Delicious
Digg
Facebook
Twitter
Yahoo!
Technorati
កម្ពុជា -
អត្ថបទចុះផ្សាយនៅថ្ងៃ សុក្រ 17 សីហា 2012 -
ព័ត៌មានទើបកែប្រើលើកចុងក្រោយ ថ្ងៃ សុក្រ 17 សីហា 2012
អង្គការអន្តរជាតិបន្តអំពាវនាវអោយលើកលែងការចោទប្រកាន់មន្ត្រីអាដហុក
លោកចាន់ សុវ៉េត មន្រ្តីស៊ើបអង្កេតរបស់អាដហុក ដែលកំពុងរងការចោទប្រកាន់ពីតុលាការជុំវិញជម្លោះដីធ្លី នៅក្រចេះ
RFI/Channa Siv
ក្រៅពីអង្គការក្រៅរដ្ឋាភិបាលនៅកម្ពុជា អង្គការអន្តរជាតិនៅបរទេសក៏កំពុងអំពាវនាវអោយរដ្ឋាភិបាលបញ្ឈប់ការចោទប្រកាន់លោកចាន់ សុវ៉េត មន្ត្រីស៊ើបអង្កេតរបស់សមាគមការពារសិទ្ធិមនុស្សអាដហុកដែរ។ សហព័ន្ធអន្តរជាតិដើម្បីសិទ្ធិមនុស្ស និងអង្គការពិភពលោកប្រឆាំងការធ្វើទារុណកម្មបាននិយាយថា ការបញ្ចប់ការប្តឹងប្រឆាំងលោកចាន់ សុវ៉េតនឹងក្លាយទៅជាការធានាការគោរពសិទ្ធិមនុស្សមួយនៅកម្ពុជា។
អង្គការអន្តរជាតិពីរចុងក្រោយនេះគឺ សហព័ន្ធអន្តរជាតិដើម្បីសិទ្ធិមនុស្ស និងអង្គការពិភពលោកប្រឆាំងការធ្វើទារុណកម្ម។ ស្ថាប័នអន្តរជាតិទាំងពីរដែលអះអាងជាអ្នកអង្កេតការណ៍ ដើម្បីការពារសកម្មជនការពារសិទ្ធិមនុស្ស បានអំពាវនាវអោយរដ្ឋាភិបាលបញ្ឈប់ការប្តឹងផ្តល់ និងមិនអោយមានសកម្មភាពរំលោភបំពានណាមួយប្រឆាំងលោកចាន់ សុវ៉េត និងអ្នកការពារសិទ្ធិមនុស្សដទៃទៀតឡើយ។
សេចក្តីថ្លែងការណ៍ត្រូវបានផ្ញើទៅថ្នាក់ដឹកនាំប្រទេសជាច្រើនរូប រួមមាន លោកនាយករដ្ឋមន្ត្រីហ៊ុន សែន លោក ស ខេង រដ្ឋមន្ត្រីក្រសួងមហាផ្ទៃ លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ លោក ហោ ណាំហុង រដ្ឋមន្ត្រីក្រសួងការបរទេស និងលោក សុន សួន ឯកអគ្គរាជទូតអចិន្ត្រៃយ៍របស់កម្ពុជាប្រចាំអង្គការសហប្រជាជាតិ។
មុនមានសេចក្តីថ្លែងការណ៍ពីអង្គការអន្តរជាតិទាំងពីរនេះ អង្គការក្រៅរដ្ឋាភិបាលនៅកម្ពុជាក៏បានចេញផ្សាយសេចក្តីថ្លែងការណ៍រួមមួយដែរ ដោយចាត់ទុកថា ការចោទប្រកាន់មន្ត្រីស៊ើបអង្កេតរបស់អាដហុក គឺលោក ចាន់ សុវ៉េត គឺជាករណីធ្ងន់ធ្ងរជាងគេបង្អស់ ក្នុងរយៈពេល១០ឆ្នាំចុងក្រោយ ក្នុងវិស័យសិទ្ធិមនុស្សនៅកម្ពុជា។
សេចក្តីថ្លែងការណ៍រួមនោះសរសេរថា ពួកគេសោកស្តាយយ៉ាងខ្លាំងចំពោះសេចក្តីសម្រេចរបស់សាលាដំបូងរាជធានីភ្នំពេញដែលបានចោទប្រកាន់ក្រោមមូលហេតុនយោបាយប្រឆាំងលោកចាន់ សុវ៉េត ដែលគ្រាន់តែបានបំពេញការងារស្របច្បាប់របស់លោក។
លោក ចាន់ សុវ៉េត ត្រូវបានសាលាដំបូងរាជធានីភ្នំពេញ ចេញដីកាបង្គាប់ឲ្យចូលបំភ្លឺនៅថ្ងៃទី២៤ ខែសីហាខាងមុខនេះ ពាក់ព័ន្ធនឹងការផ្តល់ជំនួយដល់ជនសង្ស័យដែលរដ្ឋាភិបាលតាមចាប់ខ្លួនក្នុងបទចោទថាបានបង្កើតរដ្ឋក្នុងរដ្ឋ នៅក្នុងស្រុកឆ្លូងខេត្តក្រចេះ កាលពីខែឧសភា៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ (1)
ចូលរួមមតិ
រឿងរ៉ាវទាំងអស់គឺវាចេញមកពីការគ្រប់គ្រង់ខ្សោយរបស់លោកធន សារាយ! អង្គការអាដហុក ធ្វើការលើរឿងសិទ្ធិមនុស្ស ដល់តែគេសម្ភាសន៏ពីរឿងស្រង់ព្រះផុះចេញពីទឹក ក៏លោក សារាយ អនុញ្ញាតិអោយបុគ្គលិកខ្លួនឆ្លើយរឿងស្រង់ព្រះដែរ។ ខ្ញុំក៏ជាបុគ្គលិកសង្គមស៊ីវីលដែរ ខ្ញុំចង់សួរណាស់ថា តើលោក សារាយគ្រប់គ្រងបុគ្គលិកបានល្អប៉ុណ្ណា? ហើយរឿងស្រង់ព្រះចេញពីទឹកហ្នឹង ជាអណ្ណត្តិការងាររបស់អង្គការអាដហុកឬយ៉ាងម៉េច? រឿងមួយទៀត គឺបុគ្គលិកនៅតាមសាខាវិញ មិនអនុវត្តតាមគោលការណ៏រក្សាការសម្ងាត់ជូនអតិថិជនរបស់ខ្លួន។ ករណីក្មេងស្រីម្នាក់ ត្រូវគេរំលោភបូក បែរជាបុគ្គលិកអាដហុក ប្រចាំខេត្តកណ្តាល នាំទស្សនាវដ្តីទៅថតឳពុកម្តាយក្មេង និងសសេររឿងក្មេងចុះទស្សនាវដ្តី រហូតធ្វើអោយអ្នកនៅក្នុងភូមិដឹងពីរឿងក្មេងស្រី និងធ្វើអោយគ្រួសារក្មេងស្រីអាម៉ាស់មុខរហូតដល់ចង់សម្លាប់ខ្លួន! ខ្ញុំចង់សួរថា បើរឿងនេះកើតឡើងជាមួយបុគ្គលិកអាដហុក ឬ គ្រួសាររបស់លោក សារាយ តើគេនិងនាំទស្សនាវដ្តីទៅថតផ្ទះ និងសសេររឿងដាក់ក្នុងទស្សនាវដ្តីដែរឬអត់? ទាំងអស់នេះ បញ្ជាក់ពីភាពទន់ខ្សោយរបស់ថ្នាក់ដឹកនាំ ហើយថែមទាំងមិនដឹងថា បុគ្គលិកថ្នាក់ក្រោមរបស់ខ្លួនបានធ្វើទង្វើប្រាសចាកគោលការណ៏សីលធម៏ និងច្បាប់ជាតិ។ ដល់តែពេលរដ្ឋាភិបាល ប្រើច្បាប់ តាំងនាំគ្នាស្រែកថា រដ្ឋាភិបាលគៀបសង្កត់។ ខ្ញុំសុំសូមណូមពរ អោយក្រុមប្រឹក្សាភិបាលរបស់អង្គការអាដហុក ពិនិត្យលើការអនុវត្តការងារ និងការគ្រប់គ្រងបុគ្គលិករបស់អង្គការមួយនេះ ចៀសវាងមានរឿងកាន់តែធំឡើងៗទៅថ្ងៃក្រោយ ហើយអាចធ្វើអោយមានផលប៉ះពាល់ដល់សហគមន៏អង្គការនៅស្រុកខ្មែរ។ បំណងល្អពីពលរដ្ឋខ្មែរម្នាក់ និងជាមន្ត្រីសង្គមស៊ីវិល។ សូមផ្សាយមតិរបស់ខ្ញុំកុំបីខាន ដើម្បីលើកកំពស់សិទ្ធិចូលរួម និងសិទ្ធិបញ្ចេញមតិស្ថាបនា។
ប្រតិកម្មជុំវិញអត្ថបទនេះ