រហូតដល់ថ្ងៃព្រហស្បតិ៍នេះ ជំនន់​ទឹកភ្លៀង ដែល​បាន​ជន់លិច​ច្បារដំណាំ ស្រូវស្រែ និងលិច​ភូមិស្ថាន ដែល​ធ្ងន់ធ្ងរជាងគេ​នៅ​ខេត្ត​បន្ទាយមានជ័យ បាន​ស្រកចុះ​បន្តិចហើយ។
 
បន្ទាប់ពីធ្វើដំណើរពិនិត្យស្ថានភាពទឹកជំនន់​នៅតាមខេត្ត​ជុំវិញ​បឹងទន្លេសាប ហើយ​នៅថ្ងៃ​ព្រហស្បតិ៍​នេះ ស្ថិតនៅ​ខេត្តកំពង់ចាម លោក ញឹម វណ្ណដា ទេសរដ្ឋមន្ត្រី និង​ជាអនុប្រធាន​គណៈកម្មាធិការ​ជាតិ​គ្រប់គ្រង​គ្រោះមហន្ត​រាយ បានបន្តផ្តល់ដំណឹង​ដល់​វិទ្យុបារាំងអន្តរជាតិ ថា ទឹកទន្លេមេគង្គ មកដល់ពេលនេះ ខុសគ្នា ៤,៥ ម៉ែត្រ នៅខេត្តក្រចេះ បើធៀបនឹងឆ្នាំមុនៗ ដែល​នាំឲ្យ​យើងសន្និដ្ឋានថា ទឹកទន្លេ នឹងមិនបង្កជាទឹកជំនន់ទេ នៅពេលខាងមុខ។ ចំណែក​ទឹក​ជំនន់​ដោយទឹកភ្លៀង នៅខេត្តព្រះវិហារ ទឹកបានស្រក ហើយ​ហូរមកពេញ​ដងស្ទឹងសែន នៅកំពង់ធំ តែមិនមានបញ្ហាទេ។ រីឯនៅខេត្តសៀមរាប ទឹកក៏បានស្រក។ ចំណែក​ស្រូវប្រមាណ ៤.០០០ ហិកតា នៅស្រុកពួក ខេត្តសៀមរាប ដែល​បានលិចលង់​ប៉ុន្មានថ្ងៃ​មកនេះ ក៏​មិនរងការ​ខូចខាត​អ្វីទេ។
 
លោក ញឹម វណ្ណដា បានបន្ថែមថា ជំនន់ទឹកភ្លៀង នៅឯប៉ោយប៉ែត ខេត្តបន្ទាយមានជ័យ ជាប់​ព្រំដែនថៃ នៅថ្ងៃនេះ បានស្រក ៣,៥ តឹក។ រីឯផ្សាររុងក្លឿ ជាប់ព្រំដែន​ប៉ោយប៉ែត នៅ​ទឹកដីថៃ ទឹកជំនន់​ក៏បានស្រកដែរ។
 
លោក ញឹម វណ្ណដា បន្តថា ប្រជាជន​ប្រហែលជាង ៣.០០០ គ្រួសារ ដែលបាន​មករស់នៅ​ទីទួល​សុវត្ថិភាព ក៏បានត្រៀមខ្លួន ដើម្បី​វិលត្រឡប់​ទៅកាន់​ភូមិកំណើត​វិញ ក្នុងពេល​ប៉ុន្មានថ្ងៃ​ទៀត​នេះ បើសិនជា​គ្មានភ្លៀង។
 
នៅថ្ងៃព្រហស្បតិ៍នេះ កាកបាទក្រហម​កម្ពុជា ក៏បាន​នាំជំនួយ​សង្គ្រោះបន្ទាន់ ផ្តល់ឲ្យ​ពលរដ្ឋរងគ្រោះ​ដោយ​ទឹកជំនន់ជាង ២០០ គ្រួសារ នៅស្រុកអូរជ្រៅ។ ចំណែក​ប្រជាជន​ប្រមាណ ១.០០០ គ្រួសារទៀត នៅប៉ោយប៉ែត នឹង​ទទួលជំនួយ​ពី​កាកបាទក្រហម នៅថ្ងៃស្អែក។
 
លោក ញឹម វណ្ណដា ក៏បានបញ្ជាក់ថា ស្រូវដែល​លិចលង់​កន្លងមក នៅ​ខេត្ត​បន្ទាយមានជ័យ ប្រហែល ៨.០០០ ហិកតា មិន​ខូចខាតទេ។ តែ​ដំឡូងមី លិចទឹក ១.៥០០ ហិកតា ប្រហែល​ជា​ខូចខាត ៥០%។
 
ផ្ទុយទៅវិញ ទឹកភ្លៀង ដែលបង្កជា​ទឹកជំនន់ នាពេលនេះ ត្រូវបាន​លោក ញឹម វណ្ណដា លើកឡើង​ថា នៅទូទាំងប្រទេស មាន​ភ្លៀង​គ្រប់គ្រាន់ ធ្វើឲ្យ​សន្ទូងស្រូវ​ល្អ ហើយ​ជំរុញឲ្យ​ការបង្កបង្កើន​ផលស្រូវ​បានទិន្នផល​ខ្ពស់ ពោលគឺ​ទឹកភ្លៀង ពេលនេះ បាន​បញ្ចប់​នូវ​គ្រោះរាំងស្ងួត។
 
អំពីចំនួនជនរងគ្រោះ ដែលបាន​បាត់បង់​ជីវិត​ដោយសារ​ជំនន់​ទឹកភ្លៀង​វិញ ក៏ត្រូវបាន​លោក ញឹម វណ្ណដា នៅតែរក្សា​តួលេខ​ចាស់ថា មាន​តែ​មនុស្ស​ពីរនាក់​ប៉ុណ្ណោះ បាន​ស្លាប់ ដោយ​លង់​ទឹក កាលពី​ថ្ងៃម្សិលមិញ។
 
យ៉ាងណាក៏ដោយ នៅថ្ងៃព្រហស្បតិ៍នេះ មាន​សេចក្តីរាយការណ៍​ថា ក្មេងប្រុស អាយុ ១២ឆ្នាំ នៅ​ល្ងាចមិញ ត្រូវ​ទឹកហូរ​កួច​ស្លាប់ នៅក្រុងប៉ោយប៉ែត៕