Delicious
Digg
Facebook
Twitter
Yahoo!
Technorati
ពុធ 08 កុម្ភៈ 2012
ក្រោយពីលោក Sergeï Lavrov អញ្ជើញទៅស៊ីរី សហគមន៍អន្តរជាតិនៅតែពុំជឿបាស្ហារអាល-អាស្សាដ
ទីក្រុងដាម៉ាសថ្ងៃទី៧កុម្ភៈឆ្នាំ២០១២អ្នកគាំទ្របាស្ហារអាល-អាស្សាដនាំគ្នាមកស្វាគមទទួលលោក Sergeï Lavrov ប្រមុខការទូតរុស្ស៊ី
© Reuters/Sana
លោកប្រធានាធិបតីស៊ីរីបាស្ហារអាល-អាស្សាដបានប្រកាសនៅថ្ងៃអង្គារម្សិលមិញថា លោកនឹងធ្វើសហការហើយនិងខិតខំធ្វើឲ្យប្រទេសស៊ីរីមានស្ថិរភាពឡើងវិញ ព្រមទាំងបានសន្យាជាមួយសម្ព័ន្ធមិត្តរុស្ស៊ីនាឱកាសទស្សនកិច្ចរបស់លោក Sergeï Lavrov ប្រមុខការទូតរុស្ស៊ីថា លោកនឹងខិតខំបិទបញ្ចប់រាល់ទង្វើហិង្សាដែលកើតមាននៅក្នុងប្រទេសស៊ីរី នៅខណៈដែលសម្ពាធអន្តរជាតិមានកាន់តែខ្លាំងឡើងៗទៅលើទីក្រុងដាម៉ាស។
“លោកប្រធានាធិបតីស៊ីរីបាស្ហារអាល-អាស្សាដបានប្រកាសបញ្ជាក់ថា លោកបានត្រៀមលក្ខណៈជាស្រេចនឹងបញ្ជូនគណៈប្រតិភូទៅជួបចរចាជាមួយបក្សប្រឆាំងនៅទីក្រុងម៉ូស្គូ” នេះជាការថ្លែងឲ្យដឹងដោយ លោក Sergeï Lavrov ប្រមុខការទូតរុស្ស៊ី នាឱកាសទស្សនកិច្ចនៅទីក្រុងដាម៉ាស។ ក៏ប៉ុន្តែសម្មតិកម្មបែបនេះធ្លាប់បានត្រូវក្រុមអ្នកប្រឆាំងស៊ីរីបដិសេធទាត់ចោលរួចទៅហើយកាលពីចុងខែធ្នូកន្លងទៅ។
លោក Sergeï Lavrov ប្រមុខការទូតរុស្ស៊ីបានថ្លែងឲ្យដឹងទៀតថា អ្នកដឹកនាំស៊ីរីបច្ចុប្បន្នចង់ឲ្យ “បេសកកម្ម”នៃក្រុមប្រទេសសម្ព័ន្ធអារ៉ាប់មានការពង្រីកពង្រឹងនិងបន្តកិច្ចការរបស់ខ្លួននៅក្នុងប្រទេសស៊ីរី។ ហើយលោកប្រធានាធិបតីស៊ីរីបាស្ហារអាល-អាស្សាដបានសន្យាទៀតថា នឹងរៀបចំឲ្យមានការបោះឆ្នោតធ្វើប្រជាមតិស្តីពីការបង្កើតឲ្យមានរដ្ឋធម្មនុញ្ញមួយថ្មី និងការបោះឆ្នោតជ្រើសតាំងសមាជិកសភាតាមលក្ខណៈប្រជាធិបតេយ្យ។
នៅចំពោះមុខការសន្យារបស់លោកប្រធានាធិបតីស៊ីរីបាស្ហារអាល-អាស្សាដបែបនេះ សហរដ្ឋអាមេរិកគ្មានជំនឿសោះឡើយទៅលើពាក្យសន្យារបស់ប្រមុខដឹកនាំស៊ីរី។ ទីក្រុងវ៉ាស៊ីនតោនបានបិទទ្វារស្ថានទូតរបស់ខ្លួននៅទីក្រុងដាម៉ាស ដោយមានការបារម្ភពីបញ្ហាសន្តិសុខ។
ចំណែកឯអ្នកនាំពាក្យនៃក្រសួងការបរទេសអាមេរិកបានថ្លែងថា “ប្រមុខដឹកនាំស៊ីរីបាស្ហារអាល-អាស្សាដតែងធ្វើសំណើដដែលៗបែបនេះជាច្រើនខែរួចមកហើយ សហរដ្ឋអាមេរិកគ្មានជំនឿឡើយទៅលើសំណើរបស់បាស្ហារអាល-អាស្សាដ”។ រីឯសេតវិមានឯណោះវិញ កំពុងគិតគូរពីលទ្ធភាពនៃការផ្តល់ជំនួយមនុស្សធម៌ឲ្យទៅប្រជាជនស៊ីរី។
ហើយនៅថ្ងៃអង្គារម្សិលមិញទៀត លោក John McCain សមាជិកព្រឹទ្ធសភាអាមេរិកនិងជាអតីតបេក្ខជនប្រធានាធិបតីអាមេរិកមកពីបក្សសាធារណរដ្ឋបានថ្លែងទាមទារឲ្យទីក្រុងវ៉ាស៊ីនតោនគិតគូរពីការបំពាក់អាវុធឲ្យទៅក្រុមអ្នកប្រឆាំងស៊ីរីដែលកំពុងត្រូវធ្វើការប្រឈមតទល់នឹងការវាយបង្ក្រាបដ៏សាហាវឃោរឃៅដោយទាហាននៃរបបផ្តាច់ការបាស្ហារអាល-អាស្សាដ។
នៅចំពោះមុខទង្វើហិង្សាដ៏សាហាវឃោរឃៅនៃរបបផ្តាច់ការបាស្ហារអាល-អាស្សាដ ប្រទេសអឺរ៉ុបជាច្រើនមានដូចជាប្រទេសបារាំង អង់គ្លេស បែលហ្សិក អេស្ប៉ាញ អ៊ីតាលី និងប្រទេសហូឡង់បានកោះហៅឯកអគ្គរដ្ឋទូតរបស់ខ្លួនឲ្យត្រឡប់ចូលមកប្រទេសរបស់ខ្លួនវិញ ដើម្បីធ្វើការពិគ្រោះ។
នៅពេលនេះ ប្រទេសអឺរ៉ុបនៅពុំទាន់មានវិធានការណ៍អ្វីច្បាស់លាស់នៅឡើយ ក្រៅពីគ្រោងដាក់ទណ្ឌកម្មសេដ្ឋកិច្ចនិងហិរញ្ញវត្ថុទៅលើប្រទេសស៊ីរីដូចកាលដាក់ទៅលើប្រទេសអ៊ីរ៉ង់ ដើម្បីបិទខ្ទប់ប្រភពហិរញ្ញវត្ថុរបស់ប្រទេសស៊ីរី។
ប្រទេសទាំង២៧នៃសហភាពអឺរ៉ុបកំពុងគិតគូរពីមធ្យោបាយធ្វើការហាមឃាត់ពុំឲ្យមានការជួញដូរ “មាស” និងលោហធាតុមានតម្លៃផ្សេងៗទៀតជាមួយប្រទេសស៊ីរី ក៏ដូចគ្នាអ៊ីចឹងដែរពាក់ព័ន្ធនឹងសកម្មភាពហិរញ្ញវត្ថុជាមួយធនាគារកណ្តាលស៊ីរី។ ប្រទេសសមាជិកនៃសហភាពអឺរ៉ុបក៏គ្រោងផងដែរចុះឈ្មោះឥស្សរជនស៊ីរីមួយចំនួនបន្ថែមទៅក្នុងបញ្ជីខ្មៅ ហាមឃាត់ពុំឲ្យទទួលបានទិដ្ឋាការសម្រាប់ធ្វើដំណើរនៅក្នុងសហភាពអឺរ៉ុប ព្រមទាំងឃាត់ផ្អាប់ទុកប្រាក់របស់អ្នកទាំងនោះដែលមាននៅក្នុងធនាគារអឺរ៉ុប។
ទាំងនេះពិតជាទណ្ឌកម្មលើកទីដប់ពីរហើយដែលសហភាពអឺរ៉ុបបានដាក់ទៅលើទីក្រុងដាម៉ាស ចាប់តាំងពីមានការវាយបង្ក្រាបដ៏ហិង្សាដោយទាហានរបស់របបផ្តាច់ការបាស្ហារអាល-អាស្សាដនៅប្រទេសស៊ីរី។ ក៏ប៉ុន្តែវិធានការទណ្ឌកម្មទាំងនោះនឹងពុំអាចអនុម័តបាន មុនជំនួបប្រជុំរដ្ឋមន្ត្រីក្រសួងការបរទេសអឺរ៉ុបនៅចុងដំណាច់ខែនេះឡើយ។
ដូច្នេះ នៅពេលនេះគេនៅពុំទាន់អាចដឹងថា តើស្ថានការណ៍នៅស៊ីរីនឹងប្រែប្រួលទៅជាយ៉ាងណានោះឡើយ។ ក៏ប៉ុន្តែ បើសហរដ្ឋអាមេរិកពិតជាអាចផ្តល់ជំនួយហិរញ្ញវត្ថុនិងបំពាក់អាវុធគ្រប់គ្រាន់ឲ្យក្រុមប្រឆាំងស៊ីរីមែន នោះរបបគ្រប់គ្រងផ្តាច់ការរបស់បាស្ហារអាល-អាស្សាដនៅប្រទេសស៊ីរីច្បាស់ជានឹងត្រូវដួលរលំនៅពេលដ៏ខ្លីខាងមុខនេះ។ ដោយហេតុថា មិនទាន់ទាំងអ្វីផង ចលនាងើបបះបោរប្រឆាំងស៊ីរីបានរីករាលដាលដល់ជាយទីក្រុងដាម៉ាសទៅហើយ ទោះបីជាមានការវាយបង្ក្រាបយ៉ាងសាហាវឃោរឃៅពីសំណាក់ទាហានរបស់រដ្ឋាភិបាលបាស្ហារអាល-អាស្សាដទៅលើប្រជាជនយ៉ាងណាក៏ដោយ៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ