ប្រទេសឥណ្ឌាបានសម្រេចជ្រើសទិញយន្តហោះប្រដេញ Rafale បារាំង១២៦គ្រឿង
ចុះផ្សាយនៅថ្ងៃ៖
ស្តាប់ - ០៤:១២
ក្រោយពីបានស្គាល់ការខកខានក្នុងការលក់យន្តហោះប្រដេញ Rafale របស់ខ្លួនជាច្រើនលើករួចមក ម្តងនេះក្រុមហ៊ុន Dassault របស់បារាំងទទួលបានជោគជ័យ ដោយប្រទេសឥណ្ឌាបានសម្រេចជ្រើសទិញយន្តហោះប្រដេញ Rafale បារាំង១២៦គ្រឿងដែលមានតម្លៃសរុបដល់ទៅជាង៩ពាន់លានអឺរ៉ូ។ នេះពិតជាជោគជ័យដ៏ធំធេងមួយសម្រាប់ក្រុមហ៊ុនផលិតអាកាសយាន្តបារាំង។
នេះពិតជាជោគជ័យដ៏ធំធេងមួយសម្រាប់ក្រុមហ៊ុនផលិតយន្តហោះប្រដេញបារាំង Dassault ដែលប្រទេសឥណ្ឌាបានសម្រេចជ្រើសទិញយន្តហោះប្រដេញ Rafale បារាំង១២៦គ្រឿង។ មូលហេតុចម្បងដែលនាំឲ្យអ្នកដឹកនាំឥណ្ឌាសម្រេចជ្រើសទិញយន្តហោះប្រដេញ Rafale របស់បារាំងគឺកត្តា “តម្លៃ” ។ បើយោងតាមព័ត៌មានបានមកពីក្រសួងការពារជាតិឥណ្ឌាបានឲ្យដឹងថា យន្តហោះប្រដេញនីមួយៗរបស់បារាំងមានតម្លៃថោកជាង យន្តហោះប្រដេញ Typhoon របស់ក្រុមហ៊ុនអឺរ៉ុប Eurofighter ដែលជាគូប្រជែង ដល់ទៅ៣ឬ៤លានអឺរ៉ូឯណោះ។ ហើយម្យ៉ាងទៀត យន្តហោះប្រដេញ Rafale បារាំងមានរាងតូចហើយស្រាលជាងយន្តហោះប្រដេញរបស់ប្រទេសដទៃទៀត។
ក្រៅពីបញ្ហា “តម្លៃ” ទំនាក់ទំនងនយោបាយនិងទំនាក់ទំនងយោធាដ៏ល្អរវាងប្រទេសបារាំងនិងប្រទេសឥណ្ឌាក៏ជាកត្តាមួយដ៏សំខាន់មកជួយជំរុញឲ្យអ្នកដឹកនាំឥណ្ឌាសម្រេចជ្រើសទិញយន្តហោះប្រដេញ Rafale បារាំង។ ហើយនៅមានកត្តាមួយទៀតដ៏សំខាន់សម្រាប់ប្រទេសឥណ្ឌាគឺក្រុមហ៊ុនផលិតយន្តហោះបារាំង Dassault យល់ព្រមធ្វើសហការក្នុងការសាងផ្ទេរបច្ចេកវិទ្យាឲ្យទៅភាគីឥណ្ឌា។ ដោយហេតុថា ក្នុងចំណោម យន្តហោះប្រដេញ Rafale បារាំង១២៦គ្រឿងដែលបានសម្រេចជ្រើសទិញដោយប្រទេសឥណ្ឌា មានតែ១៨គ្រឿងប៉ុណ្ណោះដែលផលិតនៅប្រទេសបារាំង។ ចំណែកឯ១០៨គ្រឿងទៀត ភាគីបារាំង-ឥណ្ឌាព្រមព្រៀងគ្នាផលិតនៅមជ្ឈមណ្ឌលអាកាសយានឥណ្ឌាមួយដ៏ធំនៅតំបន់ Bangalore ដែលឋិតនៅប៉ែកខាងត្បូងនៃប្រទេសឥណ្ឌា។ ទាំងនេះអនុលោមតាមកិច្ចព្រមព្រៀងដើម្បីសាងផ្ទេរបច្ចេកវិទ្យាឲ្យទៅភាគីឥណ្ឌា។
ហើយម្យ៉ាងទៀតក៏ដោយសារតែកងកម្លាំងអាកាសឥណ្ឌាក៏មានយន្តហោះប្រដេញរបស់បារាំងជាច្រើនគ្រឿងរួចទៅហើយ មានដូចជា យន្តហោះប្រដេញ Mirage 2000 ជាដើម។ ចំណែកឯជោគជ័យនៃប្រតិបត្តិការយោធារបស់យន្តហោះប្រដេញ Rafale បារាំងនៅប្រទេសលីប៊ីនៅពេលថ្មីៗកន្លងទៅនេះ ក៏ពិតជាកត្តាមួយពុំអាចគេចផុតពីក្រសែចក្ខុរបស់អ្នកដឹកនាំឥណ្ឌាឡើយ។
ដូច្នេះ នៅខណៈនេះក្រុមហ៊ុនផលិតយន្តហោះបារាំង Dassault ពិតជាបានទទួលជោគជ័យ ក៏ប៉ុន្តែភាគីបារាំងនិងភាគីឥណ្ឌានៅពុំទាន់បានចុះហត្ថលេខាទៅលើកិច្ចព្រមព្រៀងនៅឡើយ គេនៅរង់ចាំមើលយ៉ាងតិចប៉ុន្មានខែទៀត ទើបបានដឹងជាក់ច្បាស់ ដោយហេតុតែគេនៅបន្តធ្វើការចរចាទៅលើបញ្ហាមួយចំនួនទៀត។
ជោគជ័យរបស់ក្រុមហ៊ុនផលិតយន្តហោះបារាំង Dassault នៅពេលនេះ ពិតជាបច្ច័យមួយដ៏ប្រពៃជួយសម្រាលសេដ្ឋកិច្ចបារាំងដែលកំពុងតែជួបនឹងវិបត្តិដ៏ធ្ងន់ធ្ងរ។ គ្រាន់តែបានដំណឹងថា ប្រទេសឥណ្ឌាបានសម្រេចជ្រើសទិញយន្តហោះប្រដេញ Rafale បារាំង១២៦គ្រឿងភ្លាម តម្លៃភាគហ៊ុនរបស់ក្រុមហ៊ុនផលិតយន្តហោះបារាំង Dassault បានកើនឡើង+១៨,៤៦%ភ្លាម ពោលគឺកើនឡើងដល់៧២៥អឺរ៉ូ។ ដូច្នេះ បើកិច្ចព្រមព្រៀងបារាំង-ឥណ្ឌាក្នុងការលក់យន្តហោះប្រដេញនេះសម្រេចបានជោគជ័យមែន នោះវានឹងអាចផ្តល់ការងារឲ្យប្រជាជនបារាំងបានដល់ទៅ៧ពាន់កន្លែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ