នាយករដ្ឋមន្រ្តីឥណ្ឌាទៅបំពេញទស្សនកិច្ចនៅភូមា
នៅថ្ងៃអាទិត្យនេះ លោក ម៉ានម៉ូហាន ស៊ីង (Manmohan Singh) នាយករដ្ឋមន្រ្តីឥណ្ឌា បានចាប់ផ្តើមដំណើរទស្សនកិច្ចរយៈពេល៣ថ្ងៃ ទៅកាន់ប្រទេសភូមា។ នេះគឺជាលើកទី១ ចាប់តាំងពីឆ្នាំ១៩៨៧មក ដែលនាយករដ្ឋមន្រ្តីឥណ្ឌាទៅបំពេញទស្សនកិច្ចនៅភូមា។ ដំណើរទស្សនកិច្ចនេះបង្ហាញឲ្យឃើញអំពីចេតនារបស់ឥណ្ឌា ក្នុងការប្រកួតប្រជែងជាមួយចិន ដើម្បីបង្កើនឥទ្ធិពលនៅភូមា ដែលជាប្រទេសសម្បូរទៅដោយធនធានធម្មជាតិ។
ចុះផ្សាយនៅថ្ងៃ៖
ស្តាប់ - ០១:៤៤
នៅក្នុងដំណើរទស្សនកិច្ចរយៈពេល៣ថ្ងៃនេះ ក្រៅពីជួបជាមួយប្រធានាធិបតីភូមា លោកនាយករដ្ឋមន្រ្តីឥណ្ឌាក៏គ្រោងជួបជាមួយលោកស្រីអ៊ុង សាន ស៊ូជី ផងដែរ។
នៅព្រឹកមិញនេះ មុនពេលចេញដំណើរពីឥណ្ឌា លោកម៉ានម៉ូហាន ស៊ីង បានថ្លែងថា ដំណើរទស្សនកិច្ចរបស់លោកទៅកាន់ប្រទេសភូមានឹងផ្តោតទៅលើការពង្រឹងទំនាក់ទំនងខាងពាណិជ្ជកម្ម វិនិយោគ ការអភិវឌ្ឍតាមបណ្តោយព្រំដែន និងការអភិវឌ្ឍផ្នែកគមនាគមន៍រវាងឥណ្ឌា និងភូមា។
គួរបញ្ជាក់ថា ថ្វីដ្បិតតែឥណ្ឌា និងភូមា គឺជាប្រទេសជិតខាងមានព្រំប្រទល់ជាប់គ្នា ក៏ប៉ុន្តែ ក្នុងរយៈពេល ២៥ឆ្នាំកន្លងទៅនេះ មិនដែលមាននាយករដ្ឋមន្រ្តីឥណ្ឌារូបណាធ្វើដំណើរទៅបំពេញទស្សនកិច្ចនៅក្នុងប្រទេសភូមានោះទេ។ នេះក៏ដោយសារតែឥណ្ឌា ដែលមានឈ្មោះល្បីខាងប្រជាធិបតេយ្យ មិនចង់ភ្ជាប់ខ្លួនទៅនឹងរបបសឹកភូមា។
ក៏ប៉ុន្តែ បើទោះជាយ៉ាងនេះក៏ដោយ ឥណ្ឌាក៏មិនដែលមើលរំលងប្រទេសភូមានោះដែរ។ នាពេលកន្លងទៅនេះ នៅពេលដែលប្រទេសលោកខាងលិចនាំគ្នាដាក់ទណ្ឌកម្មលើរបបសឹកភូមា ឥណ្ឌាបានព្យាយាមប្រជែងជាមួយចិន ដើម្បីស្វែងរកផលប្រយោជន៍ខាងផ្នែកសេដ្ឋកិច្ច និងថាមពល នៅក្នុងប្រទេសភូមា។
នៅពេលនេះ ក្រោយពេលដែលរបបសឹកភូមាបានសុខចិត្តធ្វើកំណែទម្រង់នយោបាយ ឆ្ពោះទៅរកលទ្ធិប្រជាធិបតេយ្យ ហើយប្រទេសលោកខាងលិចក៏បានចាប់ផ្តើមបន្ធូរបន្ថយទណ្ឌកម្ម ឥណ្ឌាក៏កាន់តែខិតខំប្រឹងប្រែងខ្លាំងឡើងថែមទៀត ដើម្បីពង្រឹងឥទ្ធិពលលើភូមា។
កាលពីឆ្នាំ២០១១កន្លងទៅ ការផ្តោះប្តូរពាណិជ្ជកម្មរវាងភូមា និងឥណ្ឌា បើគិតជាទឹកប្រាក់ មានប្រមាណជា ១ពាន់ ២រយលានដុល្លារ។ ប្រទេសទាំងពីរគ្រោងនឹងជំរុញឲ្យការផ្តោះប្តូរពាណិជ្ជកម្មទ្វេភាគីនេះ កើនឡើងដល់ ៣ពាន់លានដុល្លារ ក្នុងមួយឆ្នាំ នៅក្នុងរយៈពេល ៣ឆ្នាំខាងមុខ។ លើសពីនេះទៅទៀត អ្វីដែលឥណ្ឌារំពឹងចង់បានពីភូមា គឺសិទ្ធិរុករក និងធ្វើអាជីវកម្មឧស្ម័នធម្មជាតិ នៅក្នុងប្លុកថ្មីៗទៀត ទាំងនៅក្រោមដីគោក និងក្រោមបាតសមុទ្រភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ