Delicious
Digg
Facebook
Twitter
Yahoo!
Technorati
កម្ពុជា -
អត្ថបទចុះផ្សាយនៅថ្ងៃ ចន្ទ 29 តុលា 2012 -
ព័ត៌មានទើបកែប្រើលើកចុងក្រោយ ថ្ងៃ ចន្ទ 29 តុលា 2012
លោក ហ៊ុនសែន៖ រដ្ឋាភិបាលមិនទាន់មានលទ្ធភាពតម្លើងប្រាក់ខែមន្ត្រីរាជការ និងគ្រូបង្រៀនទេ
លោកនាយករដ្ឋមន្ត្រី ហ៊ុន សែន
RFI/Ly Meng Hour
នៅព្រឹកថ្ងៃចន្ទនេះ លោកនាយករដ្ឋមន្ត្រី ហ៊ុន សែន បានប្រកាសថា ប្រាក់ខែមន្ត្រីរាជការ ពិសេសគ្រូបង្រៀនមិនអាចដំឡើងតាមការទាមទារបានទេ។ គឺប្រាក់ខែគ្រូបង្រៀនត្រូវដំឡើងជាដំណាក់កាល ហើយនៅក្នុងឆ្នាំ២០១៣ ខាងមុខ រដ្ឋាភិបាលសម្រេចតម្លើង ២០% ដូចអ្វីដែលធ្លាប់ធ្វើជារៀងរាល់ឆ្នាំ។ ការបញ្ជាក់របស់នាយករដ្ឋមន្ត្រីដូច្នេះបានធ្វើឡើង បន្ទាប់ពីក្រុមគ្រូបង្រៀន កាលពីថ្ងៃ៥ តុលា ក្នុងទិវាគ្រូបង្រៀនពិភពលោក បានទាមទារតម្លើងប្រាក់ខែ រហូតដល់ ១លានរៀល ឬស្មើប្រមាណ ២៥០ ដុល្លារ។
ក្នុងពិធីចែកសញ្ញាប័ត្រដល់និស្សិតបញ្ចប់ការសិក្សា របស់សាកលវិទ្យាល័យអាស៊ី-អឺរ៉ុប នាព្រឹកថ្ងៃចន្ទ ទី២៩ ខែតុលា ឆ្នាំ២០១២ លោកនាយករដ្ឋមន្ត្រី ហ៊ុន សែន បានលើកឡើងថា ការដំឡើងប្រាក់ខែមន្ត្រីរាជការ ពិសេសគ្រូបង្រៀន ត្រូវគិតពីបញ្ហាជាតិ ដោយលោកបានលើកយកហេតុផលនៃការចំណាយថវិកាជាតិ តាមបែបបច្ចេកទេសមកពន្យល់។ នោះគឺការចំណាយរបស់រដ្ឋាភិបាលគ្រប់ផ្នែកទាំងអស់ ត្រូវស្ថិតនៅត្រឹម ៤០ ភាគរយនៃការចំណាយចរន្ត។ លោកនាយករដ្ឋមន្ត្រី ហ៊ុន សែនបានលើកឡើងថា ឥឡូវនេះ រដ្ឋាភិបាលបានចំណាយកើនឡើងរហូតដល់ ៤២ ភាគរយ ស្មើនឹង ៤,៧ភាគរយនៃ GDP។
លោកនាយករដ្ឋមន្ត្រី ហ៊ុន សែន បានមានប្រសាសន៍ថា "ខ្ញុំគិតថា បើយើងយកមួយច្បិចៗ និយាយតែរឿងប្រាក់ខែៗមកនិយាយ គឺមិនបាច់ចាំធ្វើដឹកនាំជាតិទេ។ ដឹកនាំរលាយតែម្តង។ គេមានគោលដៅរបស់គេច្បាស់ណាស់!។ ត្រូវចំណាយលើផ្អែកអីប៉ុន្មាន? ស្មើនឹងប៉ុន្មានភាគរយ នៃ GDP នៃផលិតផលសរុបក្នុងស្រុក ? បើនិយាយពីចំណាយលើបុគ្គលិកដែលរួមមានទាំងមន្ត្រីរាជការ កងកម្លាំងប្រដាប់អាវុធ គ្រូបង្រៀនស្អីៗ សមាជិករដ្ឋសភា សមាជិកព្រឹទ្ធសភាស្អីៗ ដែលហៅថា ចំណាយជាបៀវត្សរ៍ឲ្យស្ថិតនៅក្នុងកម្រិត ៤% នៃផលិតផលសរុប និង៤០%នៃចំណាយចរន្ត។ ប៉ុន្តែឥឡូវនេះ យើងបានចាយដល់ទៅ ៤២% នៃចំណាយចរន្តបាត់ទៅហើយ ឬស្មើនឹង ៤,៧% នៃផលិតផលសរុប"។
ជាមួយគ្នានោះ លោកនាយករដ្ឋមន្ត្រី ហ៊ុន សែន ក៏បានលើកបញ្ជាក់បន្ថែម ដោយយកឧទាហរណ៍នៅប្រទេសក្រិកដែលកំពុងមានវិបត្តិ ដោយសារតែការតម្លើងប្រាក់ខែមន្ត្រីរាជការ។ លោកនាយករដ្ឋមន្ត្រី ហ៊ុន សែន បានបញ្ជាក់ថា "ឧបមាផ្លូវ ១០០ គីឡូ គេអាចធ្វើបន្តិចម្តងៗ ដូចជំហានគីង្គក់។ ១០០ គីឡូ ធ្វើម្តង ២០ គីឡូ ធ្វើម្តង ៣០ គីឡូ។ អានឹង អាចផ្អាកបាន។ ប៉ុន្តែហៅថា ចំណាយលើប្រាក់ខែហើយ តែចាប់ផ្តើមចាយហើយ គឺចាយអត់មានឈប់ទេ ហើយតែឡើងហើយ ថយមកវិញ កុំសង្ឃឹម។ ឥឡូវមើលទៅ សូម្បីតែប្រទេសក្រិច អាថែមនឹង គឺបាតុកម្មយ៉ាងម៉េច ?។ ដល់តម្លើងៗទៅ អឺរ៉ុបត្រូវប្រកាន់យកវិធានការចាំបាច់មួយ គឺថាបន្ថយប្រាក់ខែ និងបន្ថែមពន្ធ ជើងទាំងពីរដើរទៅជាមួយគ្នា។ អីចឹងបានជាបញ្ហានេះ ត្រូវតែមានការប្រុងប្រយ័ត្ន"។
យ៉ាងណាក៏ដោយ លោកនាយករដ្ឋមន្ត្រី ក៏បានប្រកាសពីការតម្លើងប្រាក់ខែមន្ត្រីរាជការ គ្រូបង្រៀន នៅក្នុងក្របខណ្ឌនយោបាយរបស់ខ្លួន ចំនួន ២០% ជាបន្ត នៅឆ្នាំ២០១៣។ នៅពេលសព្វថ្ងៃ គ្រូបង្រៀននៅថ្នាក់បឋមសិក្សា រហូតដល់វិទ្យាល័យទទួលបានប្រាក់ខែចាប់ពី ២៤០.០០០ រៀល ឬ ៦០ ដុល្លារ រហូតដល់ ៤៤០.០០០ រៀល ឬស្មើប្រមាណ ១១០ ដុល្លារ។ ក្រុមគ្រូបង្រៀនចង់ឲ្យរដ្ឋាភិបាលដំឡើងប្រាក់ខែ ដោយសារតែទំនិញសព្វសារពើនៅលើទីផ្សារឡើងថ្លៃខ្ពស់ ពិសេសប្រេងសាំង៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ (3)
មុននឹងមកធ្វើគ្រូក្រែងដឹងដែរតើ
មុននឹងមកធ្វើគ្រូក្រែងដឹងដែរតើ ថាប្រាក់ខែតិច។ មេចមិនទៅធ្វើស្អីផ្សេងទៅ? ធ្វើគ្រូធ្វើអី?
គ្មានសមត្ថភាពធ្វើ ឬធ្វើមិនបាន?
ខ្ញុំជ្រេញណាស់លោកអើយ! ប្រទេសខ្មែរនិងក្រិកមានស្ថានភាពខុសគ្នា។ យើងមើលប្រទេសយើងដោយប្រើខួរក្បាលជាអ្នកចេះដឹងពីអ្វីទៅហៅថាការដឹកនាំប្រទេស តាមបែបប្រជាធិបតេយ្យមិនមែន
កុម្មុយនីស្ត ស្អីទៅសេដ្ឋកិច្ច អ្វីទៅផ្សារសេរី ស្អីទៅដែលខ្លួនឯងហៅនយោបាយខ្កួនឯងថារដ្ឋាភិបាល
ធារាសាស្រ្តជាដើម។ល។ និងប្រកដទៅដោយបេះដូងជាអ្នកកាន់ព្រះពុទ្ធសាសនា។ ខ្ញុំជារាស្រ្តត្រូវជា
ចៅហ្វាយរបស់រដ្ឋ បញ្ជាឲ្យរដ្ឋាភិបាលធ្វើកិច្ចការដូចខាងក្រោម៖
១. ពិនិត្យឡើងវិញពីចំណូលពន្ធដារ កុំឲ្យចូលក្នុងហោប៉ៅពួកពុករលួយនិងចូលបក្ស។ យកស្ថាប័នទេសចរណ៍អប្សរាពីយួនមកគ្រប់គ្រងដោយរដ្ឋាភិបាលខ្លួនឯងវិញឲ្យមានប្រសិទ្ធភាព។
២. កាត់បន្ថយបុគ្គលិករដ្ឋាភិបាលណាដែលមិនចាំបាច់ ព្រោះពួកនោះកាន់តែច្រើនវារិតតែព្រូតលួចជាតិកាន់តែច្រើន។
៣. ពង្រីក (ពងរីក)សេដ្ឋកិច្ចជាតិ កិច្ចការនេះទូលំទូលាយណាស់វាមិនត្រឹមតែធ្វើឲ្យមានទឹកសម្រាប់
ធ្វើស្រៃ,ផ្តល់ដីសម្បទានសេដ្ឋកិច្ច,បង្កើនទេសចរបរទេសប៉ុណ្ណោះទេ វាមានច្រើនជាងនេះ លុះត្រាតែ
បុគ្គលដែលធ្លាប់បានរៀនសូត្រពីចំណេះនេះទើបធ្វើកើត មនុស្សណាចេះតែកាន់កាំភ្លើង...ធ្វើមិនកើតទេ! បងអើយ!...
...បើធ្វើមិនបាន តើគួរខ្លួនធ្វើម៉េច ខ្លួនដឹងខ្លួនឯងហើយ!
អសមត្ដភាព
លោកនាយករដ្ឋមន្ត្រីគ្មានសមត្ថភាពទេក្នុងការដំលើងប្រាក់ខែ តែបើដំឡើងពន្ធគឺពូកែណាស់ ដូចជាពន្ធដី ផ្ទះ សាំងជាដើម ។ ទំនិញឡើងថ្លៃ និងការដំឡើងប្រាក់ខែមិនសមមាត្រគ្នាទេ ។
ប្រតិកម្មជុំវិញអត្ថបទនេះ