កម្មកររោងចក្រកាត់ដេរប្រឈមគ្រោះថ្នាក់ខ្ពស់ ពេលធ្វើដំណើរទៅចូលរួមបុណ្យភ្ជុំបិណ្ឌ
ចាប់តាំងពីល្ងាចថ្ងៃសៅរ៍ម្សិលមិញមក កម្មករ-កម្មការិនី រោងចក្រកាត់ដេរ បានសម្រុកចាកចេញពីទីក្រុងភ្នំពេញ ឆ្ពោះទៅកាន់ស្រុកកំណើតរៀងៗខ្លួន ដើម្បីចូលរួមនៅក្នុងពិធីបុណ្យភ្ជុំបិណ្ឌ។ តម្លៃឈ្នួលរថយន្តដ៍ថ្លៃ និងការសម្រុកចេញរបស់មនុស្សដ៏ច្រើនសន្ធឹកសន្ធាប់ បានធ្វើអោយអ្នកដំណើរជាច្រើន ប្រថុយប្រថាននឹងគ្រោះថ្នាក់ ដើម្បីប្រជ្រៀតគ្នាជិះលើរថយន្តដ៏ចង្អៀត រហូតដល់អ្នកខ្លះជិះលើដំបូលក៏មាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ការធ្វើដំណើរប្រកបដោយគ្រោះថ្នាក់ ដើម្បីទៅចូលរួមពិធីបុណ្យភ្ជុំបិណ្ឌរបស់កម្មករ-កម្មការិនី នៅតែជាប្រធានបទនៃការរិះគន់ទៅលើចំណាត់ការរបស់អាជ្ញាធររាជធានីភ្នំពេញ។ នៅលើបណ្តាញព័ត៌មានសង្គម Facebook នៅថ្ងៃអាទិត្យទី២១កញ្ញានេះ រូបភាពជាច្រើនសន្លឹកស្តីពីការជិះលើរថយន្តឈ្នួលដ៍គ្រោះថ្នាក់ ត្រូវបានគេបង្ហោះឡើង។ អ្នកបង្ហោះរូបភាពភាគច្រើនបានផ្តល់មូលហេតុផ្សេងៗគ្នា។ តម្លៃឈ្នួលរថយន្តដ៍ថ្លៃ និងការសម្រុកចេញរបស់មនុស្សដ៏ច្រើនសន្ធឹកសន្ធាប់នៅក្នុងឱកាសនៃពិធីបុណ្យភ្ជុំបិណ្ឌនេះ បានធ្វើអោយអ្នកដំណើរជាច្រើន ប្រថុយប្រថាននឹងគ្រោះថ្នាក់ ដើម្បីប្រជ្រៀតគ្នាជិះលើរថយន្តដ៏ចង្អៀត រហូតដល់អ្នកខ្លះជិះលើដំបូលក៏មាន។ ការជិះប្រជ្រៀតនៅលើដំបូល ឬដឹកសំពីងសំពោង គឺជាមូលហេតុមួយហើយ ក៍ប៉ុន្តែអ្នកបើកបរឯណោះវិញ ក៍មិនសូវមានការប្រុងប្រយ័ត្នប៉ុន្មានដែរ ផ្ទុយទៅវិញពួកគេមួយចំនួនបានបើកបរក្នុងល្បឿនលឿនថែមទៀត ដើម្បីបានដឹកម៉ូយច្រើនជើង ដោយមិនបានគិតពីហានិភ័យនានានោះទេ។
លោក ហ្វា សាលី ប្រធានសម្ព័ន្ធសហជីពជាតិ ដែលបានសរសេរនៅលើទំព័រ Facebookរបស់លោកនៅថ្ងៃអាទិត្យនេះ បានផ្តល់មូលហេតុជាច្រើននៃការជិះរថយន្តដ៍ប្រជ្រៀតគ្នានេះ។ ទី១-មកពីប្រាក់ឈ្នួលតិចតួច ទី២-រដ្ឋាភិបាលគ្មានចំណាត់ការច្បាស់លាស់ ក្នុងការទប់ស្កាត់ការធ្វើដំណើរដោយមិនគោរពច្បាប់ចរាចរណ៍ ទី៣-ប៉ូលីសចរាចរណ៍និងប៉ូលីសតាមខណ្ឌនីមួយៗពុករលួយក្នុងឱកាសបុណ្យម្តងៗ ដោយមិនខ្វល់ពីសុវត្ថិភាពប្រជាពលរដ្ឋខ្លួន និងទី៤-គ្មានការកំណត់តម្លៃឲ្យបានច្បាស់លាស់សមរម្យ។ តែលោក ឡុង ឌីម៉ង់ អ្នកនាំពាក្យសាលារាជធានីភ្នំពេញបានបញ្ជាក់ថា អាជ្ញាធរបានបង្កើនកិច្ចប្រតិបត្តិការយ៉ាងសកម្មហើយ ដើម្បីទប់ស្កាត់ការល្មើសច្បាប់ចរាចរណ៍ដូចជាការដឹកមនុស្សលើដំបូលជាដើម។
គិតត្រឹមថ្ងៃសៅរ៍ម្សិលមិញ មានករណីគ្រោះថ្នាក់ចរាចរណ៍ចំនួន២១ករណី បានកើតឡើងនៅទូទាំងប្រទេស នឹងបានបណ្តាលអោយមនុស្ស៨នាក់ស្លាប់បាត់បង់ជីវិត និងមនុស្ស៥០នាក់បានរងរបួស។ នេះបើតាមការបញ្ជាក់ពីលោក ហ៊ឹម យ៉ាន ប្រធាននាយកដ្ឋានសណ្តាប់ធ្នាប់ នៃអគ្គស្នងការដ្ឋាននគរបាលជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ