ប្រធានាធិបតីបារាំងតែងតាំងរដ្ឋាភិបាលថ្មីក្រោមភាពចម្រូងចម្រាសនៅក្នុងជួរគណបក្សកាន់អំណាច
ក្រោយពីបានរំលាយរដ្ឋាភិបាលចាស់ចោល កាលពីថ្ងៃចន្ទ លោកហ្វ្រង់ស័រ ហូឡង់ ប្រធានាធិបតីបារាំង បានប្រកាសតែងតាំងសមាជិករដ្ឋាភិបាលថ្មី ដោយជម្រុះចោលនូវរដ្ឋមន្រ្តីមួយចំនួន ដែលបានរិះគន់ជាសាធារណៈចំពោះនយោបាយសេដ្ឋកិច្ចរបស់រដ្ឋាភិបាល។ ក៏ប៉ុន្តែ រដ្ឋាភិបាលថ្មីនេះត្រូវបានបង្កើតឡើងក្រោមភាពចម្រូងចម្រាសនៅក្នុងជួរគណបក្សកាន់អំណាច ហើយដែលអាចនឹងធ្វើឲ្យការបោះឆ្នោតផ្តល់សេចក្តីទុកចិត្តពីរដ្ឋសភានឹងត្រូវជួបនឹងបញ្ហា។
ចុះផ្សាយនៅថ្ងៃ៖
ស្តាប់ - ០១:៥៣
បើពិនិត្យមើលជារួម រដ្ឋាភិបាលថ្មី ដែលលោកហ្វ្រង់ស័រ ហូឡង់ តែងតាំង កាលពីល្ងាចថ្ងៃអង្គារម្សិលមិញនេះ មិនសូវជាមានអ្វីផ្លាស់ប្តូរពីរដ្ឋាភិបាលចាស់នោះទេ។ នាយករដ្ឋមន្រ្តីនៅតែដដែល គឺលោក Manuel Valls។ ចំណែកសមាសភាពរដ្ឋាភិបាលវិញក៏ស្រដៀងនឹងរដ្ឋាភិបាលមុនដែរ គឺមានរដ្ឋមន្រ្តី ១៦រូប (ស្រី ៨រូប និងប្រុស ៨រូប) និងរដ្ឋលេខាធិការ ១៧រូប ហើយរដ្ឋមន្រ្តីដែលកាន់ក្រសួងណា នៅក្នុងរដ្ឋាភិបាលចាស់ ភាគច្រើននៅកាន់ក្រសួងដដែលក្នុងរដ្ឋាភិបាលថ្មី។
ទោះជាយ៉ាងណា គេសង្កេតឃើញមានរដ្ឋមន្រ្តីចំនួន ៣រូប ដែលត្រូវបានគេចាប់អារម្មណ៍ខ្លាំងជាងគេ នៅក្នុងរដ្ឋាភិបាលថ្មីនេះ គឺរដ្ឋមន្រ្តីក្រសួងអប់រំ ដែលជាស្រ្តី ពីព្រោះ នេះគឺជារឿងមិនធ្លាប់មាន នៅក្នុងប្រវត្តិសាធារណរដ្ឋទី៥របស់បារាំង។ រដ្ឋមន្រ្តីមួយរូបទៀត ក៏ជាស្រ្តីដែរ គឺលោកស្រី Fleur Pellerin ពលរដ្ឋបារាំងដើមកំណើតកូរ៉េខាងត្បូង ដែលត្រូវបានតែងតាំងជារដ្ឋមន្រ្តីក្រសួងវប្បធម៌ និងព័ត៌មាន។ នេះគឺជាលើកទីមួយហើយដែលពលរដ្ឋបារាំង ដើមកំណើតអាស៊ីត្រូវបានតែងតាំងជារដ្ឋមន្រ្តី។
រដ្ឋមន្រ្តីមួយរូបទៀតដែលជាចំណុចចាប់អារម្មណ៍កាន់តែខ្លាំង គឺរដ្ឋមន្រ្តីក្រសួងសេដ្ឋកិច្ច ដែលពីមុនធ្លាប់កាន់តំណែងសំខាន់នៅក្នុងធនាគារឯកជន។ បើនិយាយតាមលក្ខណៈទូទៅ អ្នកធ្លាប់ធ្វើការឲ្យធនាគារមកកាន់តំណែងជារដ្ឋមន្រ្តីក្រសួងសេដ្ឋកិច្ច មិនមែនជារឿងចម្លែកនោះទេ។ ក៏ប៉ុន្តែ វាជារឿងចម្លែក សម្រាប់រដ្ឋាភិបាលក្រោមអាណត្តិរបស់លោកហ្វ្រង់ស័រ ហូឡង់ ដែលជារដ្ឋាភិបាលដឹកនាំដោយគណបក្សសង្គមនិយម មានគោលនយោបាយប្រឆាំងនឹងពួកមូលធននិយម ជាពិសេស ធនាគារ និងអ្នកជួញដូរមូលបត្រ។
ការតែងតាំងអ្នកធ្លាប់ធ្វើការក្នុងវិស័យធនាគារឯកជនឲ្យមកកាន់តំណែងជារដ្ឋមន្រ្តីក្រសួងសេដ្ឋកិច្ចនេះហើយ ដែលកំពុងតែបង្កឲ្យមានបញ្ហាចម្រូងចម្រាសកាន់តែខ្លាំង នៅក្នុងជួរគណបក្សសង្គមនិយម ហើយដែលអាចនឹងធ្វើឲ្យរដ្ឋាភិបាលថ្មីនេះត្រូវប្រឈមមុខនឹងចលនាប្រឆាំងពីក្នុងសមាជិកសភាមកពីគណបក្សខ្លួនឯង នៅពេលឆ្លងកាត់ការបោះឆ្នោតសុំសេចក្តីទុកចិត្តពីសភា នៅក្នុងពេលឆាប់ៗខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ