀបចំឲ្យមានជំនួយមនុស្សធម៌។ យើងបានធ្វើបញ្ហានេះ នៅក្នុងប្រទេសហ៊្សកដានី។ បារំាងជាអ្នកនិយាយមុនគេថា យើងត្រូវតែរួមសហការណ៍គ្នាដើម្បីធ្វើយ៉ាងណា ឲ្យប្រជាជនដែលបានផ្លាស់ប្តូរទីលំនៅគេចពីតំបន់គ្រោះថ្នាក់ ឬមួយជនភៀសខ្លួនអាចនឹងទទួលបានកន្លែងរស់នៅសមរម្យ និងមានលក្ខខណ្ឌល្អ ពិសេសនៅក្នុងរដូវរងាខាងមុខ។

បារំាងជាប្រទេសមុនគេដែលបាននិយាយថា យើងត្រូវតែធ្វើអ្វីៗគ្រប់បែបយ៉ាងទំាងអស់ដើម្បីបង្ខំឲ្យលោកប្រធានាធីបតីស៊ីរី Bachar el-Assad ចុះចេញពីតំណែង និងយើងត្រូវរកដំណោះស្រាយសមស្របមួយ ដោយគិតទំាងក្រុមមនុស្សជំនិតរបស់លោក Assad ផង។

ខ្ញុំធ្លាប់បានឮសំណើរបស់ប្រទេសតួកគីពាក់ព័ន្ធនឹងលោកអនុប្រធានាធិបតីស៊ីរី។ នៅក្នុងជួរថ្នាក់ដឹកនំាស៊ីរីបច្ចុប្បន្ន, មានឥស្សរជនជាច្រើនដែលនឹងអាចចូលរួមនៅក្នុងដំណើរការអន្តរកាល។ ក៏ប៉ុន្តែ មិនត្រូវមានការសម្របសម្រួលណាមួយជាមួយលោក Bachar el-Assad ទេ៕