ឥណ្ឌាទទួលស្គាល់ថា ក្រុងញូវដេល្លីរងការបំពុលបរិយាកាសដូចក្រុងប៉េកាំងដែរ
នៅថ្ងៃព្រហស្បត្តិ៍នេះ អាជ្ញាធរឥណ្ឌាបានទទួលស្គាល់ថា ទីក្រុងញូវដេល្លីក៏រងការបំពុលបរិយាកាសដូចជាទីក្រុងប៉េកាំងប្រទេសចិនដែរ។ ប៉ុន្តែ ឥណ្ឌាបដិសេធមិនទទួលយកពាក្យថា ក្រុងញូវដេល្លីជាក្រុងដែលរងការបំពុលច្រើនខ្ពស់ជាងគេក្នុងពិភពលោកទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
កាលពីថ្ងៃពុធ អង្គការសុខភាពពិភពលោក បានចុះផ្សាយរបាយការណ៍សិក្សាមួយ បង្ហាញថា ក្នុងចំណោមក្រុង១៦០០ នៃប្រទេស៩១ក្នុងពិភពលោក ក្រុងញូវដេល្លីប្រទេសឥណ្ឌា ក្នុងមួយឆ្នាំៗ មានសារធាតុល្អិតឆ្មារប្រភេទPM ២,៥ ប្រមាណ១៥៣ក្រាម ក្នុងមួយម៉ែត្រគូប។ សារធាតុល្អិតឆ្មារទាំងនេះមានប្រវែងតិចជាង២សង់ទីម៉ែត្រកន្លះ។ វាអាចជ្រាបចូលក្នុងឈាម ទៅវាយប្រហារសួតមនុស្សយើង។ សារធាតុល្អិតឆ្មារនេះ ប្រសិនបើមានបរិមាណខ្ពស់ក្នុងខ្លួនមនុស្ស អាចធ្វើអោយមនុស្សរងជំងឺផ្លូវដង្ហើមធ្ងន់ធ្ងរ កើតមហារីកសួត រឺក៏ជំងឺបេះដូងបាន។
នៅថ្ងៃព្រហស្បតិ៍នេះ អាជ្ញាធរត្រួតពិនិត្យគុណភាពខ្យល់ក្នុងបរិយាកាស បានទទួលស្គាល់ថា ក្រុងញូវដេល្លីពិតជារងការបំពុលបរិកាសមែន ប៉ុន្តែមិនមែនមានសារធាតុល្អិតឆ្មាររហូតដល់កម្រិត១៥៣ក្រាមក្នុងមួយម៉ែត្រគូបដូចជាការលើកឡើងរបស់អង្គការសុខភាពពិភពលោកទេ។ សារធាតុនេះប្រហែលមានត្រឹមតែ១១០ទៅ១២០ក្រាមក្នុងមួយម៉ែត្រគូបប៉ុណ្ណោះ។ អាជ្ញាធរឥណ្ឌាទទួលស្គាល់ថា គុណភាពខ្យល់ដកដង្ហើមនៅទីក្រុងញូវដេល្លី ក៏រងការបំពុលដូចជានៅទីក្រុងប៉េកាំងដែរ។ ប៉ុន្តែ គុណភាពខ្យល់ក្នុងបរិកាស គឺល្អលើសពីទីក្រុងប៉េកាំង ហើយកាន់តែប្រសើរទៅទៀត ពេលភ្លៀងរដូវមូសុង។
កាលពីដើមឆ្នាំ ឥណ្ឌាធ្លាប់បានទាត់ចោលការសិក្សារបស់អាមេរិកពីខ្យល់ក្នុងបរិយាកាសនៅឥណ្ឌាម្តងហើយ។ ការសិក្សាអាមេរិកនោះ លើកឡើងថា គុណភាពខ្យល់ដកដង្ហើមនៅក្រុងញូវដេល្លី ក៏អាក្រក់ដូចជានៅទីក្រុងប៉េកាំងដែរ។ ដោយឡែក ទោះជាកម្រិតសារធាតុល្អិតឆ្មារ នៅឥណ្ឌាធ្លាក់នៅត្រឹមពី១១០ទៅ១២០ក្រាម ក្នុងមួយម៉ែត្រគូប ដូចជាការអះអាងរបស់ឥណ្ឌា ក៏ក្រុងញូវដេល្លីនៅតែស្ថិតក្នុងចំណោមទីក្រុងនានាដែលរងការបំពុលបរិយាកាសខ្ពស់ជាងគេ ក្នុងពិភពលោក។ អង្គការការពារបរិស្ថានមួយនៅឥណ្ឌាប្រាប់ថា ក្រុងចំនួន១៣ក្នុងចំណោម២០ក្រុង នៅឥណ្ឌា ជាក្រុងរងការបំពុលខ្ពស់បំផុតក្នុងពិភពលោក។
បរិស្ថានទីក្រុងញូវដេល្លីរងការបំពុលខ្លាំង គឺដោយសារតែកន្លែងចតរថយន្តមានការកើនឡើងជាបន្តបន្ទាប់ ហើយនៅរដូវរងារ ឥណ្ឌាបានដុតអុសនិងប្រាស់សម្ភារៈទប់ស្កាត់ភាពត្រជាក់ច្រើន ផ្តល់ជាផលអាក្រក់ដល់បរិស្ថាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ