បារាំង ៖ គម្រោងថវិកាដែលបង្ហាញពីភាពប្រេះឆាក្នុងជួរបក្សកាន់អំណាច
ចុះផ្សាយនៅថ្ងៃ៖
ស្តាប់ - ០៤:២១
នៅថ្ងៃពុធទី ២៣ មេសា ២០១៤នេះ នាយករដ្ឋមន្ត្រីបារាំង លោក ម៉ានុយអែល វ៉ាល (Manuel Valls) ត្រូវបង្ហាញទៅកាន់ក្រុមប្រឹក្សារដ្ឋមន្ត្រី នូវផែនការថវិកា សម្រាប់បីឆ្នាំខាងមុខ (២០១៥-២០១៧)និងទិសដៅម៉ាក្រូសេដ្ឋកិច្ច ដើម្បីកាត់បន្ថយឱនភាពថវិកា ឱ្យធ្លាក់ក្រោម៣%នៃផលិតផលសរុបក្នុងស្រុក។ រដ្ឋាភិបាលថ្មី គ្រោងនឹងកាត់បន្ថយចំណាយ ៥០ពាន់លានអឺរ៉ូ ប៉ុន្តែយុទ្ធសាស្ត្រហិរញ្ញវត្ថុនេះ ហាក់បានទទួលការប្រឆាំង និងមិនទុកចិត្ត ពីសំណាក់អ្នកនយោបាយក្នុងបក្សកាន់អំណាចតែមួយតែម្តង។ តើគម្រោងថវិកាមានលក្ខណៈរិតត្បិតយ៉ាងណា ? តើគម្រោងនេះអាចត្រូវសភាបោះឆ្នោតនៅថ្ងៃទី ២៩មេសា ផ្តល់ទំនុកចិត្តដែរឬទេ?
តាំងពីបានតែងតាំងជានាយករដ្ឋមន្ត្រីបារាំងមក លោក ម៉ានុយអែល វ៉ាល ស្ថិតក្រោមសម្ពាធរហូត ! ក្រុមអ្នកបរិស្ថានជាបក្សសម្ព័ន្ធមិត្តបដិសេធមិនចូលធ្វើការក្នុងរដ្ឋាភិបាល ហើយនៅក្នុងរង្វង់បក្សតែមួយ ក៏បេក្ខភាពនាយករដ្ឋមន្ត្រីមិនបានទទួលការស្វាគមន៍ជាឯកច្ឆ័ន្ទ។
ភស្តុតាងថ្មីចុងក្រោយ គ្រាន់តែបានឃើញផែនការសន្សំសំចៃថវិកា ៥០ពាន់លានអឺរ៉ូភ្លាម សមាជិកសភាបក្សសង្គមនិយម ជាបក្សកាន់អំណាចជាងមួយរយនាក់ បាននាំគ្នាចុះហត្ថលេខាលើលិខិតមួយទាមទារកិច្ចសន្យាដឹកនាំ ពោលគឺចង់បានវិធីសាស្ត្រដឹកនាំរដ្ឋាភិបាលថ្មី និងតម្រង់ទិសនយោបាយសេដ្ឋកិច្ច ថវិកា និងនយោបាយបារាំងថ្នាក់អឺរ៉ុបឡើងវិញ។ ក្រោយបរាជ័យក្នុងការបោះឆ្នោតឃុំសង្កាត់ សមាជិកសភាបក្សសង្គមនិយមជាច្រើន មិនទាន់បាត់គ្រាំចិត្តទេ និងមិនចង់ឃើញរដ្ឋាភិបាលបញ្ចប់អាណត្តិ៥ឆ្នាំដូចលទ្ធផលពីរឆ្នាំដំបូងដែរ ទើបនាំគ្នាប្រមូលផ្តុំកម្លាំងចាប់ពីពេលនេះទៅ ចាំជួយកាច់លោក ម៉ាណុយអែល វ៉ាល តាំងពីដំបូងម្តង។
តើទិសដៅកាត់បន្ថយចំណាយសាធារណៈរបស់រដ្ឋាភិបាល គ្រោងធ្វើយ៉ាងណាខ្លះ? បើតាមលោក ម៉ានុយអែល វ៉ាល ក្នុងរយៈពេលបីឆ្នាំ (ពីពេលនេះដល់ឆ្នាំ២០១៧) រដ្ឋាភិបាលនឹងបន្ថយចំណាយចំនួន ៥០ពាន់លាន ដោយមិនប៉ះពាល់លើការបង់ពន្ធទេ។
គេអាចសម្រេចផែនការនេះបាន ដោយគ្រប់ភាគី រដ្ឋនិងវិស័យសាធារណៈ ត្រូវបន្ថយចំណាយ១៨ពាន់លាន សមូហភាពមូលដ្ឋាន ១១ពាន់លាន និងធានារ៉ាប់រងសុខភាព ១០ពាន់លាន ព្រមទាំង១១ពាន់លាន លើផ្នែកចំណាត់ការប្រព័ន្ធសង្គម។ ជំនួយឧបត្ថម្ភ សម្រាប់គ្រួសារ ផ្ទះសម្បែង និង ចូលនិវត្តន៍ នឹងត្រូវបង្កក (មិនដំឡើងស្របតាមតម្លៃជីវិត រយៈពេលតែមួយឆ្នាំ រហូតដល់ខែតុលា ២០១៥) រដ្ឋអាចសន្សំប្រាក់២ ទៅ៤ ពាន់លានអឺរ៉ូ។ សន្ទសន៍កាំប្រាក់ខែ កំណត់តាំងពីឆ្នាំ២០១០ នឹងមិនត្រូវប៉ះពាល់កែប្រែទេ ! ចំនួនបុគ្គលិករដ្ឋ បង្កើនតែក្នុងវិស័យអប់រំ ប៉ូលិស និងតុលាការ ចំណែកវិស័យផ្សេងទៀតនឹងត្រូវបន្តកាត់បន្ថយ។
សម្រាប់លោកនាយករដ្ឋមន្ត្រី នេះមិនមែនជាផែនការរិតត្បិតថវិកាទេ តែការសន្សំសំចៃ ចាយវាយដោយមិតប្រៃ ហើយក៏មិនមែនធ្វើឡើងដើម្បីបំពេញចិត្តគណៈកម្មការអឺរ៉ុប តែប៉ុណ្ណោះឡើយ តែគឺដើម្បីផ្តល់សន្ទុះដល់ការប្រកួតប្រជែងសេដ្ឋកិច្ចនិងទីផ្សារឱ្យបារាំង។
បច្ចុប្បន្ននេះ ប្រទេសបារាំងមានឱនភាពជាតិដល់ទៅ ៤,៣%នៃប្រាក់ចំណូលសរុបរបស់ជាតិ។ ជាមួយនឹងផែនការកាត់បន្ថយចំណាយ៥០ពាន់លាននេះ បារាំងសង្ឃឹមថានឹងអាចនាំឱនភាពជាតិឱ្យធ្លាក់មកត្រឹម៣% ឆ្លើយតបបានទៅនឹងអនុសាសន៍របស់គណៈកម្មការអឺរ៉ុប។
ប៉ុន្តែផែនការសន្សំសំចៃនេះ បានទទួលរកការប្រឆាំង ពីសំណាក់សមាជិកសភាមកពីគណបក្សសង្គមនិយម ជាគណបក្សកាន់អំណាចផ្ទាល់តែម្តង។ សមាជិកមួយក្តាប់តូច យល់ថាការកាត់បន្ថយចំណាយច្រើនពេក ជាពិសេសកាត់បន្ថយជំនួយសង្គម នឹងធ្វើឱ្យប្រជាពលរដ្ឋក្រីក្រ កាន់តែមានជីវភាពខ្សត់ខ្សោយខ្លាំង គ្មានលទ្ធភាពចាយវាយ នោះនឹងធ្វើឱ្យសេដ្ឋកិច្ចជាតិលែងដើរ។ ក្រុមនេះបានសំណូមពរឱ្យរដ្ឋាភិបាល កាត់បន្ថយចំណាយត្រឹមតែ៣៥ពាន់លានបានហើយ ពោលគឺមិនស្មើនឹងកម្មវត្ថុដែលប្រធានាធិបតីធ្លាប់សន្យាទេ។
ការប្រឆាំងរហូតដល់មានចេញជាលិខិតចំហផ្ញើជូននាយករដ្ឋមន្ត្រី មុនពេលលោកចេញការពារគម្រោងថវិកា ជាសញ្ញាមួយល្អទេសម្រាប់រដ្ឋាភិបាល។ ពេញមួយចុងសប្តាហ៍កន្លងទៅនេះ គណៈកម្មការហិរញ្ញវត្ថុសភា បានសិក្សានិងលើកសំណើបីផ្សេងទៀត ដើម្បីឱ្យរដ្ឋាភិបាលពិចារណា និងចម្រាញ់យកផ្លូវកណ្តាលទទួលយកបានពីគ្រប់ភាគី។
មិនដឹងថាជាតាក់ទិច ឬដោយចិត្តស្មោះត្រង់ទេ លោកប្រមុខរដ្ឋាភិបាល ម៉ានុយអែល វ៉ាលវិញ បានបន្ទន់ខ្លួន តែមិនព្រលែងផែនការឡើយ កម្មវត្ថុ៥០ពាន់លាននឹងត្រូវរក្សាដដែល ប៉ុន្តែមានចំណុចសង្គមមួយចំនួនដូចជាបញ្ហាប្រាក់និវត្តន៍ទំនងត្រូវកែប្រែដើម្បីតម្រូវចិត្តសភា។ លោកបានបង្កើនជំនួបជាមួយក្រុមអ្នកមានជំហររឹងតឹងតែង និងជាមួយក្រុមអ្នកបរិស្ថាន តាំងពីថ្ងៃអង្គារមក ព្រោះលោកចង់ធានាឱ្យបានថាគម្រោងថវិកាបីឆ្នាំខាងមុខរបស់ពិតជាត្រូវបានសភាបោះឆ្នោតផ្តល់ទំនុកចិត្ត។ បើក្នុងករណីមិនទទួលបានសំឡេងភាគច្រើនដាច់ខាតគាំទ្រទេ នោះប្រធានាធិបតីបារាំងបង្ខំចិត្តត្រូវរំលាយសភា។ គ្រោះដែលសមាជិកសភាបក្សសង្គមនិយមមិនអាចទទួលយកបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ