កម្ពុជា-បរិស្ថាន -

អត្ថបទចុះផ្សាយនៅថ្ងៃ ព្រហស្បតិ៍ 26 មេសា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 28 មេសា 2012

អ្នកការពារបរិស្ថានត្រូវបាញ់សម្លាប់នៅកោះកុង

លោក ឈុត វុទ្ធី ប្រធានអង្គការការពារបរិស្ថាន ដែលត្រូវគេបាញ់សម្លាប់

RFI/Leang Delux

ដោយ លាង ដឺលុច

ប្រធានអង្គការការពារបរិស្ថានលោក ឈុត វុទ្ធីនិងមន្ត្រីកងរាជអាវុធហត្ថម្នាក់បានស្លាប់នៅក្នុងហេតុការណ៍ផ្ទុះអាវុធមួយកាលពីវេលាម៉ោង១២ថ្ងៃត្រង់២៦មេសានេះនៅស្រុកថ្មបាំងខេត្តកោះកុង។ នៅក្នុងព្រឹត្តិការណ៍នោះ អ្នកកាសែតរបស់ព្រឹត្តិបត្តិThe Cambodia Daily ២នាក់ត្រូវបានឃាត់ខ្លួនផងដែរ។ ក្លឹបអ្នកកាសែតកម្ពុជា បានសម្តែងការព្រួយបារម្ភចំពោះការឃាត់ខ្លួនអ្នកកាសែតនោះ។

សេចក្តីរាយការណ៍របស់ លាង ដឺលុច ពីទីក្រុងភ្នំពេញ

ស្តាប់ (01:22)

26/04/2012 by លាង ដឺលុច

ប្រធានអង្គការការពារធនធានធម្មជាតិលោកឈុត វុទ្ធីបានស្លាប់នៅក្នុងហេតុការណ៍ផ្ទុះអាវុធមួយនៅកាលពីវេលាថ្ងៃត្រង់ថ្ងៃព្រហស្បតិ៍ទី២៦មេសានេះ។ នៅក្នុងហេតុការណ៍នោះ មានអ្នកកាសែតស្រ្តីរបស់ព្រឹត្តិបត្តិ The Cambodia Daily ២នាក់ គឺជនជាតិខ្មែរម្នាក់ និងជនជាតិអាមេរិកកាំងម្នាក់ផងដែរ។

មន្ត្រីសម្របសម្រួលរបស់អង្គការលីកាដូប្រចាំខេត្តកោះកុងបានរៀបរាប់អោយដឹងថា លោកឈុត វុទ្ធីជាប្រធានអង្គការការពារធម្មជាតិបានជូនដំណើរអ្នកកាសែតរបស់ Cambodia Dailyទៅយកព័ត៌មាននៅក្នុងព្រៃជ្រៅអំពីការកាប់ព្រៃឈើ។ នៅតាមផ្លូវលោកឈុត វុទ្ធី បានថតរូបគំនរឈើមួយរបស់អង្គការ Wild Aid។

មន្ត្រីអង្គការលីកាដូដែលបានទទួលព័ត៌មានពីមន្ត្រីប៉ូលីសដែលចុះស៊ើបអង្កេតបញ្ហានេះបានបន្តប្រាប់វិទ្យុបារាំងអន្តរជាតិថា មន្ត្រីអង្គការ Wiild Aid បានស្នើអោយមន្ត្រីកងរាជអាវុធហត្ថម្នាក់មកសួរនាំសុំដកយករូបថត។ ប៉ុន្តែលោកឈុត វុទ្ធី មិនព្រមប្រគល់រូបថតនោះអោយឡើយ ទើបមានការហេតុការណ៍បាញ់លើរថយន្តដែលមានលោកឈុត វុទ្ធីនិងអ្នកកាសែតតែម្តង។ ហើយគ្រាប់ចុងក្រោយ បានផ្លាតមកត្រូវមន្ត្រីកងរាជអាវុធហត្ថវិញបណ្តាលអោយស្លាប់ដូចគ្នា។

នៅល្ងាចថ្ងៃព្រហស្បតិ៍នេះ លោកចាន់ សុវេត មន្ត្រីស៊ើបអង្កេតរបស់សមាគមការពារសិទ្ធិមនុស្ស អាដហុក បានអះអាងអោយដឹងថាអ្នកកាសែតស្ត្រី២នាក់របស់ Cambodia Daily នោះ ត្រូវបានដោះលែងអោយមានសេរីភាពវិញហើយ។ រីឯសាកសពរបស់លោកឈុត វុទ្ធីត្រូវបានរថយន្តសង្គ្រោះរបស់មន្ទីរពេទ្យបង្អែកខេត្តកោះកុងដឹកយកមកដំកល់នៅមន្ទីរពេទ្យបង្អែកកោះកុង៕