ឥណ្ឌា-អាមេរិក -

អត្ថបទចុះផ្សាយនៅថ្ងៃ ព្រហស្បតិ៍ 14 មិថុនា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 14 មិថុនា 2012

អាមេរិកបន្ធូរបន្ថយដើម្បីបានឥណ្ឌាជាដៃគូសេដ្ឋកិច្ច និងយោធា

រដ្ឋមន្រ្តីការបរទេសឥណ្ឌាS.M. Krishna (ឆ្វេង) និងលោកស្រីហ៊ីឡារី គ្លីនតុននៅក្នុងសន្និសីទកាសែត នៅថ្ងៃពុធទី ១៣មិថុនា ក្នុងទីក្រុងវ៉ាស៊ីនតោន

ដោយ ឈាង បុប្ផា

កាលពីថ្ងៃពុធទី ១៣ មិថុនា ក្នុងជំនួបប្រជុំប្រចាំឆ្នាំរវាង រដ្ឋមន្រ្តីការបរទេសឥណ្ឌា ជាមួយលោកស្រី ហ៊ីឡារី គ្លីនតុន នៅទីក្រុងវ៉ាស៊ីនតោន អាមេរិក និងឥណ្ឌាបានយល់ព្រមពង្រឹងសហប្រតិបត្តិការរវាងប្រទេសទាំងពីរឲ្យកាន់តែស៊ីជម្រៅលើផ្នែកសន្តិសុខជើងទឹក សន្តិសុខព័ត៌មានវិទ្យា និងឧស្សាហកម្មយោធា។

បទអត្ថាធិប្បាយរបស់ឈាង បុប្ផា

ស្តាប់ (06:40)

14/06/2012 by ឈាង បុប្ផា

ការព្រមព្រៀងគ្នាកាលពីថ្ងៃម្សិលមិញ គឺជាផ្នែកមួយនៃយុទ្ធសាស្រ្តរបស់អាមេរិក ដែលចង់ពង្រីកឥទ្ធិពលខ្លួននៅអាស៊ីប៉ាស៊ីហ្វិក។ អាមេរិករំពឹងចង់បានឥណ្ឌាមកធ្វើជាដៃគូយុទ្ធសាស្រ្តទាំងក្នុងវិស័យសេដ្ឋកិច្ច និងភូមិសាស្រ្តនយោបាយ ដើម្បីទប់ទល់នឹងចិន ដែលកំពុងពង្រីកអំណាចយោធា និងឥទ្ធិពលខ្លួនដែរ នៅតំបន់អាស៊ី។

អាមេរិក និងឥណ្ឌាធ្លាប់មានភាពជូរចត់នឹងគ្នា នៅក្នុងសម័យសង្រ្គាមត្រជាក់ ព្រោះ ឥណ្ឌាធ្លាប់បានខិតទៅជិតសហភាពសូវៀត។ ទំនាក់ទំនងអាមេរិកនិងឥណ្ឌាបានល្អមកវិញ ចាប់ពីឆ្នាំ ២០០៥ ប៉ុន្តែ នៅតែស្ថិតនៅក្នុងភាពចម្រូងចម្រាស់ដដែល បន្ទាប់ពីឥណ្ឌាមិនព្រមឈប់ទិញប្រេងពីអៀរ៉ង់ ទៅតាមការទាមទាររបស់អាមេរិក។ ឥណ្ឌាដែលកំពុងមានកំណើនសេដ្ឋកិច្ចខ្លាំង ឥណ្ឌាត្រូវការទិញប្រេងពីអ៊ីរ៉ង់ យកមកបំពេញតម្រូវការថាមពលដើម្បីកំណើនសេដ្ឋកិច្ចរបស់ខ្លួន។

កាលពីថ្ងៃចន្ទដើមសប្តាហ៍ ពោល គឺនៅមួយថ្ងៃមុនជំនួបប្រជុំជាមួយរដ្ឋមន្រ្តីការបរទេសឥណ្ឌា រដ្ឋាភិបាលអាមេរិកបានសម្រេចលើកលែងឲ្យឥណ្ឌា និងប្រទេសប្រាំមួយទៀតឲ្យរួចផុតពីទណ្ឌកម្មរបស់អាមេរិក។ បើតាមអាមេរិក ឥណ្ឌា និងប្រទេសទាំងប្រាំមួយ ផ្សេងទៀត បានកាត់បន្ថយការទិញប្រេងពីអ៊ីរ៉ង់ ដែលអាមេរិកបានដាក់ទណ្ឌកម្មសេដ្ឋកិច្ច។

ក្នុងផ្នែកសេដ្ឋកិច្ច អាមេរិកចង់ចាប់យកឥណ្ឌាធ្វើជាទីផ្សារសព្វាវុធរបស់ខ្លួន ព្រោះ ឥណ្ឌាទើបតែប្រកាសថា ខ្លួននឹងចំណាយលុយ ៥០ពាន់លានដុល្លារសម្រាប់ធ្វើទំនើបកម្មយោធារបស់ខ្លួន ក្នុងរយៈពេលប្រាំឆ្នាំទៅមុខ។ គិតចាប់តាំងពីឆ្នាំ ២០០២ដែលអាមេរិក និងឥណ្ឌាចាប់ត្រូវរ៉ូវគ្នា ឥណ្ឌាចំណាយលុយជាង៩ពាន់លានដុល្លារដើម្បីទិញអាវុធពីអាមេរិក។ ការព្រមព្រៀងគ្នា កាលពីថ្ងៃពុធម្សិលមិញ នឹង ជម្រុញឲ្យអាមេរិកក្លាយជាអ្នកផ្គត់ផ្គង់សព្វាវុធ កាន់តែចេញមុខដល់កងទ័ពឥណ្ឌា។ បើអាមេរិកលក់អាវុធ ឬក៏បច្ចេកវិទ្យានុយក្លេអ៊ែរដល់ឥណ្ឌា នោះអាមេរិកមិនត្រឹមបានប្រាក់ចំណេញប៉ុណ្ណោះទេ ប៉ុន្តែ អាមេរិកសង្ឃឹមនឹងបង្កើតការងារធ្វើច្រើន សម្រាប់ប្រជាជនអាមេរិកផងដែរ។

អាមេរិកចាប់ពង្រឹងសម្ព័ន្ធភាពជាមួយប្រទេសអាស៊ី រួមទាំងឥណ្ឌាផង ដើម្បីទប់ទល់ឥទ្ធិពលចិន ព្រោះអាមេរិកត្រូវការផ្លូវទឹកនៅសមុទ្រចិនភាគខាងត្បូង និងនៅអាស៊ីប៉ាស៊ីហ្វិកដើម្បីចរាចរពាណិជ្ជកម្មរបស់ខ្លួន។

អាមេរិកជំរុញឲ្យឥណ្ឌាជម្រុញពង្រឹងសហការយោធាជាមួយអាមេរិក រាប់តាំងពីការទិញអាវុធពីអាមេរិក និងការហ្វឹកហ្វឺន ធ្វើសមយុទ្ធរួមគ្នា រវាងឥណ្ឌា និងអាមេរិក។ ដើម្បីអាចធ្វើដូច្នេះបានទាល់តែអាមេរិកបានជំនួយ និងការយល់ព្រមសហការពីឥណ្ឌា ដែរ។ ហើយបើមានបញ្ហា ដូចជាការប្រឈមមុខ ឧទាហរណ៍ជាមួយចិន នោះ អាមេរិកនៅមានឥណ្ឌា ដែលជាមហាអំណាចនុយក្លេអ៊ែរ ជាបង្អែក នៅអាស៊ី។

ឥណ្ឌាបានទទួលអាមេរិក ក៏ប៉ុន្តែ ជាមួយគ្នានោះ ឥណ្ឌាក៏មិនចង់ឲ្យចិន និងរុស្ស៊ីអន់ចិត្តដែរ។ រុស្ស៊ី និងចិន ជាប្រទេសដៃគូពាណិជ្ជកម្មរបស់ឥណ្ឌា ក្នុងBrics ក្នុងនាមជាប្រទេសដែលទើបមានសេដ្ឋកិច្ចលូតលាស់ថ្មី។

ឥណ្ឌាចង់បានប្រយោជន៍សេដ្ឋកិច្ច និងយោធា ក៏ពិតមែន ពីទំនាក់ទំនងជាមួយអាមេរិក ប៉ុន្តែ ឥណ្ឌាមើលទៅ ក៏នៅចង់រក្សាអធិបតេយ្យភាពរបស់ខ្លួន។ រហូតមក ឥណ្ឌាត្រូវបានគេទទួលស្គាល់ថា ជាប្រទេសមិនដែលចូលបក្សសម្ព័ន្ធ គឺមិនស្ថិតនៅជាមួយភាគីជម្លោះណាមួយទេ។ ការនៅដាច់ដោយឡែក មិនស្ថិតនៅជាមួយភាគីណាមួយនោះ ធ្វើឲ្យឥណ្ឌារួចផុត ពីចំណងកាតព្វកិច្ចធ្វើសង្រ្គាម នានា។ គ្មានចំណងកាតព្វកិច្ច គឺឥណ្ឌាមិនចាំបាច់ចំណាយអស់លុយដើម្បីធ្វើសង្រ្គាម ដូចជានៅអាហ្វហ្កានីស្ថាន៕