កម្ពុជា -

អត្ថបទចុះផ្សាយនៅថ្ងៃ សុក្រ 26 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 26 តុលា 2012

លោកនាយករដ្ឋមន្ត្រី ហ៊ុន សែនច្រានចោលសំណើរបស់លោក សម រង្ស៊ី

លោកនាយករដ្ឋមន្ត្រីហ៊ុន សែន

ដោយ លី ម៉េងហួរ

លោកនាយករដ្ឋមន្ត្រី ហ៊ុន សែន បានច្រានចោលការស្នើសុំរបស់លោក សម រង្ស៊ី ដែលចង់វិលត្រឡប់ចូលមកប្រទេសកម្ពុជា ដើម្បីគោរពព្រះវិញ្ញាណក្ខន្ធសម្តេចព្រះមហាវីរក្សត្រ សម្តេចព្រះ នរោត្តម សីហនុ។ លោកនាយករដ្ឋមន្ត្រី បានលើកយករឿងហេតុកន្លងមក ដែលលោកសម រង្ស៊ី មានជំហរប្រឆាំងដាច់ខាត ហើយរិះគន់រូបលោកថា ជាអាយ៉ង។ នេះបើតាមដំណឹង ដែលលោក ខៀវ កាញារីទ្ធ អ្នកនាំពាក្យរដ្ឋាភិបាល និងជារដ្ឋមន្ត្រីក្រសួងព័ត៌មាន បានផ្សព្វផ្សាយ ចេញពីកិច្ចប្រជុំគណៈរដ្ឋមន្ត្រី នាព្រឹកថ្ងៃសុក្រ ទី ២៦ តុលានេះ។

ក្នុងកិច្ចប្រជុំគណៈរដ្ឋមន្ត្រី ដោយបិទទ្វារ នៅព្រឹកថ្ងៃសុក្រនេះ លោកនាយករដ្ឋមន្ត្រី ហ៊ុន សែន បានប្រកាសប្រាប់មន្ត្រីជាន់ខ្ពស់របស់លោក អំពីសំណើសុំសម្របសម្រួល ដើម្បីបើកផ្លូវឲ្យលោក សម រង្ស៊ី បានវិលត្រឡប់ ចូលក្នុងប្រទេសកម្ពុជា ដើម្បីគោរពព្រះវិញ្ញាណក្ខន្ធសម្តេចព្រះមហាវីរក្សត្រ នរោត្តម សីហនុ ក្នុងព្រះបរមរាជវាំង។

សេចក្តីប្រកាសរបស់លោកនាយករដ្ឋមន្ត្រី ហ៊ុន សែន ត្រូវបានលោក ខៀវ កាញារីទ្ធ រដ្ឋមន្ត្រីក្រសួងព័ត៌មាន និងជាអ្នកនាំពាក្យរដ្ឋាភិបាលកម្ពុជា ដកស្រង់ យកមកចុះផ្សព្វផ្សាយ តាម Facebook របស់លោក។

ដំណឹង ក្នុង Facebook របស់លោក ខៀវ កាញារីទ្ធ ដែលសរសេរជាភាសាអង់គ្លេស បានបង្ហាញថា លោកនាយករដ្ឋមន្ត្រី ហ៊ុន សែន បានចោទជាសំណួរ ថាតើឲ្យលោក អាចសម្រេចលើការស្នើសុំរបស់លោក សម រង្ស៊ី យ៉ាងម៉េចនឹងកើត បើកន្លងមក លោក សម រង្ស៊ី បានប្រកាសថា លោកនឹងមិនជជែកពិភាក្សាជាមួយនឹងលោក ហ៊ុន សែន ទេ ពីព្រោះតែលោក ហ៊ុន សែន គឺជាអាយ៉ង។ លោក សម រង្ស៊ី ធ្លាប់បានអះអាងថា លោកនឹងពិភាក្សាតែជាមួយនឹងចៅហ្វាយនាយរបស់លោក ហ៊ុន សែនប៉ុណ្ណោះ។ ដូច្នេះលោកនាយករដ្ឋមន្ត្រី បានប្រកាសថា ទុកឲ្យលោក សម រង្ស៊ី ដើរទៅតាមផ្លូវរបស់គាត់ទៅចុះ!។

សេចក្តីប្រកាសរបស់រដ្ឋមន្ត្រីក្រសួងព័ត៌មាន ដែលបានដកស្រង់ប្រសាសន៍របស់លោកនាយករដ្ឋមន្ត្រី ហ៊ុន សែន មកចុះផ្សាយយ៉ាងដូច្នេះ បានធ្វើឡើង តែប៉ុន្មានថ្ងៃប៉ុណ្ណោះ បន្ទាប់ពីលោក សម រង្ស៊ី ដែលត្រូវតុលាការប្រទេសកម្ពុជា ផ្តន្ទាទោសទោសកំបាំងមុខ បានព្យាយាមសរសេរលិខិតពីរលើក ថ្វាយព្រះមហាក្សត្រ និងថ្នាក់ដឹកនាំកំពូលទាំង៣ របស់គណបក្សប្រជាជនកម្ពុជា ពិសេសលោកនាយករដ្ឋមន្ត្រី ហ៊ុន សែន ដើម្បីស្វែងរកអន្តរាគមន៍ ឲ្យលោកបានវិលត្រឡប់មកកម្ពុជាវិញ ដើម្បីចូលមកគោរពព្រះវិញ្ញាណក្ខន្ធសម្តេចព្រះមហាវីរក្សត្រ សម្តេចព្រះ នរោត្តម សីហនុ នៅក្នុងព្រះបរមរាជវាំង។

ការសម្រេចបិទផ្លូវមិនឲ្យលោកសម រង្ស៊ី បានវិលត្រឡប់មកកម្ពុជាវិញ នៅពេលនេះ ត្រូវបានលោក សុន ឆ័យ ប្រធានក្រុមអ្នកតំណាងរាស្ត្រគណបក្សសមរង្ស៊ី បានប្រាប់អ្នកកាសែត នៅថ្ងៃនេះ ពីការសោកស្តាយរបស់លោក។ តាមលោក សុន ឆ័យ ការយាងចូលទិវង្គតរបស់ព្រះករុណា សម្តេចព្រះមហាវីរក្សត្រ ពេលនេះ ជាឱកាសមួយ សម្រាប់ការបើកផ្លូវ សម្រួលនយោបាយក្នុងប្រទេសកម្ពុជា៕