ចិន -

អត្ថបទចុះផ្សាយនៅថ្ងៃ ចន្ទ 16 មករា 2012 - ព័ត៌មានទើបកែប្រើលើកចុងក្រោយ ថ្ងៃ ពុធ 21 វិច្ឆិកា 2012

ចិនមានអ្នកប្រើប្រាស់អ៊ីនធ័រណែត៥១៣លាននាក់

វិបសៃតិ៍Baidu ដែលជាគូប្រកួតប្រជែងរបស់Google នៅក្នុងប្រទេសចិន

©Reuters

ដោយ តាន់ ហ្សង់-ហ្វ្រង់ស្វ័រ

ក្នុងអំឡុងពេលតែមួយឆ្នាំ អ្នកប្រើប្រាស់អ៊ីនធ័រណែតនៅប្រទេសចិនបានកើនឡើងជាង៥០ប្លាយលាននាក់។ ចាប់ពីពេលនេះទៅ ពលរដ្ឋចិនដែលប្រើប្រាស់អ៊ីនធ័រណែតមានចំនួនទាំងអស់៥១៣លាននាក់ហើយ។ អ្វីដែលកំពុងធ្វើឲ្យអាជ្ញាធរបារម្ភ គឺការកើនឡើងលឿនរហ័សនៃអ្នកប្រើប្រាស់Microblogs។

សេចក្តីរាយការណ៍របស់តាន់ ហ្សង់-ហ្វ្រង់ស្វ័រ

ស្តាប់ (01:23)

16/01/2012 by តាន់ ហ្សង់-ហ្វ្រង់ស្វ័រ

រហូតដល់ដំណាច់ឆ្នាំ២០១១កន្លងផុតទៅនេះ អ្នកប្រើប្រាស់អ៊ីនធ័រណែតនៅប្រទេសចិនមានចំនួនទាំងអស់៥១៣នាក់ ពោលគឺបានកើនឡើងប្រមាណ១២,២% បើប្រៀបធៀបទៅនឹងឆ្នាំ២០១០។ មិនតែប៉ុណ្ណោះ ចំនួនអ្នកប្រើប្រាស់Microblogs បានកើនឡើងខ្លាំង គឺមានរហូតដល់ទៅ២៥០លាននាក់នៅចុងឆ្នាំ២០១១។ នេះបើយោងទៅតាមមជ្ឈមណ្ឌលព័ត៌មានស្តីពីអ៊ីនធ័រណែតនៅប្រទេសចិន។

ក្នុងរបាយការណ៍ចេញផ្សាយនៅថ្ងៃចន្ទនេះ មជ្ឈមណ្ឌលដដែលអះអាងថា អ្នកប្រើប្រាស់អ៊ីនធ័រណែតបានកើនចំនួនជាពិសេសនៅទីក្រុងប៉េកាំង ពោលគឺប្រមាណ៧០,៣%។ ក្នុងចំណោមអ្នកប្រើបា្រស់ប្រាំនាក់ បួននាក់មានអាយុពី១០ទៅ៣៩ឆ្នាំ។ ពួកគេប្រើប្រាស់អ៊ីនធ័រណែតជាពិសេសតាមរយៈComputers នៅទីកន្លែងធ្វើការ ទូរស័ព្ទដៃ និងLaptobs។

ការកើនឡើងលឿនរហ័សនៃចំនួនអ្នកប្រើបា្រស់អ៊ីនធ័រណែតនេះកំពុងធ្វើឲ្យអាជ្ញាធរចិនបារម្ភ ពីព្រោះរហូតមកទល់ពេលនេះ វិធានការត្រួតពិនិត្យពីសំណាក់រដ្ឋាភិបាលនៅមានការខ្វះខាតច្រើន។ ជាក់ស្តែង អាជ្ញាធរចិនដែលអាចបិទខ្ទប់គេហទំព័រនេះ ឬគេហទំព័រនោះបានមែន តែមិនទាន់មានលទ្ធភាពរារាំងពួកអ្នកប្រើប្រាស់Microblogs កុំឲ្យបង្ហោះសាររិះគន់រដ្ឋាភិបាលបាននៅឡើយទេ។ អ៊ីចឹងហើយ បានជាប៉ុន្មានខែចុងក្រោយនេះ អាជ្ញាធរចិនបានសម្រេចពង្រឹងការត្រួតពិនិត្យទៅលើប្រព័ន្ធឃោសនាមហាជនថ្មីមួយនេះ៕