ប៉េកាំងនឹងដាក់ទោសអ្នកតំណាងសភាហុងកុងម្នាក់ដែលហ៊ានរិះគន់ប្រមុខដឹកនាំហុងកុង
សមាជិកសភាហុងកុងម្នាក់ស្និតនឹងប៉េកាំង លោក James Tien អាចនឹងបាត់បង់មុខតំណែងជាន់ខ្ពស់ក្នុងបក្សកុម្មុយនិស្តចិន បន្ទាប់ពីបានហាមាត់រិះគន់ប្រមុខរដ្ឋាភិបាលហុងកុងលោក លឿងជន់យីង( Leung Chun-ying)- នេះបើយោងតាមការអះអាងរបស់លោក Michel Tien ដែលជាប្អូន ប្រុសប្រាប់ដល់ទីភ្នាក់ងារព័ត៌មានបារាំង AFP នៅថ្ងៃពុធ២៩តុលានេះ ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ជាសមាជិកសភាហុងកុងស្និទ្ធនឹងប៉េកាំង លោក James Tien ក៏ជាអ្នកនយោបាយនិងអ្នកជំនួញ ដ៏សំខាន់ម្នាក់នោះ បានថ្លែងរិះគន់យ៉ាងចំហលើរូបចៅហ្វាយក្រុងហុងកុងលោក លឿងជន់យីង (Leung Chun-ying )កាលពីសប្តាហ៍មុន ថាគួរតែលាលែងចេញពីមុខតំណែង ពីព្រោះ លោកមិនអាចបិទបញ្ចប់ចលនាបាតុកម្មទាមទារលិទ្ធិប្រជាធិបតេយ្យ។ បាតុកម្មដែលបាន ធ្វើឲ្យសង្កាត់នានានៅហុងកុងកកស្ទះ គ្មានសកម្មភាពជាងមួយខែមកហើយ។
“ការរិះគន់ប្រមុខរដ្ឋាភិបាលហុងកុងត្រង់ៗនេះ ប្រហែលជាមូលហេតុដ៏ចំបង ដែលអាចធ្វើឲ្យលោក James បាត់បង់តួនាទីជាន់ខ្ពស់នៅក្នុងបក្សកុម្មុយនិស្តចិន” -នេះបើយោងតាមការអះអាងបញ្ជាក់របស់លោកMichel Tien ដែលជាប្អូនប្រុសនិងក៏ជាសមាជិកសភាមួយរូបដែរ។
គួររំលឹកថា គណបក្សកុម្មុយនិស្តចិន តែងតែការពារជានិច្ចប្រមុខដឹកនាំនៅហុងកុង ហើយ កាលពីម្សិលមិញបានប្រកាសគាំទ្រលោកលឿងជន់យីងនិងអះអាងថា ប៉េកាំងនឹងរារាំង មិនឲ្យមានអន្តរាគមន៍ពីខាងក្រៅណាមួយនៅហុងកុងឬក៏នៅម៉ាកាវទេ។
លោក James Tien សមាជិកសភាមកពីគណបក្សសេរីហុងកុង ជាក្រុមអ្នកនយោបាយការពារប្រយោជន៍សេដ្ឋកិច្ចនិងជំនួញ។ លោក បានបដិសេធមិនឆ្លើយនឹងសំណួរអ្នកកាសែតជុំវិញជោគវាសនានយោបាយរបស់លោកទេ។
រឿងអាស្រូវចង់ដកហូតតំណែងតំណាងសភាហុងកុងនេះ ប្រព្រឹត្តទៅនៅខណៈដែលបាតុករប្រជាធិបតេយ្យទើបបានជួបជុំគ្នាប្រារព្ធខួបមួយខែនៃចលនាបាតុកម្មបិទខ្ទប់សង្កាត់ជាទីស្នាក់ការរដ្ឋអំណាចហុងកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ