កម្ពុជា -

អត្ថបទចុះផ្សាយនៅថ្ងៃ ព្រហស្បតិ៍ 30 សីហា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 01 កញ្ញា 2012

គ្រូពេទ្យថាលោកស្រីអៀង ធីរិទ្ធ មានជំងឺវង្វេងវង្វាន់មិនធូរស្រាលទេ

លោកស្រីអៀង ធីរិទ្ធិ ជនជាប់ចោទមួយរូប ក្នុងចំណោមជនជាប់ចោទ ៤រូប ក្នុងសំណុំរឿង០០២

RFI/Menghour Ly

ដោយ លី ម៉េងហួរ

នៅថ្ងៃទី៣០ ខែសីហា ឆ្នាំ២០១២ អង្គជំនុំជម្រះសាលាដំបូង របស់តុលាការខ្មែរក្រហម បានចាប់ផ្តើមបើកសវនាការសាជាថ្មី លើកាយសម្បទា និងបញ្ញាស្មារតី របស់លោកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ចខ្មែរក្រហម។ ក្នុងការវាយតម្លៃលើអាការៈជំងឺរបស់លោកស្រី អៀង ធីរិទ្ធ អាយុ ៨០ ឆ្នាំ ត្រូវបានក្រុមគ្រូពេទ្យ លើកឡើងថា ស្ថានភាពជំងឺវង្វេងវង្វាន់របស់លោកស្រី អៀងធីរិទ្ធ នៅពេលនេះ មិនបានធូរស្រាលទេ។ ក៏ប៉ុន្តែសាក្សី ជាវេជ្ជបណ្ឌិតផ្នែកវិកលវិទ្យា ដែលជាគ្រូពេទ្យកម្ពុជា បានយល់ឃើញផ្ទុយពីនេះ ហើយថា លោកស្រី អៀង ធីរិទ្ធ មានសភាពធូរស្រាល ផ្នែករាងកាយ មិនមានសញ្ញាណាដែលបញ្ជាក់ថា លោកស្រី មានជំងឺវិកលចរិត តែគាត់អាចមានការភ្លេចភ្លាំងបន្តិចបន្តួច ដែលត្រូវនឹងវ័យរបស់គាត់ តែមិនមានសភាពធ្ងន់ធ្ងរឡើយ។

សេចក្តីរាយការណ៍របស់ លី ម៉េងហូរពីភ្នំពេញ

ស្តាប់ (03:15)

30/08/2012 by លី ម៉េងហួរ

សវនាការ នៅតុលាការខ្មែរក្រហម រយៈពេលពីរថ្ងៃ ចាប់ពីថ្ងៃ៣០សីហានេះ ដើម្បីស្តាប់ការវាយតម្លៃរបស់អ្នកជំនាញវេជ្ជសាស្ត្រ លើស្ថានភាពកាយសម្បទា និងបញ្ញាស្មារតីរបស់លោកស្រី អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ចខ្មែរក្រហម។

ក្រុមអ្នកជំនាញ ជាវេជ្ជបណ្ឌិតខ្មែរម្នាក់ និងបរទេសពីរនាក់ បានបង្ហាញខ្លួន ក្នុងបន្ទប់សវនាការ ដើម្បីផ្តល់នូវរបាយការណ៍វាយតម្លៃរបស់ខ្លួន លើអាការៈជំងឺរបស់លោកស្រី អៀង ធីរិទ្ធ។ ក្នុងនោះ ក៏មានសាក្សីម្នាក់ទៀត គឺលោកស្រី ចក់ ធីតា វេជ្ជបណ្ឌិត ឯកទេសវិកលវិទ្យា និងជាអនុប្រធានមន្ទីរពេទ្យមិត្តភាពខ្មែរ-សូវៀត ក្នុងទីក្រុងភ្នំពេញ។

រីឯលោកស្រី អៀង ធីរិទ្ធ រួមទាំងលោកអៀងសារី ដែលជាស្វាមីរបស់លោកស្រី មិនបានបង្ហាញខ្លួន ក្នុងបន្ទប់សវនាការទេ តែពួកគាត់ទាំងពីរ ដែលកំពុងមានជំងឺ ត្រូវបានគេអះអាងថា កំពុងតាមដានសវនាការនៅថ្ងៃនេះដែរ តែធ្វើឡើងតាមរយៈកញ្ចក់ទូរទស្សន៍ ដែលមានការផ្សាយបន្តផ្ទាល់។

កាលពីចុងឆ្នាំ២០១១ លោកស្រី អៀង ធីរិទ្ធ អាយុ ៨០ ឆ្នាំ ត្រូវបានក្រុមអ្នកជំនាញ ជាគ្រូពេទ្យជាតិ និងអន្តរជាតិ អះអាងថា លោកស្រី មានជំងឺវង្វេងវង្វាន់ ឬអាចជាជំងឺបាត់ការចងចាំ ដែលមិនអាចនាំមកកាត់ទោស ក្នុងសំណុំរឿង០០២ ជាមួយនឹងលោក អៀង សារី លោកខៀវសំផន និងលោក នួនជា បានឡើយ។

ក៏ប៉ុន្តែក្រោយមក អង្គជំនុំជម្រះរបស់តុលាការកំពូល នៅតុលាការខ្មែរក្រហម បានកំណត់ឲ្យមានការវាយតម្លៃម្តងទៀត និងព្យាបាលជំងឺរបស់លោកស្រី អៀង ធីរិទ្ធ រយៈពេល ៦ ខែ គិតមកដល់ពេលនេះ។

ការវាយតម្លៃចុងក្រោយជាថ្មី ក្នុងសវនាការនៅព្រឹកមិញ ត្រូវបានលោកវេជ្ជបណ្ឌិត Seena Fazel តំណាងឲ្យក្រុមអ្នកជំនាញ ៤ រូប ដែលតែងតាំងដោយតុលាការខ្មែរក្រហម នៅតែអះអាងថា ស្ថានភាពជំងឺវង្វេងវង្វាន់របស់លោកស្រី អៀងធីរិទ្ធ នៅពេលនេះ មិនបានធូរស្រាលទេ ទោះបីជាប្រើប្រាស់ថ្នាំពេទ្យ និងកម្មវិធីដាស់បញ្ញាសតិយ៉ាងណាក៏ដោយ។

ក្រុមគ្រូពេទ្យក៏បានបញ្ជាក់ថា ក៏មិនមានវិធីសាស្ត្រព្យាបាលណាមួយ ដែលអាចជួយជំរុញដល់សតិបញ្ញារបស់លោកស្រី អៀង ធីរិទ្ធ បាននោះឡើយ។

ក៏ប៉ុន្តែសាក្សី លោកស្រី ចក់ ធីតា វេជ្ជបណ្ឌិត ឯកទេសវិកលវិទ្យា ដែលបានតាមដានជំងឺរបស់លោកស្រី អៀងធីរិទ្ធ ចាប់តាំងពីខែកុម្ភៈ ឆ្នាំ២០១១ បានលើកឡើងទៅកាន់ចៅក្រមថា លោកស្រី អៀង ធីរិទ្ធ មិនបានទទួលរងនូវការថមថយផ្នែកសតិបញ្ញាស្មារតី ដែលជាជំងឺវង្វេងវង្វាន់នោះទេ។ ពោលគឺលោកស្រីអៀងធីរិទ្ធ មិនមានជំងឺខាងផ្លូវចិត្ត ឬក៏ជំងឺវិកលចរិតទេ។ តែលោកស្រីវេជ្ជបណ្ឌិត បានលើកឡើងថា លោកស្រី អៀង ធីរិទ្ធ ហាក់មានការភ្លេចភ្លាំងបន្តិចបន្តួចទៅតាមវ័យចំណាស់របស់គាត់ ដែលមានអាយុ ៨០ ឆ្នាំ ប៉ុណ្ណោះ។

ទោះជាយ៉ាងណាក៏ដោយ ក្នុងសវនាការ កាលពីរសៀលថ្ងៃទី៣០ ខែសីហា ឆ្នាំ២០១២ លោកមេធាវី ផាត់ ពៅស៊ាង សហមេធាវីជាតិ ការពារក្តីលោកស្រី អៀង ធីរិទ្ធ បានច្រានចោលនូវការលើកឡើងរបស់សាក្សី លោកស្រីវេជ្ជបណ្ឌិត ចក់ធីតា ហើយថា លោកស្រី អៀង ធីរិទ្ធ មានអាការៈជំងឺធ្ងន់ធ្ងរ ដោយសារតែលោកស្រី អៀង ធីរិទ្ធ មិនស្គាល់ សូម្បីតែឈ្មោះប្តីរបស់គាត់ គឺលោក អៀង សារី និងរូបលោក ជាមេធាវី។

សវនាការលើស្ថានភាពជំងឺរបស់លោកស្រី អៀង ធីរិទ្ធ នឹងបន្តធ្វើនៅថ្ងៃសុក្រ ទី៣១ ខែសីហា ឆ្នាំ២០១២៕