Delicious
Digg
Facebook
Twitter
Yahoo!
Technorati
ចន្ទ 30 មករា 2012
ទ័ពព្រៃអ៊ីស្លាមជ្រុលនិយមនៅប្រទេសថៃ
ភេរវកម្មនៅយ៉ាឡាខាងត្បូងប្រទេសថៃ ថ្ងៃទី៤កញ្ញាឆ្នាំ២០០៩
តាំងពីឆ្នាំ២០០៤មក ភេរវកម្មនិងឃាតកម្មកើតឡើងសឹងមិនលស់ថ្ងៃ នៅតំបន់ប៉ែកខាងត្បូងនៃប្រទេសថៃ។ មកទល់ឥឡូវ គេនៅមិនទាន់ស្គាល់ឈ្មោះអង្គការភេរវកម្មដែលបង្កហិង្សានិងមូលហេតុពិតប្រាកដនៃអំពើសាហាវយង់ឃ្នងទាំងនេះទេ។ ម៉្លោះហើយបានជារដ្ឋាភិបាលថៃនិងសហរដ្ឋអាមេរិកព្រួយបារម្ភខ្លាំងឡើងៗ។
ថៃជាប្រទេសកាន់ព្រះពុទ្ធសាសនា ក៏ប៉ុន្តែមានខេត្តចំនួនបីដែលប្រជាជនភាគច្រើន ជាអ្នកកាន់សាសនាអ៊ីស្លាម គឺណារ៉ាធីវ៉ាត(Narathiwat) ប៉ាត់តានី(Pattani) និងយ៉ាឡា(Yala)។ តាំងពីឆ្នាំ២០០៤មក ខេត្តទាំងបីនេះដែលឋិតនៅប៉ែកខាងត្បូងនៃប្រទេស ជួបប្រទះនឹងអំពើហិង្សាបង្កឡើងដោយពួកអ៊ីស្លាមជ្រុលនិយម។ ដើមដំបូងបង្អស់ នៅខែមករាឆ្នាំ២០០៤ពួកគេបានវាយប្រហារទៅលើបន្ទាយទាហាន និងប៉ុស្តិ៍ប៉ូលិសនៅណារ៉ាធីវ៉ាត។ ជាការឆ្លើយតបវិញ រដ្ឋាភិបាលទីក្រុងបាងកកដែលកាលណោះដឹកនាំដោយលោកថាក់ស៊ីន(Thaksin) បានប្រកាសដាក់តំបន់ប៉ែកខាងត្បូងនៅក្រោមច្បាប់អាជ្ញាសឹក។
ក្រោយមកទៀត នៅខែមេសាឆ្នាំ២០០៤ដដែលនោះ ពួកអ៊ីស្លាមជ្រុលនិយមជាច្រើនរយនាក់ អ្នកខ្លះប្រដាប់ដោយកាំភ្លើង អ្នកខ្លះទៀតប្រដាប់ដោយខ្វែវកាំបិតនិងពូថៅ បានវាយប្រហារជាថ្មីទៅលើបន្ទាយទាហាន និងស្នងការដ្ឋានប៉ូលិស។ នៅក្នុងការប្រយុទ្ធគ្នានោះ ពួកអ៊ីស្លាមជ្រុលនិយមជាងមួយរយនាក់បានបាត់បង់ជីវិត។ ពេលនោះហើយ គឺជាពេលចាប់ផ្តើមឡើងនៃសកម្មភាពទ័ពព្រៃដែលមានបន្តមកទល់សព្វថ្ងៃ។
រហូតមកដល់ថ្ងៃនេះ គេនៅតែរកមិនឃើញឡើយមូលហេតុពិតប្រាកដ ដែលបានជំរុញឲ្យប្រជាជនថៃអ៊ីស្លាមងើបបះបោរប្រឆាំងនឹងអាជ្ញាធរថៃនៅដើមឆ្នាំ២០០៤នោះ។ ក្រុមអ្នកសង្កេតការណ៍ខ្លះអះអាងថា អ្នកដែលបានបង្កហេតុមុនគេគឺទាហានថៃ មិនមែនពួកថៃអ៊ីស្លាមដូចគេថានោះទេ។ ពួកក្រុមអ្នកសង្កេតការណ៍ទាំងនោះពន្យល់ថា អំពើហិង្សាបានកើតឡើងតែប៉ុន្មានសប្តាហ៍ប៉ុណ្ណោះ ក្រោយពីលោកនាយករដ្ឋមន្ត្រីថាក់ស៊ីន បានដកតួនាទីគ្រប់គ្រងសន្តិសុខខេត្តណារ៉ាធីវ៉ាត ប៉ាត់តានី និងយ៉ាឡាពីដៃកងទ័ព និងបានប្រគល់សមត្ថកិច្ចនេះទៅឲ្យប៉ូលិសក្តាប់វិញ។ យោងទៅតាមក្រុមអ្នកសង្កេតការណ៍ដដែលទាំងនោះ សេចក្តីសម្រេចចិត្តបែបនេះរបស់លោកថាក់ស៊ីន បានធ្វើឲ្យពួកនាយទាហានថៃខ្លះបាត់បង់កន្លែងខ្លាញ់ និងបាត់បង់កម្រៃដែលបានមកពីសកម្មភាពមិនស្របច្បាប់ ដូចជាពេស្យាចារនិងការរត់ពន្ធគ្រឿងញៀនជាដើម ហើយបានជំរុញឲ្យពួកនាយទាហានថៃទាំងនោះបង្កហេតុ បញ្ឆេះកំហឹងរបស់ពួកថៃអ៊ីស្លាមដែលរស់នៅក្នុងខេត្តប៉ែកខាងត្បូងទាំងបី។
ក្រុមអ្នកសង្កេតការណ៍ខ្លះទៀតយល់ឃើញថាអង្គការភេរវកម្មJamaah Islamiyahបានចូលទៅអុជអាលឲ្យប្រជាជនថៃអ៊ីស្លាមបះបោរទាមទារឯករាជ្យនិងផ្តាច់ដែនដីប៉ែកខាងត្បូងនៃប្រទេសថៃចេញពីការត្រួតត្រារបស់ទីក្រុងបាងកក។
ទោះជាយ៉ាងណាក៏ដោយ នៅក្នុងដែនដីប៉ែកខាងត្បូងប្រទេសថៃដែលជាប់ព្រំប្រទល់ជាមួយប្រទេសម៉ាឡេស៊ី តែងតែមានអំពើហិង្សាកើតឡើងយូរៗម្តងតាំងពីឆ្នាំ១៩០៩មកម៉្លេះ។ ក៏ប៉ុន្តែ អំពើហិង្សានៅទីនោះ មិនដែលមានលក្ខណៈធំធេងនិងបន្តយូរអង្វែង ដូចពេលនេះទេ។ គួរគូសបញ្ជាក់ថា តាំងពីឆ្នាំ២០០៤មកទល់ឥឡូវ សកម្មភាពទ័ពព្រៃរបស់ពួកអ៊ីស្លាមជ្រុលនិយមនៅប្រទេសថៃ បានបណ្តាលឲ្យមានអ្នកស្លាប់ប្រមាណ៤ ៨០០នាក់ហើយ។
តាំងពីឆ្នាំ២០០៥មក ពួកថៃអ៊ីស្លាមជ្រុលនិយមបានប្តូរយុទ្ធសាស្រ្ត មិនសូវសម្លាប់តំណាងអាជ្ញាធរ ប៉ូលិសឬទាហានដូចមុនទៀតទេ តែវាយប្រហារទៅលើលោកសង្ឃ គ្រូបង្រៀនឬពុទ្ធបរិស័ទវិញម្តង។ ម្យ៉ាងទៀត អ្វីដែលធ្វើឲ្យរដ្ឋាភិបាលថៃបារម្ភ គឺអំពើហិង្សាអាចនឹងរាលដាលចេញពីខេត្តអ៊ីស្លាមទាំងបីចូលទៅដល់តំបន់ផ្សេងៗ និងចូលទៅដល់ទីក្រុងបាងកកតែម្តង។ ឧទាហរណ៍ជាក់ស្តែង នៅខែមករាឆ្នាំ២០០៧ ភេរវកម្មបំផ្ទុះគ្រាប់បែកប្រាំបីកន្លែងសឹងផ្ទួនៗគ្នា ត្រូវបានបង្កឡើងនៅកណ្តាលទីក្រុងបាងកកទៀតផង។ កាលណោះ ក្រុមនាយទាហានដែលបានធ្វើរដ្ឋប្រហារទម្លាក់លោកថាក់ស៊ីនបានចោទថា បក្សពួករបស់លោកថាក់ស៊ីនជាអ្នកនៅពីក្រោយភេរវកម្មទាំងអស់នោះ។
ក៏ប៉ុន្តែកាលណោះ ក្រុមអ្នកសង្កេតការណ៍ខ្លះបាននិយាយថា ភេរវកម្មនៅទីក្រុងបាងកកទាំងអស់នោះអាចជាស្នាដៃរបស់ពួកថៃអ៊ីស្លាមជ្រុលនិយម ដែលចាប់ពីពេលនេះទៅមានបណ្តាញធំនិងមាំជាងមុនរហូតដល់មានលទ្ធភាពចូលមកបង្កភេរវកម្មក្នុងកណ្តាលរាជធានីថៃតែម្តង។
មកទល់ឥឡូវ គេនៅតែពិបាកវិភាគណាស់ទៅលើបាតុភាពទ័ពព្រៃអ៊ីស្លាមជ្រុលនិយមនៅប៉ែកខាងត្បូងនៃប្រទេសថៃ ពីព្រោះ គេមិនដែលស្គាល់ឈ្មោះក្រុមភេរវជនឬអង្គការភេរវកម្ម ដែលបាននិងកំពុងបង្កអំពើហិង្សានៅទីនោះទេ។ តាមមើលទៅ គោលដៅរបស់ពួកថៃអ៊ីស្លាមជ្រុលនិយមគឺពង្រីកបញ្ហា ឲ្យមានលក្ខណៈជាបញ្ហាតំបន់ឬអន្តរជាតិ និងបង្ខំឲ្យរដ្ឋាភិបាលថៃប្រើអំពើហិង្សាឆ្លើយតបទៅនឹងអំពើហិង្សារបស់ពួកគេវិញ ធ្វើយ៉ាងណាដើម្បីឲ្យតំបន់ប៉ែកខាងត្បូងនៃប្រទេសថៃក្លាយជាសមរភូមិមួយថ្មីនៃសង្គ្រាមសាសនាDjihad។
សហរដ្ឋអាមេរិកក៏កំពុងបារម្ភខ្លាំងណាស់ដែរ បារម្ភខ្លាចខេត្តអ៊ីស្លាមទាំងបីនៅខាងត្បូងប្រទេសថៃ ក្លាយជាទីកន្លែងមួយថ្មីនៃDjihadអន្តរជាតិ ក្លាយជាទីកន្លែងថ្មីនៃជំរំបង្ហាត់ហ្វឹកហ្វឺនរបស់ពួកភេរវជនអ៊ីស្លាមជ្រុលនិយមអន្តរជាតិ។ កាលពីប៉ុន្មានឆ្នាំមុន ទីក្រុងវ៉ាស៊ីនតោនថែមទាំងបានស្នើម្តងហើយម្តងទៀតឲ្យប្រទេសថៃយល់ព្រមទទួលកងទ័ពអាមេរិកាំងនៅលើទឹកដីខ្លួន។ តែរដ្ឋាភិបាលថៃមិនព្រម ខ្លាចក្រែងវត្តមានទាហានអាមេរិកាំងទាក់ទាញពួកភេរវជនអ៊ីស្លាមជ្រុលនិយមអន្តរជាតិឲ្យចូលមកក្នុងទឹកដីថៃច្រើនឡើងៗ។
ត្រង់ចំណុចនេះ នៅពាក់កណ្តាលខែមករាឆ្នាំ២០១២នេះ ប៉ុន្មានថ្ងៃប៉ុណ្ណោះក្រោយពីស្ថានទូតអាមេរិកាំងនៅថៃ បានទាញសញ្ញាអាសន្នប្រកាសប្រាប់ថា ភេរវជនមកពីប្រទេសក្រៅត្រៀមវាយប្រហារទៅលើពួកទេសចរបរទេសនៅបាងកក អាជ្ញាធរថៃបានចាប់ខ្លួនជនជាតិលីបង់ម្នាក់។ សម្រាប់ទីក្រុងបាងកក ជនជាតិលីបង់រូបនោះជាសកម្មជនរបស់Hezbollah ដែលជាសត្រូវរបស់អ៊ីស្រាអែលនិងរបស់សហរដ្ឋអាមេរិក។
ម្ល៉ោះហើយមិនយូរមិនឆាប់ ថៃអាចនឹងក្លាយជាផ្ទាំងស៊ីបរបស់ពួកភេរវជនអ៊ីស្លាមជ្រុលនិយមអន្តរជាតិ ពីព្រោះម្យ៉ាង ប៉ែកខាងត្បូងនៃប្រទេសនេះជាសម្បុកនៃពួកថៃអ៊ីស្លាមជ្រុលនិយមអស់រយៈពេលប្រាំបីឆ្នាំកន្លងមកហើយ។ ពីព្រោះម្យ៉ាងទៀត ប្រទេសនេះជាសម្ព័ន្ធមិត្តចាក់ទឹកមិនលិចរបស់សហរដ្ឋអាមេរិក។ និងពីព្រោះម្យ៉ាងចុងក្រោយ ថៃជាប្រទេសពេញនិយមរបស់ពួកទេសចរលោកខាងលិចដែលពួកភេរវជនអ៊ីស្លាមនិយមជ្រុលស្អប់ខ្ពើម៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ