កម្ពុជា -

អត្ថបទចុះផ្សាយនៅថ្ងៃ អាទិត្យ 16 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 17 កញ្ញា 2012

លោកស្រីអៀង ធីរិទ្ធត្រូវបានដោះលែងចេញពីមន្ទីរឃុំឃាំងហើយ

លោកស្រី អៀង ធីរិទ្ធិ អតីតរដ្ឋមន្រ្តីក្រសួងសង្គមកិច្ចនៃរបបខ្មែរក្រហម

REUTERS/Mark Peters/ECCC/Handout/Files

ដោយ ប៉ែន បូណា

អង្គជំនុំជម្រះតុលាការកំពូលនៃសាលាក្តីខ្មែរក្រហមបានសម្រេចឲ្យដោះលែងលោកស្រី អៀង ធីរិទ្ធ ចេញពីមន្ទីរឃុំឃាំងហើយក្រោមលក្ខខណ្ឌមួយចំនួន។ លោកស្រីអៀង ធីរិទ្ធ ត្រូវបានក្រុមគ្រួសារមកទទួលចេញពីមន្ទីរឃុំឃាំងនៃសាលាក្តីខ្មែរក្រហមនៅរសៀលថ្ងៃអាទិត្យនេះ។ ការដោះលែងលោកស្រីអៀង ធីរិទ្ធ បានធ្វើឡើងបន្ទាប់ពីអ្នកជំនាញវេជ្ជសាស្ត្របានរកឃើញថា លោកស្រីមានជំងឺវង្វេងបាត់ការចងចាំដែលមិនអាចចូលរួមសវនាការបានទេ។

សេចក្តីរាយការណ៍របស់ ប៉ែន បូណា ពីភ្នំពេញ

ស្តាប់ (02:31)

16/09/2012

លោកស្រីអៀង ធីរិទ្ធ ត្រូវបានដោះលែងចេញពីមន្ទីរឃុំឃាំងនៃសាលាក្តីខ្មែរក្រហមហើយ នៅវេលាម៉ោង១និង៤០នាទីរសៀលថ្ងៃអាទិត្យទី១៦កញ្ញានេះ។ ការដោះលែងនេះធ្វើឡើងក្រោមលក្ខខណ្ឌមួយចំនួនដូចជា ទី១៖ ជនជាប់ចោទត្រូវជូនដំណឹងដល់សាលាក្តីអំពីអាសយដ្ឋានដែលខ្លួនស្នាក់នៅ ហើយមិនត្រូវផ្លាស់ប្តូរទីលំនៅដោយគ្មានការអនុញ្ញាតឡើយ។ ទី២៖ ជនជាប់ចោទអៀង ធីរិទ្ធ ត្រូវប្រគល់លិខិតឆ្លងដែន និងលិខិតធ្វើដំណើរផ្សេងទៀតដល់អាជ្ញាធរ និងមិនត្រូវធ្វើដំណើរចេញពីប្រទេសកម្ពុជាឡើយ។ទី៣៖ ត្រូវគោរពតាមដីកាកោះរបស់តុលាការ។

លោក នេត្រ ភក្ត្រា អ្នកនាំពាក្យសាលាក្តីខ្មែរក្រហមបានប្រាប់វិទ្យុបារាំងអន្តរជាតិនៅថ្ងៃនេះថា លោកស្រីអៀង ធីរិទ្ធ ត្រូវបានក្រុមគ្រួសារមកទទួលពីមន្ទីរឃុំឃាំងនៅរសៀលថ្ងៃនេះ ដោយគេមិនទាន់ដឹងថា លោកស្រីត្រូវទៅស្នាក់នៅទីណានៅឡើយទេ។ ប៉ុន្តែ មុនពេលចាប់ខ្លួន លោក ស្រី អៀង ធីរិទ្ធ និងស្វាមី គឺលោក អៀង សារី បានស្នាក់នៅក្នុងគេហដ្ឋានក្នុងទីក្រុងភ្នំពេញ។

សូមបញ្ជាក់ថា អង្គជំនុំជម្រះសាលាដំបូងនៃសាលាក្តីខ្មែរក្រហមបានសម្រេច កាលពីថ្ងៃទី១៣ កញ្ញា ថា លោកស្រីអៀង ធីរិទ្ធ ពិតជាមានជំងឺវង្វេងស្មារតីមិនអាចចូលរួមសវនាការបានទេ ហើយត្រូវដោះលែងជនជាប់ចោទរូបនេះពីមន្ទីរឃុំឃាំងដោយគ្មានលក្ខខណ្ឌបង្ខំអ្វីឡើយ។
ប៉ុន្តែ ការិយាល័យសហព្រះរាជអាជ្ញានៃសាលាក្តីខ្មែរក្រហមបានប្តឹងទាស់ភ្លាមៗចំពោះការសម្រេចនេះ។

ការិយាល័យសហព្រះរាជអាជ្ញាបានបញ្ជាក់ថា ខ្លួនបានយល់ស្របទាំងស្រុងក្នុងការដោះលែងលោកស្រី អៀង ធីរិទ្ធ ដោយសារលោកស្រីគ្មានសម្បទាគ្រប់គ្រាន់ក្នុងការចូលរួមសវនាការ។ ប៉ុន្តែ ការដោះលែងលោកស្រីអៀង ធីរិទ្ធ មិនគួរធ្វើឡើងដោយគ្មានលក្ខខណ្ឌនោះទេ។ សហព្រះរាជអាជ្ញាបានទាមទារឲ្យអង្គជំនុំជម្រះតុលាការកំពូលដាក់លក្ខខណ្ឌចាំបាច់មួយចំនួនចំពោះលោកស្រីអៀង ធីរិទ្ធ ហើយតុលាការកំពូលក៏បានយល់ស្រប។

លោកស្រីអៀង ធីរិទ្ធ អាយុ ៨០ ឆ្នាំ ជាអតីតរដ្ឋមន្ត្រីសង្គមកិច្ចនៃរបបខ្មែរក្រហម ត្រូវបានចាប់ខ្លួនកាលពីខែវិច្ឆិកា ឆ្នាំ ២០០៧ ជាមួយនឹងស្វាមី គឺលោក អៀង សារី អតីតរដ្ឋមន្ត្រីការបរទេសខ្មែរក្រហម។ អ្នកទាំងពីរត្រូវបានសាលាក្តីខ្មែរក្រហមចោទពីបទឧក្រិដ្ឋកម្មសង្គ្រាម និងប្រល័យពូជសាសន៍ដែលបានប្រព្រឹត្តក្នុងចន្លោះឆ្នាំ ១៩៧៥ និងឆ្នាំ ១៩៧៩ ។ បើយោងតាមលោក នេត្រ ភក្ត្រា ទោះបីជាលោកស្រីត្រូវបានដោះលែងនៅពេលនេះ ប៉ុន្តែ បទចោទប្រកាន់ទៅលើលោកស្រីនៅតែរក្សាដដែល៕

tags: តុលាការខ្មែរក្រហម