បញ្ហាសិទ្ធិមនុស្សភូមានឹងត្រូវគេលើកទៅជជែក នៅក្នុងកិច្ចប្រជុំអាស៊ាននៅទីក្រុងណៃពីដ៍រ
ភូមាបើកទ្វារ នៅថ្ងៃសុក្រទី ៨សីហា ទទួលរៀបចំកិច្ចប្រជុំអាស៊ានថ្នាក់រដ្ឋមន្រ្តីការបរទេស ដែលនឹងត្រូវបញ្ចប់នៅថ្ងៃអាទិត្យ។ ក្រៅតែពីផ្តោតសំខាន់ទៅលើជម្លោះនៅសមុទ្រចិនខាងត្បូង ជំនួបប្រជុំថ្នាក់អន្តរជាតិនឹងធ្វើឲ្យគេសើរើ និយាយឡើងវិញផងដែរពីបញ្ហាគោរពសិទ្ធិ មនុស្ស និងកំណែទម្រង់ដែលរដ្ឋាភិបាលភូមាថ្មីធ្លាប់បានសន្យាធ្វើ ជាថ្នូរនឹងការដកទណ្ឌកម្មសេដ្ឋកិច្ចពីប្រទេសលោកខាងលិច។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
រដ្ឋាភិបាលស៊ីវិលភូមាបានប្រសូត្រចេញពីការបោះឆ្នោត នៅឆ្នាំ ២០១១ បន្ទាប់ពីរបបសឹកបានរំលាយខ្លួន។ នៅក្នុងរយៈពេលប៉ុន្មានឆ្នាំដំបូង រដ្ឋាភិបាលភូមាថ្មីបានបង្ហាញឆន្ទះធ្វើកំណែ ទម្រង់យ៉ាងស្វាហាប់ ដោយបានដោះលែងលោកស្រីអ៊ុងសាន ស៊ូជី ដែលជាមេដឹកនាំបក្សប្រឆាំងដ៏សំខាន់របស់ភូមា និងបានបើកសិទ្ធិសេរីភាពដល់អ្នកកាសែត។ កិច្ចប្រឹងប្រែងធ្វើកំណែទម្រង់នយោបាយ និងសេដ្ឋកិច្ចរបស់រដ្ឋាភិបាលភូមាថ្មីត្រូវបានសហគមន៍អន្តរជាតិ ជាពិសេសប្រទេសលោកខាងលិចស្វាគម និងដកចោលទណ្ឌកម្មសេដ្ឋកិច្ចដែលគេធ្លាប់ដាក់ទៅលើភូមា ដោយសារនយោបាយផ្តាច់ការរបស់របបសឹកកន្លងមក។
ប៉ុន្តែ នៅ ប៉ុន្មានខែចុងក្រោយនេះ ពោលគឺមួយឆ្នាំមុនការបោះឆ្នោតសភា នៅឆ្នាំ ២០១៥ កំណែទម្រង់សន្យាដោយរដ្ឋាភិបាលស៊ីវិលភូមាថ្មីហាក់នៅទ្រឹង ឬសឹងដើរថយក្រោយ បន្ទាប់ពីមានការចាប់ខ្លួនអ្នកកាសែត និងអំពើហិង្សាទៅលើក្រុមអ្នកកាន់សាសនាអ៊ីស្លាមនៅភូមា។ អង្គការអ្នកការពារសិទ្ធិមនុស្សអន្តរជាតិបានចោទប្រកាន់រដ្ឋាភិបាលភូមាថា មិនជួយអន្តរាគម ផ្ទុយទៅវិញ បណ្តោយទុកឲ្យក្រុមពុទ្ធសាសនាជ្រុលនិយម នៅភូមាប្រព្រឹត្តអំពើហិង្សាទៅលើសហគមន៍អ៊ីស្លាម។ មួយវិញ ទៀត គេព្រួយបារម្ភផងដែរពីការរឹតបន្តឹងទៅលើសេរីភាពបញ្ចេញមតិ បន្ទាប់ពី តុលាការភូមាទើបបានកាត់ទោស អ្នកកាសែត៥នាក់ ឲ្យជាប់ គុក១០ឆ្នាំ និងធ្វើការងារដោយបង្ខំ បន្ទាប់ពីអ្នកកាសែតទាំងនោះព្យាយាមរាយការណ៍ពីបន្ទាយផលិតអាវុធគីមីរបស់កងទ័ពភូមា។
តាមអនុរដ្ឋមន្រ្តីការបរទេសអាមេរិកទទួលបន្ទុកតំបន់អាស៊ីបូព៌ា និងប៉ាស៊ីហ្វិក លោកចន ឃេរីដែលត្រូវចូលរួមនៅក្នុងកិច្ចប្រជុំអាស៊ាន នៅថ្ងៃអាទិត្យ និងនិយាយរំលឹកឲ្យអាជ្ញាធរភូមាគោរពសិទិ្ធមនុស្ស និងជំរុញលទ្ធិប្រជាធិបតេយ្យ។ តាមរដ្ឋមន្រ្តីការបរទេសម្នាក់ដែលសុំមិនបញ្ចេញឈ្មោះ នៅពេលដែលការបោះឆ្នោតកាន់តែខិតចូលមកដល់ រដ្ឋាភិបាលភូមាដាក់គំនាបកាន់តែខ្លាំងទៅលើសេរីភាពបញ្ចេញមតិ ជាពិសេសប្រព័ន្ធផ្សព្វផ្សាយ។
នៅមួយឆ្នាំមុនការបោះឆ្នោតសភា គណបក្សប្រឆាំងរបស់លោកស្រីអ៊ុងសាន ស៊ូជីវិញកំពុងប្រមូលបានញត្តិគាំទ្រពីប្រជាជនជិត ៥លាននាក់ ក្នុងចំណោមប្រជាជនមានសិទ្ធិបោះឆ្នោត ២០លាននាក់ ដើម្បីទាមទារឲ្យមានវិសោធនកម្មរដ្ឋធម្មនុញ្ញ។ ធ្វើវិសោធនកម្មលើរដ្ឋធម្មនុញ្ញ គណបក្សប្រឆាំងចង់ឲ្យគេកែប្រែច្បាប់ ដើម្បីកាត់បន្ថយចំនួនកៅអីរបស់កងទ័ពនៅសភា និងលុបចោលច្បាប់ដែលអាចរារាំងលោកស្រីអ៊ុងសាន ស៊ូជី មិនឲ្យឈរឈ្មោះជាបេក្ខជនប្រធានាធិបតីភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ