លោកនាយករដ្ឋមន្ត្រី ហ៊ុន សែន ចេញបទបញ្ជា ផ្អាកផ្តល់សម្បទានដីសេដ្ឋកិច្ច
នៅថ្ងៃ៧ឧសភានេះ លោកនាយករដ្ឋមន្ត្រី ហ៊ុន សែន បានចុះហត្ថលេខាលើបទបញ្ជាមួយ សម្រេចផ្អាកជាបណ្តោះអាសន្ន នូវការផ្តល់ដីសម្បទានសេដ្ឋកិច្ច។ លោកនាយករដ្ឋមន្ត្រី ក៏បានបញ្ជាឲ្យអាជ្ញាធរមានសមត្ថកិច្ច ផ្តោតការយកចិត្តទុកដាក់លើការអនុវត្តន៍កិច្ចសន្យា ស្តីពីដីសម្បទានសេដ្ឋកិច្ច ពិសេសគឺការអនុវត្តន៍តាមគោលនយោបាយ រូបមន្តស្បែកខ្លា និងការមិនធ្វើឲ្យប៉ះពាល់ដល់ដីធ្លីសហគមន៍ និងជីវភាពរស់នៅរបស់ប្រជាពលរដ្ឋ។ អាជ្ញាធរក៏ត្រូវពិនិត្យ ដកហូតដីសម្បទាន ពីក្រុមហ៊ុនណា ដែលមិនគោរពច្បាប់ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:១៦
បទបញ្ជា ចុះថ្ងៃទី៧ ខែឧសភា ឆ្នាំ២០១២ ស្តីពី វិធានការពង្រឹង និងបង្កើនប្រសិទ្ធភាពនៃការគ្រប់គ្រងដីសម្បទានសេដ្ឋកិច្ច របស់លោកនាយករដ្ឋមន្ត្រី ហ៊ុន សែន បានធ្វើឡើង តាមតម្រូវការចាំបាច់ និងបន្ទាន់ចំពោះមុខ ក្នុងការធានាសមធម៌ និងបង្កើនប្រសិទ្ធិភាព នៃការគ្រប់គ្រងដីសម្បទានដីសេដ្ឋកិច្ច។ ក្នុងបទបញ្ជា ដែលមាន ៤ ចំណុច លោកនាយករដ្ឋមន្ត្រី ហ៊ុន សែន ក៏បានតម្រូវឲ្យក្រសួង ស្ថាប័ន និងអាជ្ញាធរ ដែលមានសមត្ថកិច្ចពាក់ព័ន្ធ ត្រូវអនុវត្តឲ្យមានប្រសិទ្ធិភាពខ្ពស់ និងផ្តោតការយកចិត្តទុកដាក់លើការអនុវត្តន៍កិច្ចសន្យាស្តីពីសម្បទានដីសេដ្ឋកិច្ច ពិសេសគឺការអនុវត្តន៍តាមគោលនយោបាយរូបមន្តស្បែកខ្លា និងការមិនធ្វើឲ្យប៉ះពាល់ដល់ដីធ្លីសហគមន៍ និងជីវភាពរស់នៅរបស់ប្រជាពលរដ្ឋ។
តាមបទបញ្ជា ចំពោះក្រុមហ៊ុនដែលបានគោលការណ៍អនុញ្ញាតពីរាជរដ្ឋាភិបាលរួចហើយ តែមិនបានអនុវត្តតាមនីតិវិធីច្បាប់ជាធរមាន និងតាមកិច្ចសន្យា ដោយកាប់ឈើលក់ ហើយមិនធ្វើការអភិវឌ្ឍន៍ដីសម្បទាន ទន្ទ្រានដីបន្ថែម ទុកដីចោលទំនេរសម្រាប់លក់បន្ត ធ្វើអាជីវកម្មខុសលក្ខខណ្ឌនៃកិច្ចសន្យា បំពានដីរបស់ប្រជាពលរដ្ឋ ឬដីសហគមន៍ រដ្ឋាភិបាលនឹងដកហូតនូវដីសម្បទានសេដ្ឋកិច្ចទាំងនោះមកវិញ។ ដីសម្បទានសេដ្ឋកិច្ច ដែលត្រូវបានដកហូតមកវិញនោះ នឹងត្រូវដាក់ឲ្យស្ថិតនៅក្រោមការគ្រប់គ្រងរបស់រដ្ឋ ដោយផ្ទាល់។ លោកនាយករដ្ឋមន្ត្រី ហ៊ុន សែន ក៏បានសម្រេចថា ចំពោះដីសម្បទានសេដ្ឋកិច្ច ដែលបានទទួលការអនុញ្ញាតជាគោលការណ៍ពីរដ្ឋាភិបាលរួចហើយ មុនថ្ងៃចេញបទបញ្ជា នៅថ្ងៃ៧ឧសភានេះ ត្រូវបន្តអនុវត្តតាមគោលការណ៍ច្បាប់ និងនីតិវិធីជាធរមាន។
បទបញ្ជារបស់ប្រមុខរដ្ឋាភិបាលយ៉ាងដូច្នេះ បានធ្វើឡើង ខណៈដែលលោក សុរិយា ស៊ូប៊ែឌី ( Surya Subedi ) អ្នករាយការណ៍ពិសេស អង្គការសហប្រជាជាតិ ស្ដីពីស្ថានភាពសិទ្ធិមនុស្សនៅកម្ពុជា កំពុងទស្សនកិច្ចផ្លូវការ ចាប់ពីថ្ងៃទី៤ ដល់ថ្ងៃទី១១ ខែឧសភា ដោយផ្តោតសំខាន់លើការផ្តល់ដីសម្បទាន និងផលប៉ះពាល់ដល់សហគមន៍ នៅកម្ពុជា។ ការសម្រេចរបស់លោកនាយករដ្ឋមន្ត្រីខាងលើ ត្រូវបានលោក ចាន់ សុវ៉េត អនុប្រធានផ្នែកស៊ើបអង្កេត របស់អង្គការសិទ្ធិមនុស្ស អាដហុក បានសាទរចំពោះចំណាត់ការ ដែលលោកចាត់ទុកថា ហាក់ដូចជា យឺតពេលបន្តិចលើបញ្ហាដីសម្បទានសេដ្ឋកិច្ច ព្រោះបញ្ហាដីសម្បទាន មានទំនាស់ជាមួយប្រជាពលរដ្ឋ ចាប់តាំងពីឆ្នាំ២០០៩។
សកម្មជនសិទ្ធិមនុស្ស ក៏បានជំរុញឲ្យរដ្ឋាភិបាល ត្រូវតែដកហូតដីសម្បទាន ពីក្រុមហ៊ុនឯកជន ដែលកើតជម្លោះជាមួយប្រជាពលរដ្ឋ ទើបអាចដោះស្រាយទំនាស់ដីធ្លីនៅកម្ពុជា ដែលកំពុងកើតមាន នាពេលសព្វថ្ងៃ។ ដីសម្បទានសេដ្ឋកិច្ចនៅកម្ពុជា ត្រូវបានអង្គការសិទ្ធិមនុស្ស អាដហុក លើកឡើងថា ក្នុងឆ្នាំ២០១១ រដ្ឋាភិបាលបានចេញអនុក្រឹត្យចំនួន ១២៣ ដើម្បីផ្តល់ដីសម្បទានសេដ្ឋកិច្ចទៅឲ្យក្រុមហ៊ុនឯកជន ចំនួន ៧៥១.៨៨២ ហិកតា។ ផ្ទៃដីជាង ២ ភាគ ៣ បានកាត់ចេញពីដីការពារដោយព្រះរាជក្រឹត្យ ដែលជាតំបន់ការពារសត្វព្រៃ និងព្រៃឈើ។ គិតមកទល់នឹងឆ្នាំ២០១១ អាដហុក រកឃើញថា រដ្ឋាភិបាលបានផ្តល់ដីសម្បទានសេដ្ឋកិច្ច យ៉ាងហោចណាស់ ២.២៧៦.៣៤៩ ហិកតា ទៅដល់ក្រុមហ៊ុនឯកជនចំនួន ២២៥ ក្រុមហ៊ុន តាមរយៈក្រសួងកសិកម្ម និងតាមរយៈអនុក្រឹត្យ ផ្តល់ដីសម្បទានសេដ្ឋកិច្ច ពីប្រមុខរាជរដ្ឋាភិបាលដោយផ្ទាល់។ នេះមិនទាន់រាប់បញ្ចូលដីសម្បទានតាមក្រសួងដទៃទៀត សម្រាប់រុករករ៉ែ និងបង្កើតតំបន់សេដ្ឋកិច្ចពិសេសទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ