ប្រជាជនឥណ្ឌាបោះឆ្នោតរើសតំណាងរាស្ត្រ ក្នុងភាពតានតឹងផ្នែកសាសនា
ថ្ងៃចន្ទ៧មេសានេះ ប្រជាជនឥណ្ឌានាំគ្នាទៅបោះឆ្នោតរើសតំណាងរាស្ត្រ។ អ្នកមានឈ្មោះក្នុងបញ្ជីបោះឆ្នោត មានប្រមាណជា៨១៤លាននាក់ គឺលើសពីអ្នកបោះឆ្នោតឆ្នាំ២០០៩ ដល់ទៅ ១០០លាននាក់។ ក្នុងការបោះឆ្នោតជាតិឆ្នាំ ២០១៤នេះ គេរំពឹងថា លោក ណារេនដ្រា ម៉ូឌី Narendra Modi បេក្ខជនមានប្រជាប្រិយភាពមកពីបក្សជាតិនិយមហិណ្ឌូ អាចទទួលជ័យជំនះលើលោក រ៉ាហ៊ូល ហ្កាន់ឌី Rahul Gandhi បេក្ខជនបក្សសមាជ ជាបក្សកាន់អំណាចឥណ្ឌា។ បក្សជាតិនិយមហិណ្ឌូបានចោទបក្សកាន់អំណាចថា បរាជ័យក្នុងការកែលំអជីវិតរស់នៅរបស់អ្នកកាន់សាសនាអ៊ីស្លាមក្នុងស្រុក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
នៅថ្ងៃចន្ទនេះ ប្រជាជនឥណ្ឌាមានមិនតិចជាង៨១៤លាននាក់នោះទេ ដែលត្រូវទៅបោះឆ្នោតរើសតំណាងរាស្ត្រអាណត្តិថ្មី។ ការបោះឆ្នោតជាតិឆ្នាំ ២០១៤នេះ ធ្វើឡើងជា៩ដំណាក់កាល ហើយត្រូវបិទបញ្ចប់នៅថ្ងៃ១២ឧសភាខាងមុខ។ យោងតាមការស្ទាបស្ទង់មតិ លោក ណារេនដ្រា ម៉ូឌី ជាបេក្ខជនមានប្រជាប្រិយភាព មកពីបក្សជាតិនិយមហិណ្ឌូ អាចនឹងទទួលជោគជ័យលើ លោករ៉ាហ៊ូល ហ្កាន់ឌី មកពីបក្សសមាជដែលជាបក្សកាន់អំណាចបច្ចុប្បន្ន។ លោកណារេនដ្រា ជាអ្នកកាន់កាប់រដ្ឋហ្គូចារ៉ាត នៅភាគខាងលិច ចាប់តាំងពីឆ្នាំ២០០១មក។ លោករ៉ាហ៊ូលវិញ ជាកូនប្រុសរបស់លោកស្រីសូញ៉ា ហ្កាន់ឌី ប្រធានបក្សសមាជឥណ្ឌាសព្វថ្ងៃ។
ក្រោយឡើងកាន់អំណាច១០ឆ្នាំមកនេះ បក្សសមាជបានធ្លាក់ប្រជាប្រិយភាពខ្លាំង ដោយសារតែសេដ្ឋកិច្ចឥណ្ឌាជួបអតិផរណា និងកំណើនយឺតយ៉ាវ។ ប្រឈមនឹងបក្សកាន់អំណាច បក្សជាតិនិយមហិណ្ឌូរបស់លោកលោក ណារេនដ្រា ម៉ូឌី បានលើកឡើងពីគោលនយោបាយជំរុញសំទុះសេដ្ឋកិច្ច ការវិនិយោគ និងជួយអោយប្រជាជនអោយមានការងារធ្វើ ដើម្បីឃោសនារកសម្លេងឆ្នោតពីប្រជាជន។
នៅថ្ងៃអាទិត្យនេះ លោកណារេនដា ម៉ូឌី បានចោទបក្សសមាជ ដែលជាបក្សកាន់អំណាច ថាបរាជ័យក្នុងការរៀបចំកែលំអជីវិតរស់នៅរបស់អ្នកកាន់សាសនាអ៊ីស្លាមដែលមាន១៣ភាគរយ ក្នុងចំណោមប្រជាជនជាង១ពាន់២រយលាននាក់ ក្នុងប្រទេស។ ដោយឡែក កន្លងមក បក្សជាតិនិយមហិណ្ឌូខ្លួនឯងផ្ទាល់ ធ្លាប់រងការចោទប្រកាន់ថា បានញុះញង់អោយមានភាពតានតឹងផ្នែកសាសនា។ រដ្ឋហ្គូចារ៉ាតភាគខាងលិចឥណ្ឌា របស់បេក្ខជនណារេនដ្រា មកពីបក្សជាតិនិយមហិណ្ឌូ បានរងអំពើហិង្សាបង្ហូរឈាម គួរអោយកត់សំគាល់ ជាអំពើហិង្សាបង្កឡើងដោយជម្លោះសហគមន៍សាសនា ក្នុងឆ្នាំ២០០២។ អំពើហិង្សាកាលណោះ បានសម្លាប់មនុស្សជាង១ពាន់នាក់ ភាគច្រើនជាអ្នកកាន់សាសនាអ៊ីស្លាម។
តុលាការឥណ្ឌាមិនបានចាប់ទោសកំហុសលោកណារេនដ្រា ដែលជាអ្នកគ្រប់គ្រងរដ្ឋហ្គូចារ៉ាតនោះទេ។ ប៉ុន្តែ កងកម្លាំងការពាររដ្ឋនេះ បានរងការចោទប្រកាន់ថា អសកម្មក្នុងការការពារសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ