លោក ហ៊ុន សែន ប្រកាសឲ្យប្រើគោលនយោបាយគាំពារកុមារតូចនិងអំពាវនាវឲ្យរក្សាសន្តិភាព
គោលនយោបាយជាតិនិងផែនការសកម្មភាពស្តីពីការគាំពារនិងអភិវឌ្ឍកុមារតូចនៅកម្ពុជាត្រូវបានប្រកាសឲ្យប្រើប្រាស់ជាផ្លូវការហើយនៅថ្ងៃចន្ទទី០១កញ្ញានេះដោយលោកនាយករដ្ឋមន្ត្រី ហ៊ុន សែន ។ ទន្ទឹមនឹងការប្រកាសឲ្យប្រើគោលនយោបាយគាំពារកុមារតូចនេះ ប្រមុខរដ្ឋាភិបាលក៏បានអំពាវនាវថែរក្សាសន្តិភាពដែលលោកចាត់ទុកជាមូលដ្ឋានគ្រឹះនៃការអភិវឌ្ឍប្រទេស។
ចុះផ្សាយនៅថ្ងៃ៖
ស្តាប់ - ០២:០០
គោលនយោបាយជាតិនិងផែនការសកម្មភាពឆ្នាំ ២០១៤ - ២០១៨ ដែលត្រូវបានប្រកាសឲ្យប្រើពេលនេះ ត្រូវបានតាក់តែងឡើងក្រោមការសម្របសម្រួលរបស់ក្រសួងអប់រំ និងមានកិច្ចសហការ ពីក្រសួងនិងស្ថាប័នចំនួន ១០ ផ្សេងទៀត។ គោលនយោបាយនេះសំដៅលើកស្ទួយកុមារតូចដែលមានចំនួនប្រហែល ១លាននាក់ឬស្មើជាង ១១ភាគរយនៃប្រជាជនសរុប។
យោងតាមតួលេខដែលផ្សាយដោយក្រសួងអប់រំនិងអង្គការយូនីសេហ្វ នៅកម្ពុជា មានកុមារតូចអាយុក្រោម៦ឆ្នាំ ៤០% មានបញ្ហាក្រិន កុមារ ២៨% មានទំងន់មិនគ្រប់ កុមារ ១១% មានសភាពស្គមស្គាំង។ ក្រៅពីនោះ បញ្ហាកង្វះអាហារូបត្ថម្ភមានជាប់ពាក់ព័ន្ធទៅនឹងការស្លាប់របស់កុមារជាង ៦៤០០ ករណីជារៀងរាល់ឆ្នាំ។ មានកុមារអាយុ ៣-៥ ឆ្នាំ តែ ៣៣% ប៉ុណ្ណោះ ដែលចុះឈ្មោះចូលរៀន ក្នុងកម្មវិធីអប់រំកុមារតូច។
ក្នុងហេតុផលនេះហើយបានជាគណៈកម្មាធិការជាតិគាំពារ និងអភិវឌ្ឍន៍កុមារតូច ត្រូវបានបង្កើតឡើង។ លោកនាយករដ្ឋមន្ត្រី ហ៊ុន សែន បានជំរុញឲ្យមន្ត្រីពាក់ព័ន្ធ និងអាជ្ញាធរដែនដីយកចិត្តទុកដាក់ពិតប្រាកដដល់ការការពារកុមារតូច។ ទន្ទឹមនឹងនោះដែរ ប្រមុខរដ្ឋាភិបាលខ្មែរក៏បានអំពាវនាវផងដែរឲ្យរក្សាសន្តិភាពនៅកម្ពុជាដែលជាមូលដ្ឋានគ្រឹះនៃការគិតគូរអំពីគោលនយោបាយផ្សេង។ លោកអះអាងថា ប្រសិនបើស្រុកមានសង្គ្រាមវឹកវរ គេមិនអាចនិយាយអំពីអាហារូបត្ថម្ភរបស់កុមារបានទេ។ លោក ហ៊ុន សែន បានលើកឧទាហរណ៍ពីសង្គ្រាមនៅស៊ីរី អ៊ីរ៉ាក់ និងលីប៊ីជាដើមដែលធ្វើឲ្យកុមារជាច្រើនរងគ្រោះទាំងផ្លូវកាយនិងផ្លូវចិត្ត។
គោលនយោបាយថ្នាក់ជាតិដែលត្រូវបានប្រកាសឲ្យប្រើពេលនេះមានគោលដៅផ្ដល់ការគាំទ្រដល់ខួរក្បាលរបស់កុមារ ដែលកំពុងតែមានការអភិវឌ្ឍ គាំទ្រដល់ការរៀនឡើងថ្នាក់របស់កុមារឱ្យបានទាន់ពេលវេលា នៅក្នុងប្រព័ន្ធអប់រំ និងលើកកម្ពស់សុខភាពផ្លូវកាយ និងផ្លូវចិត្ដរបស់កុមារពេញមួយជីវិតរបស់ពួកគេក្នុងនាមជាទំពាំងស្នងឫស្សី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ