នៅទីបំផុតសហភាពអឺរ៉ុបអាចព្រមព្រៀងគ្នាបង្កើតសហភាពធនាគារ
ចុះផ្សាយនៅថ្ងៃ៖
ស្តាប់ - ០៥:៣១
រដ្ឋមន្រ្តីសេដ្ឋកិច្ចរបស់សហភាពអឺរ៉ុបបានឯកភាពគ្នា កាលពីយប់ថ្ងៃពុធម្សិលមិញ ទៅលើការបង្កើតសហភាពធនាគារ។ នៅក្នុងសហភាពធនាគារ គេបានព្រមព្រៀងគ្នាបង្កើតយន្តការមួយដែលមានទិសដៅរៀបចំ ស្តារឡើងវិញ ធនាគារដែលមានបញ្ហាហិរញ្ញវត្ថុ ឬបញ្ជាឲ្យបិទ ឬការដាក់ឲ្យក្ស័យធន ដោយបង្ខំលើធនាគារណា ដែលគេវាយតម្លៃថា ជួបហានិភ័យ។
សហភាពអឺរ៉ុបបង្កើត សហភាពធនាគារ ដើម្បីអាចប្រមូលផ្តុំធនាគារទាំងអស់ ដែលមានប្រមាណជាង៦ពាន់ធនាគារ នៅអឺរ៉ុប ទាំងឯកជន ឬរបស់រដ្ឋ ឲ្យមកស្ថិតនៅក្រោមការត្រួត ពិនិត្យរបស់ធនាគារកណ្តាលអឺរ៉ុប។ បើទោះបីជាស្ថិតនៅក្រោមការត្រួតពិនិត្យពិនិត្យរបស់ធនាគារកណ្តាល ប៉ុន្តែ ធនាគារឯកជនទាំងនោះនៅតែមានសេរីភាព និងអាចធ្វើការប្រកួត ប្រជែងគ្នាដូចមុន។
ការដែលសហភាពអឺរ៉ុបចង់ប្រមូលផ្តុំយកធនាគារនៅអឺរ៉ុបទាំងអស់មកដាក់ក្រោមការត្រួតពិនិត្យរបស់ធនាគារកណ្តាលអឺរ៉ុប ព្រោះគេចង់ជៀសវាង វិបត្តិធនាគារ ដែលបានកើតកន្លងនៅក្នុងរដ្ឋសមាជិករបស់សហភាពអឺរ៉ុប។ នៅក្រិក ឬអេស្ប៉ាញ ឬអៀរឡង់ វិបត្តិធនាគារបានធ្វើឲ្យរដ្ឋាភិបាលធ្លាក់ខ្លួន ជួបវិបត្តិប្រាក់បំណុល។ ជួបប្រាក់បំណុល ដោយសារតែរដ្ឋដែលគ្មានលុយរួចទៅហើយនោះ បានរត់ទៅខ្ចីលុយបន្តពីធនាគារផ្សេង ក្នុងអត្រាការប្រាក់ខ្ពស់ ដើម្បីយកទៅជួយទប់ទល់ការក្ស័យធនរបស់ធនាគារឯកជន ឬធនាគារជាតិដែលជួបវិបត្តិប្រាក់បំណុលដែរ។ រដ្ឋអន្តរាគមន៍ជួយធនាគារក្នុងស្រុករបស់ខ្លួន ដោយសារតែធនាគារទាំងនោះជាប្រភពទ្រទ្រង់សេដ្ឋកិច្ចមួយដែររបស់ប្រទេស។
តាមរយៈសហភាពធនាគារ គេអាចគ្រប់គ្រងស្ថានភាពវិបត្តិប្រាក់បំណុលរបស់ធនាគារបានល្អជាងមុន។ នៅក្នុងសហភាពធនាគារនេះ គេបានបង្កើតយន្តការពិសេសពីរ។ យន្តការទីមួយ មាននាទីតាមដានស្ថានភាពហិរញ្ញវត្ថុរបស់ធនាគារ ចំណែកយន្តការមួយទៀតមាននាទីសម្រេចចិត្តបិទធនាគារ ឬប្រកាសការក្ស័យធនដោយបង្ខំទៅលើធនាគារណាដែលគេវាយតម្លៃថា កំពុងជួបហានិភ័យហិរញ្ញវត្ថុជាដើម។ ធ្វើដូច្នេះ គឺដើម្បី ការពារកុំឲ្យធនាគារជួបវិបត្តិទាន់។ រាល់ការសម្រេចបិទដោយបង្ខំធនាគារណាមួយ ត្រូវចេញ ពីក្រុមប្រឹក្សាអឺរ៉ុប ប៉ុន្តែ មិនមែនមកពីគណៈកម្មការអឺរ៉ុបទេ។
មូលនិធិបានមកពីវិភាគទានរបស់ធនាគារ ដើម្បីយកទៅជួយធនាគារដែលជួបបញ្ហា
តាមកិច្ចព្រមព្រៀង នៅពេលដែលសហភាពធនាគារបង្កើតឡើង ធនាគារនៅអឺរ៉ុបត្រូវចូលរួមធ្វើវិភាគទានដល់មូលនិធិមួយ ដែលគេគ្រោងថា នឹងមានចំនួន៥៥ពាន់លានអឺរ៉ូ នៅឆ្នាំ ២០២៥។ មានន័យថា ធនាគារទំាងអស់នៅអឺរ៉ុប ក្រៅតែពីសន្សំលុយទុក ដើម្បីត្រៀមការក្ស័យធុន ត្រូវចូលរួមធ្វើវិភាគទាន ក្នុងមូលនិធិរួមរបស់សហភាពធនាគារ។ ធ្វើដូច្នេះ គឺគេអាចប្រើលុយដែលជាវិភាគទានរបស់ធនាគារ ដើម្បីយកទៅប្រើជួយធនាគារដែលជួបវិបត្តិ តាមរយៈប្រាក់កម្ចី គឺដើម្បីជួយសម្រាលបន្ទុករបស់រដ្ឋ និងប្រជាជនដែលជាអ្នកបង់ពន្ធ ដែលតាមពិត គ្មានជាប់ពាក់ព័ន្ធនឹងវិបត្តិធនាគារនោះ។
អ្នកជំនាញ វាយតម្លៃថា គេអាចប្រមូលមូលនិធិបម្រុងប្រមាណ ៥៥ពាន់លានដុល្លារបានយ៉ាងងាយ ព្រោះថា ធនាគារធំៗ នៅអឺរ៉ុបមានទុនយ៉ាងតិចរបស់ខ្លួន ក្នុងមួយធនាគារ ៣០ពាន់លានអឺរ៉ូ។ មួយវិញ ទៀត តាមប្រធានគណៈកម្មការអឺរ៉ុបទទួលបន្ទុកសេដ្ឋកិច្ច សហភាពធនាគារអាចមានសិទ្ធិទៅខ្ចីលុយបន្តពីគេ។
នៅក្នុងការចរចារហូតមក បារាំងទាមទារថា នៅក្នុងពេលរង់ចាំ ទម្រាំដល់មានមូលនិធិ ៥៥ពាន់លានអឺរូ នៅឆ្នាំ ២០២៥ គេគួរប្រើមូលនិធិអឺរ៉ុបដើម្បីស្ថិរភាពហិរញ្ញវត្ថុ ដែលគេបង្កើត ជាពិសេស នៅក្នុងពេលតំបន់អឺរ៉ូជួបវិបត្តិប្រាក់បំណុល។ មូលនិធិនេះដែលចូលរួមធ្វើវិភាគទានពីសមាជិករបស់ប្រទេសចាយលុយអឺរ៉ូមានរហូតមកដល់ពេលនេះ ប្រមាណ ៥០០ពាន់លានអឺរ៉ូ។ បារាំងចង់ឲ្យគេយកថវិកាទៅជួយធនាគារ នៅពេលធនាគារក្នុងប្រទេសអឺរ៉ុបណាមួយជួបវិបត្តិ។ ចំណុចនេះនៅតែចំណុចខ្វែងគំនិតគ្នារវាងក្រុមប្រទេសអឺរ៉ុបខាងត្បូង ដែលជួបវិបត្តិប្រាក់បំណុលច្រើនជាងគេ ដែលនាំមុខដោយបារាំង និងក្រុមប្រទេសអឺរ៉ុបខាងជើង ដែលនាំមុខដោយអាល្លឺម៉ង់ និងដែលមានឈ្មោះល្បីខាងមានកំណើនសេដ្ឋកិច្ច។
បើតាមកិច្ចព្រមព្រៀង នៅយប់ថ្ងៃពុធម្សិលមិញ បារាំងមិនបានទទួលបានតាមការទាមទាររបស់ខ្លួនទេ។ ដូចដឹងស្រាប់ហើយ អាល្លឺម៉ង់ដែលជាភាគីចរចាសំខាន់ បានបដិសេធយ៉ាងដាច់អហង្កាមិនឲ្យគេប្រើលុយវិភាគទានរបស់រដ្ឋ ជាពិសេសលុយពន្ធរបស់ប្រជាជនអាល្លឺម៉ង់ ដើម្បីជួយធនាគារដែលខ្ជីខ្ជាមិនចេះគ្រប់គ្រងហិរញ្ញវត្ថុរបស់ខ្លួននោះទេ។
កិច្ចព្រមព្រៀងស្តីពីសហភាពធនាគារ បានកំណត់ថា នៅក្នុងករណីធនាគារជួបវិបត្តិ ធនាគារត្រូវរត់រកជំនួយ ការខ្ចីពីធនាគារផ្សេងទៀត ប៉ុន្តែ ក្នុងករណីដុនដាបខ្លាំង ធនាគារអាចរត់រកជំនួយពីរដ្ឋម្ចាស់ប្រទេសរបស់ខ្លួន។ ហើយក្នុងករណីណាដែលរដ្ឋដែលត្រូវលូកដៃជួយ គ្មានលុយ ដូចឧទាហរណ៍ ក្រិក ឬអេស្ប៉ាញ នោះរដ្ឋអាចមានសិទ្ធិទៅខ្ចី ពី មូលនិធិអឺរ៉ុបដើម្បីស្ថិរភាពហិរញ្ញវត្ថុ ប៉ុន្តែ ក្នុងលក្ខខណ្ឌបែបណាទៀតនោះ គេនៅមិនទាន់ដឹងនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ