តំបន់អឺរ៉ូ៖ បញ្ហាកំណើនសេដ្ឋកិច្ចចុះខ្សោយបន្ថែមទៅលើវិបត្តិប្រាក់បំណុល
ដូចការភ័យបារម្ភរបស់ទីផ្សារហិរញ្ញវត្ថុ តំបន់អឺរ៉ូបានឃើញកំណើនសេដ្ឋកិច្ចរបស់ខ្លួនធ្លាក់ស្រុតចុះនៅត្រីមាសទីពីរឆ្នាំ២០១១។ ទាំងនេះ ពិតជាកត្តាដ៏អវិជ្ជមានក្នុងការជួយរិះរកដំណោះស្រាយឲ្យវិបត្តិប្រាក់បំណុលដ៏សែនធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
បើយោងតាមតួលេខរបស់ការិយាល័យអឺរ៉ុបខាងស្ថិតិ ឬ Eurostat ដែលបានផ្សាយឲ្យដឹងនៅថ្ងៃអង្គារទី១៦សីហាឆ្នាំ២០១១ ផលិតផលដុលសរុបក្នុងតំបន់អឺរ៉ូបានកើនឡើងតែ០,២%ប៉ុណ្ណោះនៅត្រីមាសទីពីរឆ្នាំ២០១១។
សន្ទុះកំណើនសេដ្ឋកិច្ច០,២%នេះជាអត្រាមួយតិចទាបជាងការប្រមាណទុកដែលគេគិតថាអាចមាន០,៣%។
គួរកត់សម្គាល់ថា កំណើនសេដ្ឋកិច្ចអាល្លឺម៉ង់បានស្ទុះកើនឡើងតែ០,១%ប៉ុណ្ណោះនៅត្រីមាសទី២ឆ្នាំ២០១១ទល់នឹងការប្រមាណទុកថាអាចមានដល់ទៅ០,៤%។ ជាងនេះទៅទៀតអត្រានៃកំណើនសេដ្ឋកិច្ចបារាំងនៅត្រីមាសទីពីរឆ្នាំ២០១១មាន០%។
ចំណែកឯប្រទេសដទៃទៀតនៃតំបន់អឺរ៉ូដែលទទួលបានចំណាត់ថ្នាក់ល្អ “AAA” ពីទីភ្នាក់ងារវាយតម្លៃហានិភ័យប្រាក់បំណុលដូចជាប្រទេសហុលឡង់បានឃើញអត្រានៃកំណើនសេដ្ឋកិច្ចរបស់ខ្លួនស្ទុះកើនឡើងតែ០,១%ប៉ុណ្ណោះនៅត្រីមាសទី២ឆ្នាំ២០១១នេះ។ តួលេខនេះឆ្លុះបញ្ចាំងឲ្យឃើញថា ប្រទេសសំខាន់ៗនៃតំបន់អឺរ៉ូគ្មានថាមពលសេដ្ឋកិច្ចគ្រប់គ្រាន់នឹងជួយអូសទាញសេដ្ឋកិច្ចនៃប្រទេសទន់ខ្សោយក្នុងតំបន់ចាយប្រាក់អឺរ៉ូឡើយ។ ទាំងនេះបានធ្វើឲ្យគេកើតមានក្តីបារម្ភកាន់តែខ្លាំងឡើងៗនៅចំពោះមុខគ្រោះថ្នាក់នៃការបែកបាក់ខ្ចាត់ខ្ចាយនៃតំបន់អឺរ៉ូ។
សូម្បីតែប្រទេសអ៊ីតាលីនិងប្រទេសអេស្ប៉ាញដែលឋិតនៅក្រោមការឃ្លាំមើលរបស់ទីផ្សារហិរញ្ញវត្ថុក៏អាចមានអត្រាកំណើនសេដ្ឋកិច្ចគ្រាន់បើជាងប្រទេសអឺរ៉ុបសំខាន់ៗទាំងប៉ុន្មានខាងលើនេះដែរ។ សម្រាប់រយៈកាលនៃត្រីមាសទី២ឆ្នាំ២០១១ ប្រទេសអ៊ីតាលីដែលជាមហាអំណាចសេដ្ឋកិច្ចទីបីក្នុងតំបន់អឺរ៉ូមានអត្រាកំណើនសេដ្ឋកិច្ច០,៣% ហើយប្រទេសអេស្ប៉ាញមាន០,២%។
ប្រទេសព័រទុយហ្កាល់វិញមានអត្រាកំណើនសេដ្ឋកិច្ច០%សម្រាប់ត្រីមាសទី២ឆ្នាំ២០១១ ដែលខុសពីប្រទេសហ្វាំងឡង់+១,២% ប្រទេសអូទ្រីស+១% ប្រទេសស្លូវ៉ាគី+០,៩%។
ប្រឈមមុខទល់នឹងការខកចិត្តហើយនិងសម្ពាធរបស់ទីផ្សារពុំឈប់ឈរ អ្នកដឹកនាំនៃប្រទេសក្នុងតំបន់អឺរ៉ូអាចមានលទ្ធភាពតិចណាស់ក្នុងការរិះរកដំណោះស្រាយឲ្យវិបត្តិប្រាក់បំណុល។
ដូច្នេះហើយបានជានៅថ្ងៃចន្ទកន្លងទៅនេះ លោកស្រីChristine Lagarde អគ្គនាយិកានៃមូលនិធិរូបិយវត្ថុអន្តរជាតិបានអំពាវនាវដល់ប្រទេសទាំងអស់ក្នុងលោក ជាពិសេសប្រទេសដែលមានសេដ្ឋកិច្ចជឿនលឿនឲ្យខិតខំប្រយុទ្ធទប់ទល់នឹងវិបត្តិប្រាក់បំណុល ដោយចៀសវាងកុំសម្លាប់សន្ទុះកំណើនសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ