អាល្លឺម៉ង់ប្រកាសសន្យាបញ្ជូនអាវុធទៅជួយក្នុងការប្រយុទ្ធទល់នឹងក្រុមជីហាតអ៊ីរ៉ាក់
រដ្ឋាភិបាលអាល្លឺម៉ង់បានប្រកាស នៅថ្ងៃពុធថា ខ្លួននឹងបញ្ជូនគ្រឿងសព្វាវុធទៅឲ្យពួកគួដ (Kurde) នៅអ៊ីរ៉ាក់ ដើម្បីប្រយុទ្ធតទល់នឹងក្រុមជីហាត។ ការបញ្ជូនគ្រឿងសព្វាវុធទៅបរទេសបែបនេះ គឺជារឿងដ៏កម្រមានបំផុតសម្រាប់អាល្លឺម៉ង់ ដែលធ្លាប់ជាប់ឈ្មោះជាប្រទេសឈ្លានពានគេ នៅក្នុងសង្រ្គាមលោកទាំងពីរ។
ចុះផ្សាយនៅថ្ងៃ៖
ស្តាប់ - ០១:៥៨
លោក Frank-Walter Steinmeier រដ្ឋមន្រ្តីក្រសួងការបរទេសអាល្លឺម៉ង់ នៅក្នុងសន្និសីទសារព័ត៌មានរួមគ្នាជាមួយរដ្ឋមន្រ្តីក្រសួងការពារជាតិ បានប្រកាសថា នៅក្រោយពេលដែលបណ្តាប្រទេសនៅក្នុងសហភាពអឺរ៉ុបបាននាំគ្នាប្រកាសបញ្ជូនគ្រឿងសព្វាវុធទៅជួយក្រុមប្រដាប់អាវុធគួដ ដែលកំពុងប្រយុទ្ធតទល់នឹងក្រុមជីហាត នៅប៉ែកខាងជើងអ៊ីរ៉ាក់ អាល្លឺម៉ង់ក៏កំពុងត្រៀមធ្វើដូចគ្នានេះដែរ។
លោកប្រមុខការទូតអាល្លឺម៉ង់បានហៅទង្វើរបស់ពួកជីហាតអ៊ីរ៉ាក់ ដែលកាប់សម្លាប់ជនស៊ីវិលថាជាទង្វើឃោរឃៅដូចសត្វតិរច្ឆាន ហើយថា ជនភៀសខ្លួនអ៊ីរ៉ាក់កំពុងប្រឈមមុខនឹងក្តីវេទនាដែលមិនអាចពិពណ៌នាបាន។
ទោះជាយ៉ាងណា រដ្ឋមន្រ្តីក្រសួងការបរទេស និងក្រសួងការពារជាតិអាល្លឺម៉ង់សុទ្ធតែបានអះអាងថា នៅក្នុងដំណាក់ដំបូង អាល្លឺម៉ង់នឹងផ្តោតការបញ្ជូនជំនួយមនុស្សធម៌ និងបរិក្ខាយោធាធុនស្រាលជាមុនសិន ដូចជា មួកការពារគ្រាប់ ឧបករណ៍សម្រាប់ឆ្លុះមើលពេលយប់ និងឧបករណ៍សម្រាប់រកគ្រឿងផ្ទុះ។ ចំណែកឯគ្រឿងសព្វាវុធផ្សេងទៀត អាល្លឺម៉ង់នឹងជជែកជាមួយប្រទេសជាដៃគូ ក្នុងសហភាពអឺរ៉ុបជាមុនសិន ដើម្បីឲ្យដឹងគ្នាជាមុនថា តើគួរបញ្ជូនគ្រឿងសព្វាវុធប្រភេទណាដែលមានប្រយោជន៍។
គួររំឭកឡើងវិញថា នៅក្នុងកិច្ចប្រជុំថ្នាក់រដ្ឋមន្រ្តីការបរទេសកាលពីសប្តាហ៍មុន ប្រទេសសមជិកសហភាពអឺរ៉ុបបានព្រមព្រៀងគ្នាថានឹងបញ្ជូនគ្រឿងសព្វាវុធទៅជួយពួកគួដ នៅអ៊ីរ៉ាក់ ដើម្បីប្រយុទ្ធប្រឆាំងនឹងក្រុមជីហាត។ បារាំងបានចាប់ផ្តើមបញ្ជូនគ្រឿងសព្វាវុធទៅខ្លះៗហើយ ចំណែកអង់គ្លេសក៏បានប្រកាសត្រៀមខ្លួនបញ្ជូនគ្រឿងសព្វាវុធទៅអ៊ីរ៉ាក់ដែរ។
នៅអាល្លឺម៉ង់ ការស្ទាបស្ទង់មតិនាពេលថ្មីៗនេះបង្ហាញថា ប្រជាជនភាគច្រើនរហូតដល់ទៅជាង ៦០% ជំទាស់នឹងការបញ្ជូនគ្រឿងសព្វាវុធទៅអ៊ីរ៉ាក់។ គេសង្កេតឃើញថា ចាប់តាំងពីក្រោយសង្រ្គាមលោកលើកទី២មក អាល្លឺម៉ង់ ដែលជាប្រទេសធ្លាប់តែជាប់ឈ្មោះជាប្រទេសឈ្លានពានគេ នៅក្នុងសង្រ្គាមលោកលើកទាំង២ តែងតែប្រកាន់យកនូវជំហរមិនធ្វើអន្តរាគមន៍យោធានៅក្រៅប្រទេស និងមិនបញ្ជូនគ្រឿងសព្វាវុធទៅតំបន់ដែលកំពុងមានជម្លោះប្រដាប់អាវុធ។
ក៏ប៉ុន្តែ លោកស្រីអង់ហ្កេឡា មែរកិល ប្រមុខរដ្ឋាភិបាលអាល្លឺម៉ង់ ធ្លាប់បានលើកឡើង កាលពីពេលថ្មីៗនេះថា ការប្រយុទ្ធប្រឆាំងនឹងក្រុមជីហាតអ៊ីរ៉ាក់ គឺជាកិច្ចការរបស់សហគមន៍អន្តរជាតិទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ