ភ្នាក់ងារ Sandard & Poor's ទម្លាក់ចំណាត់បារាំងមួយកំរិត
ជាព័ត៌មានដ៏អាក្រក់ សម្រាប់រដ្ឋាភិបាលបារាំង ! នៅថ្ងៃសុក្រនេះ ភ្នាក់ងាយវាយតម្លៃហានិភ័យ Sandard & Poor's បានប្រកាសទម្លាក់ចំណាត់ថ្នាក់បារាំងកំរិតបន្ថែមទៀត ពី លេខ AA+ មកត្រឹមAA។ លោកប្រធានាធិបតីបារាំង ហ្វ្រង់ស័រ ហូឡង់ បានបញ្ចេញប្រតិកម្មតបភ្លាម ថាមិនប្តូរទិសដៅនយោបាយ ធ្វើកំណែទម្រង់ ដែលបានចាប់ផ្តើមរួចមកហើយនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
នេះគឺជាការព្រមានលើកទីពីរហើយ ក្នុងរយៈពេលមិនដល់ពីរឆ្នាំផង។ កាលពីដើមឆ្នាំ២០១២ ភ្នាក់ងារវាយតម្លៃហានិភ័យ Sandard & Poor's បានបញ្ចុះចំណាត់ថា្នក់ បារាំងដែលល្អបំផុតAAA មកត្រឹមAA+ ហើយនៅថ្ងៃនេះទម្លាក់មួយកំរិតទៀត គឺនៅត្រឹមAA។ មធ្យោបាយដោះស្រាយវិបតិ្តថវិការួមតូច មិនអាចទប់ស្កាត់ការកើនឡើងនៃអ្នកអត់ការងារធ្វើ សុទ្ធសឹងជាមូលហេតុដែលនាំដល់ការបញ្ចុះចំណាត់ថ្នាក់នេះ។ ភ្នាក់ងារ Sandard & Poor's ក៏បានរិះគន់ចំៗផងដែរ ការជាប់គាំងនយោបាយ យកពន្ធដារ របស់រដ្ឋាភិបាលបារាំង។
ប៉ុន្តែសម្រាប់រដ្ឋាភិបាល ដែលបញ្ចេញប្រតិកម្មគ្មានបង្អង់វិញ បានការពារខ្លួនថា “ចំណាត់ថ្នាក់បារាំងស្ថិតក្នុងចំណោមលំដាប់ខ្ពស់ដដែលនៅលើពិភពលោក”។ នេះជាប្រសាសន៍របស់លោកនាយករដ្ឋមន្ត្រីដែលបន្ទោសភ្នាក់ងារ Sandard & Poor'sថាមិនបានរាប់ការខិតខំប្រឹងប្រែងធ្វើកំណែទម្រង់របស់រដ្ឋាភិបាលកន្លងមក ដែលលទ្ធផលនឹងផ្តល់នៅពេលខាងមុខ។ មិនខុសគ្នានេះដែរ រដ្ឋមន្ត្រីក្រសួងសេដ្ឋកិច្ច យល់ថាភ្នាក់ងារមើលស្រាលសមត្ថភាពកំណែទម្រង់របស់បារាំង។
បើទោះជាអនាគត រដ្ឋាភិបាលបារាំងអាចបង្ហាញលទ្ធផលល្អយ៉ាងណាក៏ដោយ ក៏សម្រាប់ពេលនេះ ការបញ្ចុះចំណាត់ពិតកំពុងច្របាច់ករដ្ឋាភិបាល ឱ្យកាន់តែបាត់បង់ទំនុកចិត្តមួយជាន់ថែមទៀត និងជាឱកាសល្អសម្រាប់ក្រុមបក្សប្រឆាំងស្តាំនិយមរិះគន់ ពីភាពស្ពឹកស្រពន់របស់លោក ហ្វ្រង់ស័រ ហូឡង់។ លោកប្រធានាធិបតីបារាំង ដែលល្បីខាងមិនចេះអារកាត់សម្រេចអ្វី និងមានអប្រជាប្រិយដល់កំរិតទាបបំផុតមិនធ្លាប់មាន នៅតែប្រកាសរក្សាទិសដៅនយោបាយដដែល ព្រោះការមិនរេរាជាការធានាបាននូវភាពជឿជាក់។ តែផលវិបាកនៃការបញ្ចុះចំណាត់ បានរីកសាយភាយយ៉ាងទាន់ហន់។ គ្រាន់តែបានឃើញទណ្ឌកម្មនេះភ្លាម អត្រាការប្រាក់នៅទីផ្សារហិរញ្ញវត្ថុបានឡើងថ្លៃភ្លាម នៅព្រឹកថ្ងៃសុក្រនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ