Delicious
Digg
Facebook
Twitter
Yahoo!
Technorati
ចន្ទ 08 តុលា 2012
ហ្វេសប៊ុកកំពុងកាត់បន្ថយផលិតភាពការងារនៅកម្ពុជាឬ ?
ហ្វេសប៊ុកកំពុងកាត់បន្ថយផលិតភាពការងារនៅកម្ពុជាឬ ?
DR
យុវជនខ្មែរច្រើនម៉ឺនសែននាក់បាន និងកំពុងប្រើប្រាស់ហ្វេសប៊ុក។ ការប្រើប្រាស់បណ្តាញសង្គមមួយនេះអាចមានប្រយោជន៍ច្រើន ប៉ុន្តែវាក៏កំពុងបង្កបញ្ហាច្រើនដែរដល់សង្គមខ្មែរ។ បុគ្គលិកក្រុមហ៊ុន អង្គការ និងរដ្ឋមួយចំនួនគិតតែពីលេងហ្វេសប៊ុកក្នុងម៉ោងធ្វើការ។ តើទង្វើនេះជាការបាត់បង់ផលិតភាពការងារដែរ ឬទេ ?
បណ្តាញសង្គមហ្វេសប៊ុកត្រូវបានគេបង្កើតឡើងនៅឆ្នាំ២០០៤នៅសហរដ្ឋអាមេរិកដោយជនជាតិអាមេរិកកាំង។ បន្ទាប់មកបណ្តាញសង្គមមួយនេះចេះតែរីកសាយភាយ និងមានប្រជាប្រិយភាពបន្តិចម្តងៗនៅលើពិភពលោក ជាពិសេស នៅក្នុងប្រទេសជឿនលឿន។ ចំពោះប្រទេសកម្ពុជាវិញ ហ្វេសប៊ុកបានចូលមកកាលពីចុងឆ្នាំ២០០០ ប៉ុន្តែវាមានភាពល្បីល្បាញ និងទាក់ទាញយុវជនខ្មែរខ្លាំងនៅឆ្នាំ២០១២នេះតែម្តង។ រហូតមកដល់សព្វថ្ងៃនេះ គេមិនទាន់មានតួលេខបញ្ជាក់ច្បាស់លាស់ពីចំនួនប្រជាជនខ្មែរប្រើប្រាស់បណ្តាញសង្គមមួយនេះនៅឡើយទេ។ ប៉ុន្តែបើយោងតាមការប៉ាន់ស្មានមួយចំនួន ប្រជាជនខ្មែរនៅក្នុងប្រទេស ជាពិសេស យុវជនយុវនារី មិនតិចជាង៥០ម៉ឺននាក់ទេដែលបាន និងកំពុងប្រើប្រាស់ហ្វេសប៊ុក។
តើការប្រើប្រាស់បណ្តាញហ្វេសប៊ុកផ្តល់គុណសម្បត្តិនិងគុណវិបត្តិយ៉ាងណាខ្លះដល់សង្គមខ្មែរ?
ប្រសិនបើគេគិតពីគំនិតដើមរបស់អ្នកបង្កើតហ្វេសប៊ុក ហ្វេសប៊ុកមានប្រយោជន៍ច្រើនរាប់មិនអស់។ ហ្វេសប៊ុកគឺជាបណ្តាញសង្គមដ៏មានប្រសិទ្ធិភាពដែលអនុញ្ញាតអោយមនុស្សទាំងអស់នៅលើពិភពលោកអាចទំនាក់ទំនងគ្នាបាន។ អ្វីដែលហ្វេសប៊ុកមានលក្ខណៈពិសេសលើសពីអ៊ីមែលគឺនៅត្រង់ថា ហ្វេសប៊ុកអនុញ្ញាតអោយមនុស្សច្រើនលាននាក់អាចចែករំលែកព័ត៌មានគ្នាបានក្នុងពេលដ៏ខ្លីបំផុត។ ម្យ៉ាងវិញទៀត អ្នកលេងហ្វេសប៊ុកអាចជជែកគ្នាបានភ្លាមៗជាមួយមនុស្សច្រើននាក់ផ្សេងទៀតក្នុងពេលតែមួយ។ អ្នកខ្លះ Chat ជាមួយមិត្តភក្តិបី បួន ប្រាំនាក់ព្រមពេលជាមួយគ្នា។
ក្រៅពីការចែករំលែកព័ត៌មានអោយគ្នាទៅវិញ ទៅមក ហ្វេសប៊ុកត្រូវបានគេប្រើប្រាស់ដើម្បីផ្សព្វផ្សាយពាណិជ្ជកម្មផលិតផលដែលខ្លួនមាន។ ជារៀងរាល់ថ្ងៃ អ្នកលេងហ្វេសប៊ុកមួយចំនួន តែងតែឆ្លៀតយកទំព័រហ្វេសប៊ុកដើម្បីបង្ហាញផលិតផលនេះឬផលិតផលនោះទៅកាន់មិត្តភក្តិរបស់គេ។ ការផ្សាយពាណិជ្ជកម្មនៅលើទំព័រហ្វេសប៊ុកគឺជាការផ្សព្វផ្សាយដោយមិនបង់ប្រាក់កាសអ្វីទាំងអស់។ ដោយមិននិយាយពីគោលដៅពាណិជ្ជកម្ម អ្នកខ្លះចាត់ទុកហ្វេសប៊ុកថា ជាមិត្តភក្តិដ៏ល្អដែលមិនអាចអត់បានឡើយ។ ពួកគេចាត់ទុកហ្វេសប៊ុកជាមិត្តភក្តិពីព្រោះហ្វេសប៊ុកអាចជួយកែអផ្សុកពួកគេបាន។ អ្នកខ្លះទៀតប្រើប្រាស់ហ្វេសប៊ុកដើម្បីភ្ជាប់ស្នេហ៍។
អ្នកវិភាគសង្គមសេដ្ឋកិច្ចនៅក្នុងប្រទេសកម្ពុជាដែលបានតាមដានស្ថានការណ៍កម្ពុជាតាំងពីដើមឆ្នាំ៩០មក បានអត្ថាធិប្បាយថា ហ្វេសប៊ុកមានគុណសម្បត្តិច្រើនមែន ប៉ុន្តែហ្វេសប៊ុកក៏មានគុណវិបត្តិរបស់វាដែរ ប្រសិនបើអ្នកប្រើប្រាស់ ប្រើខុសគោលដៅរបស់វានោះ។ តាមពិត ហ្វេសប៊ុកខ្លួនឯងមិនមានគុណវិបត្តិអ្វីទេ។ គុណវិបត្តិរបស់វាគឺកើតចេញមកពីអ្នកប្រើប្រាស់។ អ្នកប្រើប្រាស់ហ្វេសប៊ុកមួយចំនួននៅក្នុងប្រទេសកម្ពុជាដែលញៀននឹងហ្វេសប៊ុកនោះបានចំណាយពេលយ៉ាងច្រើនជាមួយបណ្តាញសង្គមមួយនេះ។ អ្នកខ្លះញៀន លេងរហូតដល់ទៅភ្លេចបាយភ្លេចទឹក ភ្លេចរៀនភ្លេចសូត្រឬភ្លេចការងារក៏មានដែរ។ យុវជនខ្លះអង្គុយនៅមុខកុំព្យូទ័រទំនងដូចជាធ្វើកិច្ចការងារអ៊ីចឹង។ តាមពិត ពួកគេលេងហ្វេសប៊ុកច្រើនជាងធ្វើកិច្ចការ។
ស្ថានភាពជាក់ស្តែងនៅក្នុងប្រទេសកម្ពុជានាពេលបច្ចុប្បន្ននេះបានបង្ហាញអោយឃើញថា មិនមែនតែយុវជនទេដែលប្រើប្រាស់ខុសទិសដៅនោះ។ តាមពិត មន្ត្រីរាជការ បុគ្គលិកក្រុមហ៊ុន និងបុគ្គលិកអង្គការមួយចំនួនបាននិងកំពុងវក់វីនឹងការប្រើប្រាស់ហ្វេសប៊ុកខុសទិសដៅ។ បុគ្គលិករដ្ឋ ក្រុមហ៊ុននិងអង្គការខ្លះធ្វើការផងលេងហ្វេសប៊ុកព្រមពេលជាមួយគ្នា។ បុគ្គលិកខ្លះទៀត លេងហ្វេសប៊ុកច្រើនជាងធ្វើការ មានន័យថា ពួកគេអង្គុយនៅមុខកំព្យូទ័រមែនប៉ុន្តែពួកគេគិតតែពីជជែកគ្នាតាមហ្វេសប៊ុក។ ពេលខ្លះ ក្រៅពីជជែកគ្នាតាមហ្វេសប៊ុក ពួកគេមួយចំនួនគិតតែពីឆែកមើលព័ត៌មានស្ទើររាល់ម៉ោង។ និន្នាការអាក្រក់ដ៏នេះបាននិងកំពុងកើតមានកាន់តែច្រើនឡើងៗពីពេលមួយទៅពេលមួយ។ ដោយសារតែមើលឃើញទម្លាប់អាក្រក់កើតមានកាន់តែច្រើននេះហើយ ទើបស្ថាប័នឯកជនមួយចំនួនចាប់ផ្តើមមានវិធានការហាមឃាត់ មិនអោយបុគ្គលិករបស់ខ្លួនលេងហ្វេសប៊ុកនៅក្នុងម៉ោងធ្វើការ។
អ្នកវិភាគសង្គមសេដ្ឋកិច្ចបានទាញសញ្ញាអាសន្នថា ប្រសិនបើបុគ្គលិក មិនថា បុគ្គលិករដ្ឋ ឯកជន ឬអង្គការនោះទេគិតតែពីលេងហ្វេសប៊ុកឬលេងផងធ្វើការផងនោះ ពេលនោះ ផលិតភាពឬប្រសិទ្ធិភាពការងារសម្រាប់ស្ថាប័ននឹងត្រូវកាត់បន្ថយ។ សូមបញ្ជាក់ថា ប្រសិនបើស្ថាប័នបាត់បង់ផលិតភាព ពេលនោះ ស្ថាប័ននោះអាចក្ស័យធន។ ហើយនៅពេលដែលស្ថាប័នក្ស័យធន បុគ្គលិកក៏គ្មានការងារធ្វើដែរ។ ដូច្នេះ ដើម្បីគេចចេញពីគ្រោះថ្នាក់នេះ ក្រុមហ៊ុន អង្គការ និងស្ថាប័នរដ្ឋត្រូវតែចាត់វិធានការជាបន្ទាន់ រីឯបុគ្គលិកវិញ ពួកគេត្រូវតែមានសតិសម្បជញ្ញៈក្នុងការងារជាចម្បង៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ (10)
បុគ្គលខ្លួនឯងជាអ្នកដែលអាចបែងចែកពេលវេលា
បើតាមយោបល់ខ្ញុំ វាមានប្រយោជន៍ជាច្រើនសំរាប់អ្នកទាំងអស់គ្នា ក៏ប៉ុន្តែអ្នកទាំងអស់គ្នាមិនចេះប្រើប្រាស់វក្នុងពេលវេលាណាមួយអោយបានត្រឹមត្រូវ ដែលធ្វើអោយវាបែជាគ្មានប្រយោជន៍ទៅវិញ ។
សូមបញ្ចេញយោបល់មួយចំនួន
មុននឹងធ្វើការរិះគន់សូមមេត្តាអាន ឬស្តាប់ឲ្យនូវអ្វីដែលគេចង់និយាយ បានយើងធ្វើការប្រតិកម្មទៅបានត្រឹមត្រូវណា! ហើយនេះជាបទវិភាគណា ! បើអ្នកទាំងអស់គ្នាយល់ពីនិយមន័យ វីភាគ ច្បាស់ នោះលោកអ្នកពិតជាប្រតិកម្មទៅមិនខុស និងមានប្រសិទ្ធិភាពថែមទៀតណា
មិនអាច
បើសិនជាចង់បឹទហ្វេសប៊ុកមែន នោះខ្មែរមិនមែនជាប្រទេសកាន់របបលទ្ធិប្រជាធិបតេយ្យឡើយ៊។ហ្វេសប៊ុក ជាលទ្ធិប្រជាធិបតេយ្យដែលគ្រប់គ្នាអាចបញ្ចេញមតិ ធ្វើអ្វីបានដោយសេរី នេះជាចំនុចពិសេសនៃហ្វេសប៊ុក!
naked in 2004 why have in Cambodia in 2000 ?
បណ្តាញសង្គមហ្វេសប៊ុកត្រូវបានគេបង្កើតឡើងនៅឆ្នាំ២០០៤នៅសហរដ្ឋអាមេរិកដោយជនជាតិអាមេរិកកាំង។ បន្ទាប់មកបណ្តាញសង្គមមួយនេះចេះតែរីកសាយភាយ និងមានប្រជាប្រិយភាពបន្តិចម្តងៗនៅលើពិភពលោក ជាពិសេស នៅក្នុងប្រទេសជឿនលឿន។ ចំពោះប្រទេសកម្ពុជាវិញ ហ្វេសប៊ុកបានចូលមកកាលពីចុងឆ្នាំ២០០០ ប៉ុន្តែវាមានភាពល្បីល្បាញ និងទាក់ទាញយុវជនខ្មែរខ្លាំងនៅឆ្នាំ២០១២នេះតែម្តង។
nonsense
there's NO evidence and research about the affection yet.
ល្មមហើយលោកបារាំង
បារាំងធ្វើបាបខ្មែរ 100 ឆ្នាំហើយ ឥឡូវមកផ្សាយព័ត៌មាន ចង់ឲ្យខ្មែរយ៉ាងម៉េចទៀត? សូមមើលវិទ្យុអាស៊ីសេរី ដែលគេផ្សាយដើម្បីប្រទេសនៅអាស៊ី។ បារាំងជាអ្នកទទួលខុសត្រូវរឿងទឹកដីកម្ពុជាក្រោម។
និយាយជាការពិត
តាមពិតទៅខ្ញុំគិតថា វិទ្យុបារាំងគាត់បានធ្វើការវិភាគល្អជាងវិទ្យុមួយចំនួនដែលគិតតែរិះគន់គេមិនមានគំនិត ស្ថាបនានោះទេ។ នេះជាព័ត៌មានដែលក្រើនរំលឹកដល់យុវវ័យ និងមនុស្សមួយចំនួនកុំគិតតែប្រើដោយមិន គិតមុខគិតក្រោយនោះ។ វាមិនមែនមានន័យថាអ្នកលេងFBទាំងអស់ធ្វើដូចនេះទេ។
ខ្ហុំយល់ស្រប
ខ្ញុំយល់ស្រប, វិទ្យុបារាំងគឺជាវិទ្យុមួយដែលការវិភាគរបស់ពួកគាត់ល្អ ហើយឆ្លុះបញ្ចាំងពីសង្គមខ្មែរ និង បង្ហាញឲ្យយើងដឹងពីសង្គមខាងក្រៅច្រើនផងដែរ។
ក្ស័យធន ឬ អត់ការងារធ្វើ?
""អ្នកវិភាគសង្គមសេដ្ឋកិច្ចបានទាញសញ្ញាអាសន្នថា ប្រសិនបើបុគ្គលិក មិនថា បុគ្គលិករដ្ឋ ឯកជន ឬអង្គការនោះទេគិតតែពីលេងហ្វេសប៊ុកឬលេងផងធ្វើការផងនោះ ពេលនោះផលិតភាពឬប្រសិទ្ធិភាពការងារសម្រាប់ស្ថាប័ននឹងត្រូវកាត់បន្ថយ"" ""ប្រសិនបើស្ថាប័នបាត់បង់ផលិតភាព ពេលនោះ ស្ថាប័ននោះអាចក្ស័យធន"" ខ្ញុំមិនយល់អញ្ជឹងទេ កុំប៉្រូហួសហេតុពេកលោកម្ចាស់!! សម្ដីរបស់លោកអាចឲ្យ ហ៊ុនសែន មានលេស បិទមិនខ្មែរទំនាក់ទំនងគ្នាដោយសេរីតាម Facebook បានណា។ ឧទាហរណ៍ ទាក់ទងប្រព័ន្ធ 3G ដែលហ៊ុនសែនយកលេសថា ខ្លាចលោកសង្ឃប្រើមុខងារ វីដេអូ Call ទាក់ទងស្រីៗ តាមពិត គឺខ្លាចជំទាវៗ តាមទាន់ជាន់កែង ពួកតាតា ដែលនៅក្នុងសណ្ឋាគារជាមួយ...។ "ស្ថាប័ននោះអាចក្ស័យធន" ក៏ដោយសារប្រព័ន្ធដឹកនាំ។ ស្រុកខ្មែរគេភ័យខ្លាចអត់ការងារធ្វើ និង មានធ្វើដែរតែស៊ីមិនគ្រាន់។
ប្រព័ន្ធនយោបាយ?
តាមពិតខ្ញុំមិនដឹងថាអ្នកគិតយ៉ាងម៉េចចំពោះការសរសេរអត្ថបទនេះទេ តែវានិយាយពីបញ្ហារបស់ការប្រើប្រាស់ អីុធើណែតរបស់យុវវ័យ។ ជាការពិតការដែលប្រហែលជាអាចមាន តែអត្ថបទនេះវិភាគលើបញ្ហាផ្សេងទេ។ សូមមេត្តាត្រួតពិនិត្យប្រធានបទម្តងទៀតផង
ប្រតិកម្មជុំវិញអត្ថបទនេះ