នាយករដ្ឋមន្ត្រីហូឡង់សុំអោយអ៊ុយក្រែនបញ្ឈប់ការប្រយុទ្ធនៅជិតកន្លែងធ្លាក់យន្តហោះម៉ាឡេស៊ី
ថ្ងៃអង្គារនេះ នាយករដ្ឋមន្ត្រីប្រទេសហូឡង់បានទូរសព្ទទៅប្រធានាធិបតីអ៊ុយក្រែន សុំអោយកងទ័ពអ៊ុយក្រែនបញ្ឈប់ការប្រយុទ្ធជាមួយក្រុមបះបោរ នៅជិតកន្លែងកើតហេតុការណ៍ធ្លាក់យន្តហោះម៉ាឡេស៊ី នៅភាគខាងកើតអ៊ុយក្រែន។ ដោយសារការប្រយុទ្ធនេះ ក្រុមអ្នកស៊ើបអង្កេតគ្រោះថ្នាក់យន្តហោះ ត្រូវបង្ខំចិត្តលុបចោលការងារខ្លួន ជាថ្មីម្តងទៀត នៅថ្ងៃអង្គារនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
នាយករដ្ឋមន្ត្រីហូឡង់ លោកម៉ាក រុតតឺ Mark Rutte បានទូរសព្ទផ្ទាល់មាត់ទៅលោកពេត្រូ ប៉ូរ៉ូឆិនកូ សុំអោយអ៊ុយក្រែនបញ្ឈប់ប្រតិបត្តិការយោធា ប្រឆាំងក្រុមបះបោរ នៅភាគខាងកើត ជិតកន្លែងកើតហេតុធ្លាក់យន្តហោះម៉ាឡេស៊ី កាលពីថ្ងៃ១៧កក្កដា។ មូលហេតុ គឺដោយសារតែក្រុមអ្នកស៊ើបអង្កេតហូឡង់ និងអូស្ត្រាលី ពិបាកនឹងចូលទៅកន្លែងយន្តហោះធ្លាក់ ព្រោះតែការប្រយុទ្ធរវាងកងទ័ពអ៊ុយក្រែន និងក្រុមផ្តាច់ទឹកដីនិយម នៅតែបន្តឥតឈប់។
គួររំលឹកថា យន្តហោះម៉ាឡេស៊ី ដឹកអ្នកដំណើរ២៩៨នាក់ ធ្វើដំណើរពីក្រុងអាំស្ទែរដាំ ប្រទេសហូឡង់ ឆ្ពោះទៅក្រុងកូឡាឡុំពួរ ប៉ុន្តែត្រូវរងមីស៊ីល ធ្លាក់ឆេះនៅភាគខាងកើតអ៊ុយក្រែន។ មនុស្សទាំង២៩៨នាក់ ស្លាប់គ្មានសល់។ សាកសពជនរងគ្រោះ២០០នាក់ ត្រូវបានបញ្ជូនទៅប្រទេសហូឡង់ ហើយ ដើម្បីកំណត់អត្តសញ្ញាណ។
ប្រធានាធិបតីអ៊ុយក្រែន ប៉ូរ៉ូឆិនកូ បានសន្យានឹងនាយករដ្ឋមន្ត្រីហូឡង់ថា លោកនឹងធ្វើទៅតាមលទ្ធភាពរបស់លោក ដើម្បអោយក្រុមស៊ើបអង្កេតបានចុះទៅដល់កន្លែងយន្តហោះធ្លាក់។ ដោយឡែក ទាក់ទងនឹងវិបត្តិអ៊ុយក្រែន ក្រុមជំនាញអង្គការសន្តិសុខនិងសហប្រតិបត្តិការអឺរ៉ុប ត្រូវចុះទៅដល់តំបន់រ៉ូសស្តូវ Rostov នៅភាគខាងត្បូងរុស្ស៊ី នៅថ្ងៃអង្គារនេះ ដើម្បីពិនិត្យប៉ុស្តិ៍ត្រួតពិនិត្យ ចំនួន២ ដែលជាប់សង្ស័យថា មានសកម្មភាពដឹកសម្ភារៈយោធាឆ្លងកាត់ទីនោះ យកទៅជួយក្រុមបះបោរអ៊ុយក្រែន។ ក្រុមអង្គការសន្តិសុខអឺរ៉ុបនឹងចាប់ផ្តើមការត្រួតពិនិត្យខ្លួននៅថ្ងៃពុធនេះ។
ដោយឡែក ក្រុមអ្នកជំនាញអឺរ៉ុប មានសិទ្ធិត្រួតពិនិត្យបានតែទីកន្លែងមួយផ្នែកនៅតាមព្រំដែនរវាងរុស្ស៊ីនិងអ៊ុយក្រែនប៉ុណ្ណោះ។ ប្រមុខការទូតរុស្ស៊ីស៊ែរហ្កី ឡាវ្រ៉ូវ ប្រាប់អង្គការសន្តិសុខអឺរ៉ុបថា អង្គការអាចប្រើយន្តហោះដ្រូន រឺក៏ផ្កាយរណបបាន ដើម្បីត្រួតពិនិត្យព្រំដែន។ អង្គការសន្តិសុខនិងសហប្រតិបត្តិការអឺរ៉ុប ប្រាប់ថា ប្រើយន្តហោះដ្រូនសម្រាប់តែបេសកកម្មក្នុងទឹកដីអ៊ុយក្រែនប៉ុណ្ណោះ អង្គការមិនប្រើវានៅតាមព្រំដែនរវាងអ៊ុយក្រែននិងរុស្ស៊ីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ