តុលាការកំពូលឥណ្ឌាទទួលស្គាល់វត្តមានមនុស្សភេទទី៣
នៅឥណ្ឌា ថ្ងៃអង្គារនេះ តុលាការកំពូលបានសម្រេចទទួលស្គាល់នូវវត្តមានមនុស្សភេទទី៣ ពោលគឺមិនមែនភេទប្រុស និងមិនមែនភេទស្រី ជាភេទដែលមិនលំអៀងទៅរកភេទណាទាំងអស់។ តុលាការបានបញ្ជាអោយរដ្ឋាភិបាលនិងគ្រប់រដ្ឋទាំងអស់ក្នុងប្រទេស ផ្តល់សិទ្ធិនិងជំនួយសង្គមអោយដល់មនុស្សភេទទី៣នេះ ដូចជាមនុស្សដទៃទៀតដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១១
នៅឥណ្ឌាថ្ងៃអង្គារនេះ តុលាការកំពូលបានទទួលស្គាល់នូវវត្តមានមនុស្សភេទទី៣ ដោយបានលើកឡើងថា ការទទួលស្គាល់នេះ មិនមែនជាបញ្ហាទាក់ទងនឹងសង្គម ឬក៏វេជ្ជសាស្ត្រនោះទេ តែវាជាប្រធានបទទាក់ទងសិទ្ធិមនុស្ស។ តុលាការកំពូលឥណ្ឌា បានដាក់បញ្ជាអោយរដ្ឋាភិបាលនិងអាជ្ញាធរគ្រប់រដ្ឋទាំងអស់ ផ្តល់សិទ្ធិរឺក៏ជំនួយសង្គម ដល់ពួកគេ ដូចជាមនុស្សដទៃទៀតដែរ។
កាលពីឆ្នាំ២០១២ ក្រុមមនុស្សមួយក្រុមដឹកនាំដោយលោក ឡាក់មី ណារ៉ាយ៉ាន ទ្រីប៉ាធី ជាសកម្មជនដែលបណ្តាមនុស្សភេទទី៣ តែងតែស្គាល់ច្បាស់នោះ ក្រុមនេះបានដាក់ពាក្យបណ្តឹងទៅតុលាការ អោយតុលាការទទួលស្គាល់នូវសិទ្ធិនានារបស់មនុស្សមានភេទទី៣នេះ។ ដោយឡែក ទាក់ទងនឹងមនុស្សភេទទី៣នេះ កាលពីដើមខែមេសានេះ តុលាការកំពូលអូស្ត្រាលីបានសម្រេចថា ក្នុងអត្រានុកូលដ្ឋាន គេអាចទទួលស្គាល់ថា មនុស្សម្នាក់ជាមនុស្សភេទទី៣។ រីឯអាល្លឺម៉ង់ និងនេប៉ាល់វិញ បានអនុញ្ញាតអោយប្រជាជនខ្លួនកត់ត្រាក្នុងលិខិតឆ្លងដែនថា ខ្លួនមានភេទ X ដើម្បីបញ្ជាក់ពីមនុស្សភេទទី៣នេះ។
ទោះជាតុលាការឥណ្ឌាទទួលស្គាល់វត្តមានមនុស្សភេទទី៣ក្តី ការស្រលាញ់មនុស្សមានភេទដូចគ្នា នៅតែត្រូវចាត់ទុកថា ជាបទឧក្រិដ្ឋក្នុងប្រទេស។ កាលពីខែធ្នូឆ្នាំ២០១៣ តុលាការកំពូលឥណ្ឌាបានបដិសេធនូវការសុំអោយមិនដាក់ពិន័យដល់មនុស្សស្រលាញ់ភេទដូចគ្នានេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ