ទីផ្សារអង្ករអន្តរជាតិនិងឱកាសសម្រាប់សេដ្ឋកិច្ចកម្ពុជា
ចុះផ្សាយនៅថ្ងៃ៖
ស្តាប់ - ០៤:៣៣
ការនាំចេញអង្ករ កំពុងតែក្លាយទៅជាវិស័យជាអាទិភាពមួយរបស់កម្ពុជា នៅក្នុងយុទ្ធសាស្រ្តពិពិធកម្មវិស័យនាំចេញរបស់ខ្លួន ដែលរហូតមកទល់នឹងពេលនេះ ពឹងផ្អែកខ្លាំងតែទៅលើវិស័យកាត់ដេរ។ ដោយមើលទៅលើការវិវឌ្ឍនៃទីផ្សារអង្ករអន្តរជាតិ និងសក្តានុពលកសិកម្មរបស់កម្ពុជា គេអាចឃើញថា វិស័យនាំចេញអង្ករនេះ គឺជាឱកាសសេដ្ឋកិច្ចដ៏សំខាន់មួយ សម្រាប់កម្ពុជា។
កាលណានិយាយពីទីផ្សារអង្ករអន្តរជាតិ គេគួរធ្វើការកត់សម្គាល់ត្រង់ចំណុចសំខាន់មួយជាចាំបាច់៖ អង្ករ គឺជាអាហារជាមូលដ្ឋានមិនអាចខ្វះបាន សម្រាប់ប្រជាជនប្រមាណជា ២ភាគ៣ ក្នុងចំណោមប្រជាជនសរុប ទាំង ៧ពាន់លាននាក់ នៅទូទាំងពិភពលោក។ ហេតុដូច្នេះហើយបានជាគេសង្កេតឃើញថា ទីផ្សារអង្ករអន្តរជាតិតែងតែមានកំណើនជាប្រចាំ ទាំងបរិមាណ និងតម្លៃ។ សូម្បីតែនៅក្នុងពេលដែលពិភពលោកទាំងមូលកំពុងស្ថិតក្នុងវិបត្តិសេដ្ឋកិច្ច កាលពីពេលថ្មីៗកន្លងទៅនេះ ក៏ទីផ្សារអង្ករអន្តរជាតិនៅតែមានការកើនឡើងដែរ។
យោងតាមការព្យាកររបស់អង្គការស្បៀងពិភពលោក (FAO) តម្រូវការអង្ករនៅទូទាំងពិភពលោក សម្រាប់ឆ្នាំ២០១៣-២០១៤នេះ អាចនឹងមានរហូតដល់ទៅជាង ៤៩០លានតោន គឺកើនឡើងប្រមាណជា ២,៥% ធៀបនឹងឆ្នាំកន្លងទៅ។ សម្រាប់ឆ្នាំ២០១៤-២០១៥ខាងមុខនេះ តម្រូវការអង្ករនេះអាចនឹងបន្តកើនឡើងតទៅទៀត គឺកើនឡើងរហូតដល់ទៅ ៥០២លានតោន។
បើនិយាយពីការជួញដូរអង្ករនៅលើទីផ្សារអន្តរជាតិវិញ អង្គការ FAO ក៏បានព្យាករពីកំណើនប្រមាណជា ៥% ផងដែរ នៅឆ្នាំ២០១៤នេះ ដោយបរិមាណនៃការជួញដូរអង្ករអន្តរជាតិអាចនឹងកើនឡើងរហូតដល់ទៅប្រមាណជាង ៣៩លានតោន។
តម្រូវការខ្ពស់នៅក្នុងទីផ្សារអន្តរជាតិនេះគឺជាឱកាសសេដ្ឋកិច្ចដ៏សំខាន់មួយ សម្រាប់កម្ពុជា ដែលជាប្រទេសមានផ្ទៃដីកសិកម្មច្រើន មានប្រជាជនភាគច្រើនលើសលុបជាកសិករ ហើយការផលស្រូវមានបរិមាណច្រើនលើសពីតម្រូវការក្នុងស្រុក។
យោងតាមតួលេខរបស់ក្រសួងកសិកម្ម ផលស្រូវរបស់កម្ពុជាដែលសល់ពីតម្រូវការក្នុងស្រុក មានរហូតដល់ទៅ ៤លាន ៧សែនតោន កាលពីឆ្នាំ២០១២កន្លងទៅ ហើយរដ្ឋាភិបាលកម្ពុជាបានកំណត់គោលដៅថានឹងនាំចេញអង្ករឲ្យបានយ៉ាងតិច ១លានតោន នៅឆ្នាំ២០១៥ខាងមុខ ព្រមទាំងមានគោលដៅក្នុងរយៈពេលវែងចង់ឃើញកម្ពុជាក្លាយជាប្រទេសនាំចេញអង្ករលំដាប់ទី៣ នៅលើពិភពលោក។
នៅពេលបច្ចុប្បន្ននេះ ប្រទេសដែលនាំអង្ករចេញច្រើនជាងគេ គឺឥណ្ឌា។ ឥណ្ឌា ទើបនឹងបានដណ្តើមចំណាត់ថ្នាក់លេខ១នេះ ពីប្រទេសថៃ ដែលត្រូវធ្លាក់ទៅនៅលេខ២។ វៀតណាមស្ថិតនៅលំដាប់ទី៣ ចំណែកកម្ពុជាវិញ ជាប់លេខ ៦ ក្រោយប៉ាគីស្ថាន និងសហរដ្ឋអាមេរិក។ ប្រទេសនាំចូលអង្ករសំខាន់ៗវិញ រួមមាន ចិន នីហ្សេរីយ៉ា ហ្វីលីពីន អ៊ីរ៉ង់ អ៊ីរ៉ាក់ និងសហភាពអឺរ៉ុប។
នៅក្នុងចំណោមប្រទេសនាំចូលអង្ករធំៗទាំងនេះ គេឃើញថា ចិនជាប្រទេសដែលមានទំនាក់ទំនងយ៉ាងជិតស្និទ្ធជាមួយកម្ពុជាទាំងផ្នែកនយោបាយ និងសេដ្ឋកិច្ច។ ហ្វីលីពីនទើបនឹងបានចុះកិច្ចព្រមព្រៀងពាណិជ្ជកម្មទ្វេភាគីជាមួយកម្ពុជា កាលពីឆ្នាំ២០១៣កន្លងទៅ ដែលក្នុងនោះក៏មានចែងផងដែរ ពីការបង្កើតការនាំចេញអង្ករពីកម្ពុជាទៅហ្វីលីពីន។ ចំណែកសហភាពអឺរ៉ុបវិញ បានផ្តល់ឲ្យកម្ពុជានូវសិទ្ធិពិសេសមួយក្នុងការនាំផលិតផលទៅលក់នៅក្នុងប្រទេសសមាជិកសហភាពអឺរ៉ុប ដោយមិនយកពន្ធគយ និងដោយគ្មានកូតា គឺតាមរយៈការផ្តួចផ្តើមគំនិតមួយ ដែលគេឲ្យឈ្មោះថា « Everyting But Arms »។ នៅក្នុងចំណោមប្រទេសនាំចេញអង្ករធំៗទាំង ៦ នៅលើពិភពលោក មានតែប្រទេសកម្ពុជាមួយប៉ុណ្ណោះ ដែលទទួលបាននូវការអនុគ្រោះពន្ធពីសហភាពអឺរ៉ុប តាមរយៈការផ្តួចផ្តើមគំនិតនេះ។ នេះគឺជាឱកាសល្អមួយទៀត សម្រាប់កម្ពុជា ក្នុងការបោះជំហានចូលក្នុងទីផ្សារអង្ករអន្តរជាតិ។
ជាក់ស្តែង គេសង្កេតឃើញថា នៅក្នុងចំណោមអង្ករ ដែលកម្ពុជានាំចេញទៅក្រៅប្រទេស ទាំងប្រមាណជាជិត ៤សែនតោន កាលពីឆ្នាំ២០១៣ មានមួយផ្នែកធំ ត្រូវនាំទៅលក់នៅអឺរ៉ុប។ នៅក្នុងប្រទេសបារាំង ជាពិសេស នៅទីក្រុងប៉ារីស អង្កររបស់កម្ពុជាក៏ត្រូវបានគេដាក់លក់យ៉ាងច្រើនផងដែរ ដោយខុសពីពេលមុនៗ ដែលមានតែអង្ករថៃ វៀតណាម និងឥណ្ឌា។
ក៏ប៉ុន្តែ គេឃើញថា អង្កររបស់កម្ពុជា ថ្វីដ្បិតតែទទួលបាននូវការអនុគ្រោះពន្ធពីសហភាពអឺរ៉ុប តែនៅតែមានតម្លៃថ្លៃជាងអង្ករថៃ និងវៀតណាម ដែលមិនបានទទួលការអនុគ្រោះពន្ធទៅវិញ។ នេះ គឺដោយសារតែថ្លៃផលិតអង្ករនៅកម្ពុជា មានកម្រិតខ្ពស់ជាងគូប្រជែង។
ថ្លៃផលិតខ្ពស់ បូករួមជាមួយនឹងការខ្វះខាតសមត្ថភាពផលិតអង្ករដែលមានគុណភាព សម្រាប់នាំចេញ គឺជាបញ្ហាប្រឈមដ៏ធំ សម្រាប់វិស័យនាំចេញអង្កររបស់កម្ពុជា នៅក្នុងពេលបច្ចុប្បន្ននេះ។
ប្រសិនបើកម្ពុជាអាចជម្នះនឹងបញ្ហាប្រឈមធំៗទាំងនេះបាន គេប៉ាន់ប្រមាណថា កម្ពុជាមានសក្តានុពលក្នុងការផលិតអង្ករ រហូតដល់ទៅ ៣លានតោនក្នុងមួយឆ្នាំ សម្រាប់នាំចេញ ដែលគិតជាទឹកប្រាក់រហូតដល់ទៅជាង ២ពាន់លានដុល្លារ ហើយគ្រាន់តែវិស័យនាំចេញអង្ករនេះមួយអាចនឹងជួយជំរុញកំណើនសេដ្ឋកិច្ចកម្ពុជារហូតដល់ទៅ ៥% ក្នុងមួយឆ្នាំៗ ព្រមទាំងបង្កើតការងារ និងបង្កើនប្រាក់ចំណូលដល់ប្រជាជនខ្មែរ ប្រមាណពី ៧០% ទៅ ៨០% ដែលជាកសិករនៅតាមទីជនបទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ