Delicious
Digg
Facebook
Twitter
Yahoo!
Technorati
សុក្រ 19 សីហា 2011
តើអឺរ៉ុបឋិតនៅក្នុងស្ថានភាពដ៏គ្រោះថ្នាក់ឬ?
លោកស្រី Angela Merkelទាមទារឲ្យប្រទេសសមាជិកក្នុងតំបន់ចាយប្រាក់អឺរ៉ូទាំងអស់គោរពវិធានច្បាប់រក្សាឲ្យមានតុល្យភាពថវិកា
© Reuters/Tobias Schwarz
សេដ្ឋកិច្ចនិងហិរញ្ញវត្ថុនៃប្រទេសសមាជិកតំបន់ចាយប្រាក់អឺរ៉ូកំពុងឋិតនៅក្នុងស្ថានភាពមួយដ៏គ្រោះថ្នាក់ក្រៃលែង។ ដូច្នេះ តើអ្នកដឹកនាំអឺរ៉ុបគិតរិះរកដំណោះស្រាយដោយវិធីណាដើម្បីជួយបញ្ចៀសអឺរ៉ុបឲ្យគេចផុតពីគ្រោះថ្នាក់ធនក្ស័យ?
ថ្ងៃអង្គារទី១៦សីហាឆ្នាំ២០១១ ទីផ្សារហិរញ្ញវត្ថុរង់ចាំមើលការស្វែងរកដំណោះស្រាយដោយលោកប្រធានាធិបតីបារាំងនីកូឡា សាកូហ្ស៊ី និង លោកស្រីនាយករដ្ឋមន្ត្រីអាល្លឺម់ង់ Angela Merkel ឲ្យវិបត្តិសេដ្ឋកិច្ច វិបត្តិហិរញ្ញវត្ថុ និងវិបត្តិប្រាក់បំណុលនៃប្រទេសសមាជិកតំបន់ចាយប្រាក់អឺរ៉ូ។ ដើម្បីឆ្លើយតបទៅនឹងការរង់ចាំនេះ អ្នកដឹកនាំនៃប្រទេសមហាអំណាចសេដ្ឋកិច្ចអឺរ៉ុបដ៏សំខាន់ជាងគេទាំងពីរបានស្នើបង្កើតឲ្យមាន៖
-អភិបាលកិច្ចអឺរ៉ុបរួមគ្នាមួយក្នុងវិស័យសេដ្ឋកិច្ចនិងហិរញ្ញវត្ថុ។
-ពន្ធដាក់ទៅលើការទិញលក់ក្នុងវិស័យហិរញ្ញវត្ថុ។
-សញ្ញាប័ណ្ណអឺរ៉ូឬEuro-obligations។
ក៏ប៉ុន្តែសំណួរមួយបានលេចឡើងចោទសួរថា តើប្រាក់អឺរ៉ូពិតជាឋិតនៅក្នុងស្ថានភាពពោរពេញទៅដោយគ្រោះថ្នាក់ឬ?
រូបិយប័ណ្ណអឺរ៉ុបពិតជាឋិតនៅក្នុងស្ថានភាពមួយដ៏គ្រោះថ្នាក់។ ស្ថានការណ៍បានធ្លាក់ចុះដុនដាបធ្ងន់ធ្ងរ ទើបអ្នកដឹកនាំអឺរ៉ុបបានចាប់គិតគូររិះរកដំណោះស្រាយមែនទែន។ រហូតដល់ពេលថ្មីៗនេះ អ្នកដឹកនាំអឺរ៉ុបគ្រាន់តែធ្វើការឆ្លើយតបទៅនឹងសម្ពាធរបស់ទីផ្សារតែប៉ុណ្ណោះ។ ឥឡូវនេះ ទើបគេចាប់គិតគូរដល់ដំណោះស្រាយសម្រាប់រយៈកាលវែងឆ្ងាយ។ ដូច្នេះ បច្ចុប្បន្ននេះ គេគ្មានជម្រើសអ្វីក្រៅពីធ្វើឲ្យអភិបាលកិច្ចនៅក្នុងតំបន់ចាយប្រាក់អឺរ៉ូមានលក្ខណៈល្អប្រសើរជាងមុន។ សំណួរនៅពេលនេះពុំមែនដើម្បីដឹងថា តើគេត្រូវការប្រាក់អឺរ៉ូឬទេ? ប្រាក់អឺរ៉ូបានកើតមានជារូបរាងរួចទៅហើយ បើប្រាក់អឺរ៉ូជួបនឹងវិបត្តិក្សិនក្ស័យ នោះវាច្បាស់ជាបង្កឲ្យកើតមានវិបត្តិធនាគារមួយពោរពេញដោយវិនាសកម្ម ហើយពិភពលោកទាំងមូលច្បាស់ជាជួបនឹងវិបត្តិសេដ្ឋកិច្ចដើរថយក្រោយជាពុំខាន។
តើគេគួរបង្កើតឲ្យមានសញ្ញាប័ណ្ណអឺរ៉ូដើម្បីជួយសង្គ្រោះប្រទេសដែលមានវិបត្តិប្រាក់បំណុលដែរឬទេ?
ការបបង្កើតសញ្ញាប័ណ្ណអឺរ៉ូដើម្បីជួយសង្គ្រោះគ្នាទៅវិញទៅមកជាការចាំបាច់ ជាពិសេសនៅខណៈពេលដែលប្រព័ន្ធធនាគារអឺរ៉ុបកំពុងជួបនឹងវិបត្តិ។ ធនាគារអឺរ៉ុបមួយចំនួនបានធ្លាក់ចុះទន់ខ្សោយ ដោយហេតុតែគ្មានមូលនិធិគ្រប់គ្រាន់ ហើយម្យ៉ាងទៀត ធនាគារអឺរ៉ុបទាំងនេះមានសញ្ញប័ណ្ណបំណុលនៃប្រទេសអឺរ៉ុបមានវិបត្តិហិរញ្ញវត្ថុធ្ងន់ធ្ងរដូចជាប្រទេសអ៊ីតាលីឬប្រទេសអេស្ប៉ាញនៅក្នុងដៃរបស់ខ្លួន។
ដូច្នេះ ការបង្កើតសញ្ញាប័ណ្ណអឺរ៉ូជាការចាំបាច់ចៀសពុំផុត។ នៅចន្លោះពេលនេះ ក្រុមប្រឹក្សារដ្ឋមន្ត្រីហិរញ្ញវត្ថុអឺរ៉ុបត្រូវតែយល់ព្រមឲ្យធនាគារកណ្តាលអឺរ៉ុបផ្តល់ហិរញ្ញប្បទានឲ្យប្រទេសអឺរ៉ុបមានវិបត្តិប្រាក់បំណុលដោយគិតអត្រាការប្រាក់ទាប។ ហើយមូលនិធិអឺរ៉ុបដើម្បីស្ថិរភាពហិរញ្ញវត្ថុ FESF ក៏អាចនឹងត្រូវដើរតួនាទីជំនួសធនាគារបណ្តោះអាសន្នសិន ទម្រាំនឹងបង្កើតបានសញ្ញាប័ណ្ណអឺរ៉ូ។
ក្រោយពីប្រទេសក្រិក ប្រទេសអេស្ប៉ាញ និងប្រទេសអ៊ីតាលី តើប្រទេសបារាំងអាចក្លាយជាផ្ទាំងស៊ីបរបស់ពួកឈ្មួញទិញលក់កេងយកចំណេញហិរញ្ញវត្ថុដែរឬទេ?
ប្រទេសបារាំងបានក្លាយជាផ្ទាំងស៊ីបរបស់ឈ្មួញទិញលក់កេងយកចំណេញហិរញ្ញវត្ថុរួចទៅហើយ។ ដោយហេតុថា ប្រទេសអ៊ីតាលីនិងប្រទេសអេស្ប៉ាញលែងមានសមត្ថភាពជួយប្រទេសក្រិក ដោយហេតុតែមានវិបត្តិប្រាក់បំណុលដ៏ធ្ងន់ធ្ងរ។ រីឯប្រទេសបារាំងឯណេះត្រូវការជួយសង្គ្រោះប្រទេសក្រិក ក៏ប៉ុន្តែឲ្យទីក្រុងប៉ារីសធ្វើយ៉ាងដូចម្តេច បើខ្លួនមានជាប់ជំពាក់បំណុលគេដល់ទៅ៨៥%នៃផលិតផលដុលក្នុងប្រទេសរួចទៅហើយ។ បន្ថែមពីលើនេះ អត្រានៃកំណើនសេដ្ឋកិច្ចបារាំងក៏មានតិចទាបផងទៀត សឹងតែសូន្យទៅហើយ។
បន្ថែមពីលើបញ្ហាវិបត្តិប្រាក់បំណុល បញ្ហាដ៏ធំមួយទៀតរបស់អឺរ៉ុបគឺបញ្ហាសន្ទុះកំណើនសេដ្ឋកិច្ច។ ឧទាហរណ៍ដូចជាករណីរបស់ប្រទេសអេស្ប៉ាញដែលមានអត្រានៃអ្នកឥតការងារធ្វើដល់ទៅជាង២០% ដូច្នេះការផ្តល់ជំនួយសង្គមកិច្ចជាការចាំបាច់សម្រាប់បញ្ចៀសកុំឲ្យប្រទេសជួបនឹងវិបត្តិសេដ្ឋកិច្ចដើរថយក្រោយនិងវិបត្តិសង្គមមួយដ៏ធ្ងន់ធ្ងរ។ ក៏ប៉ុន្តែឲ្យអ្នកដឹកនាំអេស្ប៉ាញធ្វើយ៉ាងដូចម្តេច បើគ្មានប្រាក់១សេនសោះនៅក្នុងហិបប្រាក់របស់រដ្ឋ ហើយបន្ថែមពីលើនេះ រដ្ឋអេស្ប៉ាញជំពាក់បំណុលគេវ័ណ្ឌក។
ដូច្នេះ តើគេត្រូវធ្វើយ៉ាងដូចម្តេច?
នៅក្នុងករណីរបស់ប្រទេសក្រិកក៏ដូចជាករណីរបស់ប្រទេសអេស្ប៉ាញ៖
-គេត្រូវតែធ្វើកំណែទម្រង់រចនាសម្ព័ន្ធ ដោយធ្វើយ៉ាងណាឲ្យទីផ្សារការងារមានលក្ខណៈប្រកួតប្រជែងខ្ពង់ខ្ពស់។
-ជំរុញការទិញដូរហូបចុកផ្ទៃក្នុងឲ្យមានសន្ទុះឡើងវិញ។
-បង្កើតវិធានច្បាប់អនុញ្ញាតឲ្យប្រទេសដែលមានអត្រានៃអ្នកឥតការងារធ្វើខ្ពស់ អាចមានសិទ្ធិឋិតនៅក្នុងស្ថានភាពឧនភាព។
ក៏ប៉ុន្តែ បញ្ហាគឺនៅត្រង់ប្រទេសអាល្លឺម៉ង់ដែលជាប្រទេសមហាអំណាចសេដ្ឋកិច្ចទីមួយនៅក្នុងតំបន់អឺរ៉ូពុំចង់ដឹងឮពីបញ្ហាឧនភាពសោះឡើយ។ ទីក្រុងប៊ែរឡាំងទាមទារឲ្យប្រទេសសមាជិកក្នុងតំបន់ចាយប្រាក់អឺរ៉ូទាំងអស់គោរពវិធានច្បាប់រក្សាឲ្យមានតុល្យភាពថវិកា។ ដូច្នេះឃើញថា អឺរ៉ុបពិតជាឋិតនៅក្នុងស្ថានភាពទាល់ច្រកដ៏គ្រោះថ្នាក់៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
